ცენტრალური საარჩევნო კომისიის შტატიან და შტატგარეშე თანამშრომლებზე 2014 წლის აპრილ-ივლისში 1 803 500 ლარის დანამატია გაცემული.
ამის შესახებ ცესკოს ფინანსური აუდიტის ანგარიშშია აღნიშნული, რომელიც სახელმწიფო აუდიტის სამსახურმა გამოაქვეყნა.
აუდიტის ანგარიშის მიხედვით, ცესკოს თავმჯდომარის ბრძანებების საფუძველზე როგორც ცესკოს შტატით გათვალისწინებულ თანამშრომლებზე, აგრეთვე შტატგარეშე თანამშრომლებზე 2014 წლის აპრილ-ივლისში 9-ჯერ, (მათ შორის ივნისსა და ივლისში სამ-სამჯერ), ხოლო საოლქო კომისიის წევრებზე დანამატი ერთხელ არის გაცემული.
„სულ დანამატის სახით გაცემულმა თანხამ 1,803.5 ათასი ლარი შეადგინა. 2014 წლის განმავლობაში ცესკოს თავმჯდომარეზე, თავმჯდომარის მოადგილეზე, მდივანზე, ცესკოს მოქმედ და ყოფილ წევრებზე, განყოფილების უფროსებზე (სულ 35 კაცი) შრომის ანაზღაურების მუხლით გაწეული ხარჯი 2,884.3 ათას ლარს შეადგენს. მათ შორის თანამდებობრივი სარგო 1,386.5 ათასი ლარი (მთლიანი ხარჯის 48.07 პროცენტი) , პრემია 615.5 ათასი ლარი (მთლიანი ხარჯის 21.34 პროცენტი) და დანამატი 882.3 ათასი ლარი (მთლიანი ხარჯის 30.59 პროცენტი)“, _ აღნიშნულია აუდიტის ანგარიშში.
რაც შეეხება ზემოაღნიშნული პირების პრემიებზე გაწეულ ხარჯს, ანგარიშის მიხედვით, ის პრემიის მუხლით გაწეული მთლიანი ხარჯის 40.4 პროცენტს, ხოლო დანამატის სახით გაწეული ხარჯი, ამ მუხლით გაწეული მთლიანი ხარჯის 47.0 პროცენტია.
„საქართველოს მთავრობის 2014 წლის 15 ივლისის N449 დადგენილების მე-2 მუხლის შესაბამისად, დადგენილების გამოქვეყნებიდან 60 დღის შემდეგ, ცესკო-ს 2014 წლის 15 სექტემბრის N44/2014 დადგენილებით დამტკიცდა საქართველოს ცენტრალური საარჩევნო ადმინისტრაციასა და სსიპ-საარჩევნო სისტემების განვითარების, რეფორმებისა და სწავლების ცენტრში პრემიების ოდენობის განსაზღვრისა და გაცემის წესი. 2014 წლის 15 სექტემბრის შემდეგ პრემიები ცესკოს თავმჯდომარეზე, თავმჯდომარის მოადგილეზე, მდივანზე, წევრებსა და აპარატის თანამშრომლებზე, ასევე ცესკოს შტატგარეშე თანამშრომლებზე სამჯერ გაიცა. კერძოდ, მე-3 და მე-4 კვარტლის პრემია, ასევე, პრემია გიორგობის დღესასწაულთან დაკავშირებით. აღნიშნული თარიღის შემდეგ ადგილი ჰქონდა შემთხვევებს რომლებიც შეიძლება განხილული იქნას როგორც პრემიების დანამატით ჩანაცვლების ფაქტები.
ასე მაგალითად, ცესკო-ს თავმჯდომარის 2014 წლის 31 ოქტომბრის N05-34 ბრძანებით ადგილობრივი თვითმმართველობის ორგანოს-საკრებულოს 2014 წლის 15 ივნისის არჩევნების მაჟორიტარული საარჩევნო სისტემით N48 ხარაგაულის საარჩევნო ოლქის N48/05 ვახანის ადგილობრივ მაჟორიტარულ საარჩევნო ოლქში გასამართი ხარაგაულის მუნიციპალიტეტის საკრებულოს შუალედური არჩევნებისათვის გაწეული საქმიანობისათვის დანამატები გაიცა ცესკოს თავმჯდომარეზე, თავმჯდომარის მოადგილეზე, მდივანზე, წევრებზე, თანამდებობრივი სარგოს 50%, ხოლო აპარატის ზოგიერთ თანამშრომელსა და შტატგარეშე მოსამსახურეებზე თანამდებობრივი სარგოს 100%-ის ოდენობით (30 კაცი, 58, 975.0 ლარი).
2014 წლის 25 დეკემბრის N05-42 ბრძანებით დანამატები, 2015-2019 წლების სტრატეგიული გეგმის პროექტის მომზადებისათვის გაწეული მუშაობისათვის, გაიცა ცესკოს წევრებსა და ზოგიერთ თანამშრომელზე (5 კაცი, 10,395.0 ლარი). 2014 წლის 25 დეკემბრის N05-43 ბრძანებით დანამატები, წლის მანძილზე გაწეული ნაყოფიერი მუშაობისათვის შრომის ანაზღაურების 50%-ის ოდენობით გაიცა ცესკოს სატენდერო კომისიის წევრებსა და კომისიის აპარატის თანამშრომლებზე (8 კაცი, 25,555.0 ლარი)“, _ აღნიშნულია აუდიტის ანგარიშში.
გარდა ამისა, სახელმწიფო აუდიტის სამსახურის მიერ გამოქვეყნებულ ანგარიშში ნათქვამია, რომ 2014 წლის 31 დეკემბრის მდგომარეობით ცესკოს ბალანსზე 16 ავტომანქანა ერიცხებოდა.
ცესკოს ბალანსზე რიცხული ავტომანქანების მიერ საწვავის ხარჯვა ხორციელდება თავმჯდომარის ბრძანებებით დადგენილი ლიმიტების შესაბამისად, რომლებიც საარჩევნო პერიოდში 50%-ით იზრდება.
ანგარიშში აღნიშნულია, რომ ცესკოს მიერ ვერ იქნა 14 წარმოდგენილი შესაფერისი და საკმარისი მტკიცებულებები დამტკიცებული ლიმიტების დასაბუთებულობის შესახებ.
