ქალაქ ოზურგეთის მუნიციპალიტეტის სპორტის განვითარების ცენტრი, ჩოგბურთისა და სპორტსკოლის სამი ა.(ა) ი.პ. ბოლო ერთი თვეა რაც გაერთიანდა ერთი ა(ა) ი.პ. -ის, სპორტის განვითარების ცენტრის ქვეშ მოექცა. ახალი ა(ა) ი.პ. დირექტორად ქალაქ ოზურგეთის მერმა ბეგლარ სიორიძემ გოჩა კვანტალიანი დანიშნა. რეორგანიზაციის შედეგად შტატებიც გაუქმდა და კვანტალიანის თქმით, 8 თანამშრომელი შემცირებაში მოჰყვა. თუმცა მისივე განცხადებით, ოფიციალურად ჯერჯერობით არცერთი თანამშრომელი გათავისუფლებული არ არის. შემცირებაში მოყვნენ ოლიმპიური კომიტეტის წევრები, სპორტსმენები, მსოფლიო და ევროპის პრიზიორები, სპორტის განვითარების ცენტრის მთავარი სპეციალისტები, რევაზ ჭელიძე და რევაზ ლომაძეც.
გათავისუფლებული სპორტსმენები და გურიის ოლიმპიური კომიტეტის პრეზიდენტი ლაშა ლომაძე აღნიშნულ საკითს ქალაქ ოზურგეთის მერის ბეგლარ სიორიძის მხრიდან მათ მიმართ ანგარისწორებად აფასებენ და აცხადებენ, რომ ამასთან დაკავშირებით უამრავი კითხვა გააჩნიათ.
სპორტის განვითარების ცენტრის დირექტორი გოჩა კვანტალიანი ამბობს, რომ რეორგანიზაციის შედეგად გაუქმდა შტატები და აღნიშნული პიროვნებები შემცირებაში მოჰყვენ, ქალაქ ოზურგეთის მერი კი "გურია ნიუსთან" აცხადებს, რომ მან არ იცის ვინ გათავისუფლდა სამსახურიდან.
ლაშა ლომაძე, გურიის ოლიმპიური კომიტეტის პრეზიდენტი : " ჩემი მეგობრები რევაზ ჭელიძე და რევაზ ლომაძე წამყვანი ფიგურები იყვნენ სპორტში და მე ვერ ვხვდები მათი სამსახურიდან გაშვების შემდეგ ვინ უნდა მოიყვანონ. მოჰყავთ ისეთი ადამიანები, რომლებსაც სპორტთან შეხება არ ჰქონიათ არასდროს, საერთოდ გაურკვეველია ამ ადამიანების გაათავისუფლების მიზეზი. ამასთან დაკავშირებით კითხვები გვაქვს , მსოფლიო და ევროპის პრიზიორებს რომ დაატოვებინებ საყვარელ საქმიანობას, ამის მიზეზი უნდა არსებობდეს, ალბათ გაეცემა პასუხი ამ კითხვებს, ჩვენ ასე არ გავჩერდებით."
რევაზ ჭელიძე, ოზურგეთს სპორტის განვითარების ცენტრის კონსულტანტი, გურიის ნაკრების მწვრთნელი, შეკრებების ხელმძღვანელი, მსოფლიო და ევროპის პრიზიორი ჭიდაობაში:
"გაგვათავისუფლეს მე და რეზო ლომაძე, ჩემთვის პირადად გაუგებარია, რატომ მოხდა ეს ყველაფერი. იყო პერიოდი, როდესაც არსად არ ვმუშაობდი, არც შტატში არ ვყოფილვარ, მაგრამ ჩვენ მაინც ვაკეთებდით ოზურგეთისთვის სასიკეთო საქმეებს, რაიონის ხელმძღვანელობასთან ერთად ვავითარებდით სპორტულ მიღწევებს.
თუ ვინმეს ჰგონია, რომ თუ გაგვათავისუფლეს სამსახურიდან, ჩვენ ჩვენს სიტყვას აღარ ვიტყვით, ძალიან ცდება. ეს იყო სულელური გადაწყვეტილება პირველ რიგში. ჩემი ფუნქცია თავიდან ბოლომდე იცოდა ყველამ, მე ძირითადად თბილისში ვარ, აქ ჩამოდის ბევრი ოზურგეთელი სპორტსმენი, მათ დაკვალიანება და გვერდში დგომა სჭირდებათ, მე მათ გვერდით ვიყავი და დღესაც ვიქნები, მაგრამ გადაწყვიტა ბატონმა ბეგლარმა რომ გავეთავისუფლებინე სამსახურიდან რაღაცა სხვა მოსაზრებების გამო, იმ აზრების გამო, რომელიც მის აზრებს არ დაემთხვა, ასეთი გადაწყვეტილება მიიღო."
– ბატონო რევაზ, თქვენი სამსახურიდან გათავისუფლებას, ბოლო დროს ოლიმპიურ სახლთან დაკავშირებით თქვენი მხრიდან გაკეთებულ ხმამამაღალ განცხადებებს ხომ არ უკავშირდებთ?
– გეტყვით რას ვუკავშირებთ: გვქონდა შეხვედრა ბატონ ბეგლართან , მოგვიწვია სპორტის განვითარების თანამშრომლებთან ერთად, იყო საუბარი ოლიმპიურ სახლთან დაკავშირებით, სადაც ჩვენ ჩვენი პოზიცია ხმამაღლა და ღიად დავაფიქსირეთ, არანაირი შეფარვა არ ყოფილა, რაც არ ესიამოვნა ბატონ ბეგლარს და მიიღო ასეთი გადაწყვეტილება, რომელსაც რა დავარქვა არ ვიცი, ალბათ ეს იყო ანგარისშწორება. ამასთან დაკავშირებით კითხვებს დავსვამთ, ეხლა ვარ თბილისში და ვაპირებ ჩამოსვლას, გვაინტერესებს რა გახდა მიზეზი ჩემი გათავისუფლების, ამაზე პასუხი არ გვაქვს, ასე უმიზეზოდ გაგვიშვეს სამსახურიდან. ჩვენს მაგივრად კი ფაქტიურად არცერთი თანამშრომელი არ დარჩა სპორტმენი, ასე სპორტული ცხოვრება წინ ვერ წავა, ეს არის ანგარისშწორება, სხვა სახელი არ შეიძლება ამას დავარქვა. "_ ამბობს რევაზ ჭელიძე.
სპორტის განვითარების მთავარი სპეციალისტი რეზო ლომაძე, მის სამსახურიდან გათავისუფლებას ასე ხსნის:
"სამსახურიდან რატომ გაგვათავისუფლეს არ ვიცი, ხელშეკრულება დაგვიმთავრდა და ალბათ ეს იყო მიზეზი, შეიძლება გაგვიგრძელონ, სიმართლე გითხრათ, მე თვითონაც არ ვიცი რა მოხდა, წინაწარ გვქონდა ჩვენ მოსალოდნელი გათავისუფლებაზე ხელი მოწერილი"_ ამბობს ლომაძე.
ქალაქ ოზურგეთის მუნიციპალიტეტის სპორტის განვითარების ცენტრის დირექტორი გოჩა კვანტალიანი აღნიშნულ თანამდებობაზე, მისივე თქმით 3 ნოემბერს დაინიშნა. თანამშრომლების გათავისუფლებას კი სამი ა.(ა)ი.პ. გაერთიანებას და მიმდინარე რეორგანიზაციას უკავშირებს:
"სულ რვა თანამშრომელია გათავისუფლებული, შტატები გაუქმდა, გაერთიანდა სამი ა.(ა)ი.პ: სპორტის განვითარების ცენტრი, ჩოგბურთისა და სპორტსკოლის. ეს ადამიანები მოყვნენ შემცირებაში, მოხდა რეორგანიზაცია, ეს იყო და ეს, სხვა მიზეზი არ არის. მე ვიცი, რომ ისინი კომპენსაციას მიიღებენ. რეორგანიზაცია კვლავ მიმდინარეობს, ახალი თანამშრომლების მიმართ ხელშეკრულებების გაგრძელებაზე ბრძანებებიც არ დაწერილა ჯერ, შესაბამისად, აღნიშნული პიროვნებების გათავისუფლების შესახებ ოფიციალური ბრძანებები არ არსებობს. რეორგანიზაციის დასრულების შემდეგ, ყველა კითხვას ამომწურავად გავცემ პასუხს."_ ამბობს კვანტალიანი.
ქალაქ ოზურგეთის მერი ბეგლარ სიორიძე ამბობს, რომ აღნიშნული პიროვნებების გათავისუფლებასთან დაკავშირებით ინფორმაციას არ ფლობს:
" არც კი ვიცი ვინ გათავისუფლდა, მე დავნიშნე ა.(ა) ი.პ. სპორტის განვითარების ცენტრის დირექტორი , დანარჩენი მისი გადასაწყვეტია. დავუძახებ აიპს ხელმძღვანელს და მასთან ერთად დეტალურად გავივლი ამ საკითხს, წარმოუდგენელია გაეშვათ სამსახურიდან ევროპის პრიზიორები და მათ ნაცვლად არაპროფესიონალები დაენიშნათ. არანაირი ანგარისშოწორება არ ხდება, აიპის დირექტორი დაასრულებს რეორგანიზაციას და კონკრეტული პასუხი ამის შემდეგ მეცოდინება" _ ამბობს სიორიძე.
