"გურია ნიუსის" წყაროს ინფორმაციით, ლანჩხუთის მუნიციპალიტეტის საჯარო მოსამსახურეთა პროფესიული კავშირის ხელმძღვანელი და გამგეობის ადმინისტრაციული სამსახურის უფროსი მაგული კუნჭულიამ, ლანჩხუთის მუნიციპალიტეტის განათლების პროფკავშირის ხელმძღვანელს ლელა ქურიძეს და მის თანამშრომლებს , სამსახურის დატოვება და საჯარო მოსამსახურეთა პროფესიულ კავშირში გადასვლა მოთხოვა. როგორც წყარო ამბობს, მაგული კუნჭულია მათზე, ამის გამო ზეწოლას ახდენდა.
აღნიშნულ საკითხთან დაკავშირებით, ჩვენი წყაროს ინფორმაციით, განათლების პროფკავშირის ხელმძღვანელმა ლელა ქურიძემ განცახდებით გურიის გუბერნიას მიმართა.
მსგავს ინფორმაციას "გურია ნიუსთან" კატეგორულად უარყოფს ლანჩხუთის მუნიციპალიტეტის გამგეობის აპარატის უფროსი მაგული კუნჭულია, ლელა ქურიძე ამბობს, რომ მას ამ თემაზე საუბარი ღიად არ სურს, ხოლო გურიის გუბერნატორი გია სალუქვაძე ადასტურებს ინფორმაციას, რომ გუბერნიაში აღნიშნულ საკითხთან დაკავშირებით განცხადება ნამდვილად შევიდა.
ლელა ქურიძე: "ამ თემის აფიშირება არ მინდა, არ ვაკეთებ კომენტარს ამასთან დაკავშირებით. ეს ისე უნდა მოგვარდეს, რომ არ მოხდეს ამის გახმაურება, ძალიან გთხოვთ შევეშავთ ამ თემაზე საუბარს."
მაგული კონჭულია: "შენ შემოგევლე, შენი ჭირიმე რა, მაგ თემაზე არ მინდა საუბარი საერთოდ, მე ვარ საჯარო მოხელე, ჩემი ცხოვრება ისე გავატარე, რომ არ მინდა ლელა ქურიძეს რაიმე საკითხში ავყვე."
ქალბატონო მაგული ჰქონდა თუ არა თქვენი მხრიდან ზეწოლის ფაქტებს ადგილი?
რაზე მიწევს საუბარი, ეს შეიძლება იკადროს ვინმემ? ნორმალურია ახლა ეს? ეს სამარცხვინო რაღაცაა, სირცხვილია! ჯერ ერთი, პროფკავშირებში შესვლა ნებაყოფლობითია, ადამიანები კაპიკებს წირავენ იმიტომ, რომ რაღაცის იმედი აქვთ. ვინ უნდა აიძულო დღეს, რომ პურის ფული არ აქვთ, რომ სადმე გადადიო, ასეთი რამ როგორ შეიძლება? აი ახლა მე შევიტან განცხადებას შინაგან საქმეთა სამინისტროში და ვინ დარეკა მაგ ტელეფონზე ამ საკითხებთან დაკავშირებით, ეს ყველაფერი ხელის გულივით დაიდება, მე უბრალოდ ჩემს ირგვლივ აჟიოტაჟი არ მინდა. ჩვენ ვიცნობთ ერთმანეთს, მე გიცნობთ თქვენ და თქვენ მიცნობთ მე, რაც გინდათ ის დაწერეთ!
ქალბატონო მაგული, როგორც ვიცით, ამასთან დაკავშირებით წერილი გუბერნიაშიც არის შესული…
კი ბატონო, სადაც გაუხარდეს, მიჩვეულია საჩივრების წერას და გააგრძელოს, მე მზად ვარ პასუხი ვაგო, მიმართოს გუბერნიასაც , პარლამენტიდანაც დარეკონ, თუ უნდა, პრეზიდენტმაც დამირეკოს და გაარკვიოს საქმე, კი ბატონო თანახმა ვარ, როგორ მეკითხებით, ჰქონდა თუ არა ზეწოლის ფაქტებს ადგილიო, რა ზეწოლა უნდა ყოფილიყო, ოთახიდან არ გავდივარ, ტელეფონზე არ ვსაუბრობ, შეამოწმეთ ჩემი სატელეფონო საუბრები და მერე შემეკითხეთ. სირცხვილი არაა, 60 წლის ქალს ამ თემაზე მელაპარაკოთ? როგორ შეიძლება ზეწოლა რაიმე საკითზე? ეს ხომ პოლიტიკური პარტია არაა, ჩემი პროფკავშირებიც მას ჰქონდეს"_ ამბობს აპარატის უფროსი.
გია სალუქვაძე, გურიის გუბერნატორი: "გურიის გუბერნიაში ნამდვილად არის შემოსული ქალბატონი ქურიძის განცხადება, ის არის განათლების პროფკავშირების ხელმძღვანელი, მან აღნიშნა, რომ გამგეობის აპარატის უფროსი მასზე ახდენს ზეწოლას და ასევე ბაღების თანამშრომლებზე, რომ გადავიდნენ საჯარო მოსამსახურეთა ე.წ. "პროფკავშირევში" , ეს განცხადება შემოვიდა 2 დღის წინ გუბერნიაში, ახლა სამსახურში არ ვიმყოფები, სტიქიასთან დაკავშირებით გზაში ვარ და უფრო დაზუსტებული ინფორმაცია შემიძლია მოგაწოდოთ მაშინ, როცა სამსახურში ვიქნები, ისე გიდასტურებთ ნამდვილად შემოვიდა ასეთი განცახდება“
