სახელმწიფო აუდიტის სამსახურის მიერ შინაგან საქმეთა სამინისტროს შემოწმების შედეგად ირკვევა, რომ 2013-2014 წლებში უწყებიდან 21 943 400 ლარის პრემია და დანამატი გაიცა. კერძოდ, შსს-მ 2014 წელს 11 991 400 ლარი, ხოლო 2013 წელს – 9 952 000 ლარის პრემია და დანამატი გასცა.
როგორც შსს-ს შესაბამისობის აუდიტის ანგარიშშია აღნიშნული, სამინისტროს ცენტრალური აპარატის 2014 წლის საწყისმა გეგმამ შრომის ანაზღაურების მუხლით შეადგინა 63 240 200 ლარი, დაზუსტებულმა გეგმამ – 50 903 000 ლარი.
"წლის განმავლობაში გაწეულია 50 860 400 ლარის საკასო ხარჯი. მათ შორის: თანამდებობრივი სარგო – 37 783 200 ლარი, წოდებრივი სარგო – 1 076 700 ლარი, პრემია – 4 315 500 ლარი, დანამატი – 7 675 900 ლარი, კომპენსაცია – 9 100 ლარი. "საჯარო დაწესებულებებში პრემიის ოდენობის განსაზღვრის წესის დამტკიცების შესახებ“ საქართველოს მთავრობის 2014 წლის 15 ივლისის N449 დადგენილების ძალაში შესვლის შემდეგ თანამდებობის პირებზე პრემიები აღარ გაცემულა (რამდენიმე გამონაკლისის გარდა). მინისტრის ბრძანებებით ზემოაღნიშნულ პირებს დანამატები დაენიშნათ", _ აღნიშნულია ანგარიშში.
რაც შეეხება სამინისტროს ცენტრალური აპარატის 2013 წლის ხარჯებს, აუდიტის ანგარიშის მიხედვით, საწყისმა გეგმამ შრომის ანაზღაურების მუხლით 41 854 600 ლარი შეადგინა, დაზუსტებულმა გეგმამ – 41 483 900 ლარი.
"წლის განმავლობაში გაწეულია 41 480 000 ლარის საკასო ხარჯი. მათ შორის: თანამდებობრივი სარგო – 30 690 500 ლარი, წოდებრივი სარგო – 830 000 ლარი, პრემია – 6 229 600 ლარი, დანამატი – 3 722 400 ლარი, კომპენსაცია – 7 500 ლარი", _ ნათქვამია შსს-ს აუდიტის შესაბამისობის ანგარიშში.
