დღეს, საქართველოს ფეხბურთის ფედერაციის აღმასკომის მორიგი სხდომა გაიმართა, რომელზეც სხვა საკითხებთან ერთად კვლავ განიხილეს ლანჩხუთის "გურიასა" და მის ყოფილ მწვრთნელებთან სახელფასო დავის საკითხი.
შეგახსენებთ, რომ წინა აღმასკომის ერთ-ერთ სხდომაზე გადაწყდა, რომ " გურიას" თემურ ლორიასათვის და თენგიზ პატარაიასათვის დავალიანების გასატუმრებლად ბოლო ვადა 15 ნოემბრამდე მისცემოდა. მაშინ აღმასკომის წევრები კატეგორიულები იყვნენ და გარკვეულ სანქციებს ითხოვდნენ ლანჩხუთის კლუბის მისამართით. საუბარი იყო ქულების დაკლებაზე და საერთოდ ჩემპიონატიდან მოხსნაზეც კი.
ამ ვადის გასვლის შემდგომ, ჩვენი ინფორმაციით უშუალოდ სფფ – ს პრეზიდენტმა, ლევან კობიაშვილმა სამი დღე ითხოვა, კლუბის მესვეურებს გავესაუბრები და რაიმე გადაწყვეტილება ამის შემდეგ მივიღოთო. დღეს აღმასკომის დაწყებამდე მართლაც შედგა ეს შეხვედრა და როგორც ჩანს უშედეგოდაც.
როგორც გაირკვა, აღმასკომის ახალი შემადგენლობა წინამორბედის დარად კვლავ ერთსულოვანი იყო ამ საკითხთან მიმართებაში. კერძოდ, კლუბს 1 დეკემბრამდე მიეცა ვადა არსებული ვალდებულების გასასტუმრებლად, წინააღმდეგ შემთხვევაში მას სამი ქულა ჩამოეჭრება.
ამასვე აცხადებს საქართველოს პროფესიული ფეხბურთის ასოციაციის პრეზიდენტი, ჯაბა მუჯირიც.
"დიახ, აღმასკომმა კლუბ "გურიას" თანხის დასაფარად ბოლო შანსი კიდევ მისცა, 1 დეკემბრამდე. წინააღმდეგ შემთხვევაში კლუბს 3 ქულა დააკლდება, ხოლო თუ ამის შემდგომაც არ დააკმაყოფილებს აღმასკომის ამ მოთხოვნას, საერთოდ მოიხსნება გათამაშებიდან", _ უთხრა "გურია ნიუსს" მუჯირმა.
სფფ -ს იურისტი, კესო ჩხიკვაძე ადასტურებს ამ ინფორმაციას და დასძენს, რომ სფფ – ს ყველა სუბიექტმა უნდა იცოდეს წესდებაში რა წერია და სამოქალაქო სასამართლოში რომ არ საჩივრდება ფეხბურთის დავების ტრიბუნალის გადაწყვეტილება.
სხვათა შორის, აღმასკომზე აზრთა სხვადასხვაობა მხოლოდ დასაკლები ქულების ოდენობაზე ყოფილა. ზოგი 5 ქულის ჩამოჭრას ითხოვდა, თუმცა, გაითვალისწინეს რა კლუბის ცუდი სატურნირო სიტუაცია, სამ ქულაზე შეთანხმდნენ.
აღმასკომის გადაწყვეტილებაზე კლუბის მესვეურებმა კომენტარის გაკეთება არ ისურვეს, სამაგიეროდ, საკუთარი პოზიცია ამ საკითხთან დაკავშირებით გრფფ – ს ექსპრეზიდენტმა, კახა ებრალიძემ დააფიქსირა.
"ზაზა ურუშაძე რომ ამტკიცებდა ძველი ფედერაცია ბანდაა, ახალი ხელმძღვანელობა მოვა და ამ ვალს არ გადაგვახდევინებსო, სადაა ეს ყველაფერი? არ ყოფილა ბანდა, რადგან მაშინაც სწორ გადაწყვეტილებებს იღებდნენ და ახლაც, ახალმა აღმასკომმა წესითა და კანონით იმსჯელა. მაგრამ ამას ვერ ხვდებიან კლუბში, სადაც მართლა ბანდა შეკრიბა ურუშაძემ და ამ შევარდნაძის დროინდელმა ხალხმა არც ფეხბურთი იცის და არც კანონი. არავის უხარია ქულების დაკლება, მითუმეტეს ჩემპიონატიდან გაგდება, მაგრამ თუ ასეთი რამ მოხდა, ნურავინ ეცდება ეს ლორიას ან პატარაიას დააბრალოს და რაც ხდება ყველაფერში კლუბის ხელმძღვანელობაა პასუხისმგებელი, რომლის კაპრიზებმა დაახლოებით 200 ათასი ლარი დააკარგვინა გუნდს" – აცხადებს ებრალიძე.
უახლოეს მომავალში "გურია ნიუსი" ეცდება არსებულ სიტუაციაზე და ამ ბრალდებებზე კლუბის ხელმძღვანელთა და უშუალოდ ზაზა ურუშაძის პოზიცია შემოგთავაზოთ.
