სოციალურ ქსელში ჩოჩხათის მაცხოვრებელმა ელენე გურგენაძემ საკუთარ საცხოვრებელ ადგილთან მისასვლელი გზის ერთი მონაკვეთის ფოტო გამოაქვეყნა, რომელიც ლანჩხუთის მუნიციპალიტეტში ბოლო დღეებში მომხდარ სტიქიურ მოვლენებს ნათლად ასახავს.
გასაგებია, დაზიანებული გზის მონაკვეთი შეიძლება არავის უკვირდეს, მაგრამ აქ სულ სხვა პრობლემასან გვაქვს საქმე. ეს ადგილი ჩოჩხათის ადმინისტრაციის ცენტრიდან 700-800 მეტრში მდებარეობს და ამ უბანს "მთავარმოწამეს" ეძახიან. როგორც ადგილობრივებთან საუბრისას ირკვევა, წლებია მოსახლეობა გზის ამ მონაკვეთის მდგომარეობით შეწუხებულია, თუმცა პრობლემის მოგვარება ვერანაირად ვერ მოხერხდა.
"ყველა წელიწადს ხრეშავენ ამ გზას, წელსაც დაყარეს რამდენიმე მანქანა ხრეში, მაგრამ რად გინდა, მოვა წვიმა და ერთიანად მიაქვს ყველაფერი. ნუთუ წყალს უნდა გავატანოთ თანხა, რომელიც აქ იხარჯება. ამას ჯობია, ერთხელ და სამუდამოდ კაპიტალურად გაკთდეს, უბრალოდ კვლები გაკეთდეს და შემდეგ მოიხრეშოს. რა შეუძლებელი გახდა ამის გაკეთება?!"
მოსახლეობის ამ პოზიციას არ იზიარებს ჩოჩხათის ადმინისტრაციული ერთეულის მაჟორიტარი ალეკო სარიშვილი, რომელიც გზის დაზიანების მიზეზად მეწყერულ პროცესებს მიიჩნევს.
"აქ პრობლემა მეწყერული პროცესებია და სამწუხაროდ, ამას ვერ გავექცევით. კვალი და მოხრეშვა არაფერ შუაშია. აქ მიწა მოულოდნელად რამდენიმე მეტრით ქვევით ჩავარდა, რაც მეწყერის ბრალია და არა სხვა რამის",- ამბობს სარიშვილი.
მისივე თქმით, შესაბამისი ტექნიკა დღესვე ადგილზე იქნება და აღნიშნულ გზის მონაკვეთზე აღდგენითი სამუშაოები დაიწყება- "ტექნიკას ველოდებით, მალე ამ ადგილზე სამუშაოებს დაიწყებენ და გზაც აღდგება, მაგრამ, რადგან მეწყერსაშიში ზონაა, ძნელი სათქმელია რამდენად ეფექტური იქნება ეს ყველაფერი გზის შემდგომი ფუნქციონირებისთვის".
