საზოგადოებამ უკვე იცის, რომ “გურია ნიუსის” ჟურნალისტებს ოზურგეთის მუნიციპალიტეტის ადმინისტრაციულ შენობაში გადაადგილება აკრძალული აქვთ. როგორც მხარის პირველმა პირმა ვალერი ჩიტაიშვილმა, ასევე მუნიციპალიეტეტის საკრებულოს თავმჯდომარემ ალეკო მამეშვილმა და გამგებლის მოვალეობის შემსრულებელმა ილია ვაშაყმაძემ გვითხრეს, სრული უფლება გვაქვს ვისარგებლოთ მოქალაქეთა მისაღებით, სადაც განთავსებული იქნება ოზურგეთის მუნიციპალიტეტის საკრებულოსა და გამგეობის კანცელარია _ იქ გაგვცემენ ჩვენთვის ამომწურავ პასუხს.
15 მარტს, “გურია ნიუსმა” გუბერნიის კანცელარიაში საჯარო ინფორმაციის გამოთხოვა სცადა. თუმცა, ადმინისტრაციული შენობის მესამე სართულზე, სადაც გუბერნიის კანცელარია 15 მარტამდე იყო განთავსებული და იქ იმ დღეს კონტროლის პალატის წარმომადგენელები მოქალაქეებს ჰკითხავდნენ, ადმინისტრაციულ შენობაში განთავსებულმა დაცვის თანამშრომლებმა “გურია ნიუსის” ჟურნალისტებს გუბერნიის კანცელარიში ასვლა აუკრძალეს. ჩვენთვის ასევე ცნობილი ხდება, რომ 15 მარტს, დღის განმავლობაში, ამავე შენობაში სხვა ჟურნალისტები თავისუფლად გადადგილდებოდნენ.
“გურია ნიუსმა”, თავდაპირველად, მოქალაქეთა მისაღებში, საკრებულოს კანცელარიის წარმომადგენლებს თხოვნით მიმართა. მათ გვითხრეს, რომ ვერ დაგვეხმარებოდნენ, რადგან ეს მათ კომპეტენციაში არ შედიოდა. ამის შემდეგ, შესასვლელში მყოფ დაცვას მივმართეთ, რათა უზრუნველეყოთ ჩვენი გუბერნიის ადმინისტრაციაში ასვლა, რაზედაც, რა თქმა უნდა, კატეგორიული უარი მივიღეთ:
_ ვითხოვთ გუბერნიაში, კანცელარიაში შესვლას. გვინდა საჯარო ინფორმაციის გამოთხოვა. გაგვატარეთ.
_ მიბრძანდით მისაღებში, იქ სხედან.
_ აქ არ ზის სამხარეო ადმინისტრაციის წარმომადგენელი, აქ სხედან გამგეობისა და საკრებულოს წარმომადგენლები. როგორ მოვიქცეთ?
_ მიმართეთ გუბერნიის პრესსამსახურს.
_ გუბერნიას პრესსამსახური არ ჰყავს. იქნებ, აგვიხსნათ, რატომ არ გვიშვებენ შენობაში მხოლოდ “გურია ნიუსის” ჟურნალისტებს?
_ მიბრძანდით მისაღებში.
_ აქ არ არის გუბერნიის კანცელარია, წამობრძანდით და თქვენთან ერთად ვნახოთ.
_ სად წამოვბრძანდე? მე წესრიგს ვიცავ აქ.
_ ჩვენ წესრიგს ვარღვევთ?
_ მე არ მითქვამს თქვენთვის, წესრიგს არღვევთ,-მეთქი. ჩვენ ასე ვიცით, რომ აქ არის კანცელარია და ყველაფერი იმისთვის, რომ თქვენ მათ მიმართოთ, _ გვითხრა შინაგან საქმეთა სამინისტროს დაცვის პოლიციის წარმომადგენელმა გოჩა გაბედავამ, რომელმაც კიდევ ერთხელ გვასწავლა, რომ გუბერნიის პრესსამსახურისთვის მიგვემართა.
ამის შემდეგ, ჩვენ ვცადეთ გუბერნატორთან დაკავშირება, რომელმაც “გურია ნიუსის” სატელეფონო ზარს არ უპასუხა, ასევე, არ გვიპასუხა ტელეფონზე საკრებულოს კანცელარიის უფროსმა პაატა ბურჭულაძემ.
ბოლოს, როგორც იქნა, მოვახერხეთ და ტელეფონით საკრებულოს თავმჯდომარეს ალეკო მამეშვილს ვესაუბრეთ, რომელმაც გვირჩია, რომ გუბერნიის ადმინისტრაციის უფროსს დავკავშირებოდით. ჩვენც ასე მოვიქეცით და ისაკ ლომთათიძეს მივმართეთ:
_ ბატონო ისაკ, საჯარო ინფორმაციის გამოთხოვა გვჭირდება და დაგვეხმარეთ.
_ განცხადება ჩააბარეთ გუბერნიის კანცელარიაში.
_ სად ჩავაბაროთ, როცა ზევით არ გვიშვებენ?
_ გავარკვევ ახლავე და დაგიკავშირდებით, _ გვითხრა ლომთათიძემ.
ისაკ ლომთათიძესთან საუბრის შემდეგ, გუბერნატორი ვალერი თავად დაგვიკავშირდა და გვითხრა, რომ გუბერნიის კანცელარიის წარმომადგენელი, მთავარი სპეციალისტი მზია წერეთელი მოქალაქეთა მისაღებში ჩამოვიდოდა და საჯარო ინფორმაციის გამოთხოვის განცხადების ჩაბარებაშI დაგვეხმარებოდა.
ეს ასეც მოხდა და გუბერნიის კანცელარიამაც ადმინისტრაციული შენობის პირველ სართულზე, მოქალაქეთა მისაღებში, მას შემდეგ დაიდო ბინა, რაც 15 მარტს, “გურია ნიუსმა” სამხარეო ადმინისტრაციის კანცელარიას საჯარო ინფორმაციის გამოთხოვისთვის მიმართა.
