“უნდა მივაღწიოთ ვარშავის სამიტზე, საქართველოს გზა ნატოსკენ იყოს თავისუფალი” – ხიდაშელი

საქართველოს თავდაცვის მინისტრმა ტელეკომპანია "იმედის" გადაცემა "ქრონიკის სტუდიის" შეკითხვებს ბერლინიდან უპასუხა, სადაც ის ოფიციალური ვიზიტით იმყოფება. თინათინ ხიდაშელი ვიზიტის ფარგლებში გერმანელ კოლეგას, ასევე, ქვეყნის აღმასრულებელი და საკანონმდებლო ორგანოს წარმომადგენლებს შეხვდა.

"ბერლინი საქართველოს მეგობარია, გერმანია საქართველოს პარტნიორია. ეს არის ქვეყანა, რომელიც მზად არის, რომ ჩვენ გვერდით იდგეს ნებისმიერი ტიპის პრობლემის მოგვარების დროს. ჩვენ ვიცით, რომ არ არის ერთიანი პოზიციები ნატოს წევრ ქვეყნებს შორის და ამიტომ ჩვენი იმედები ნატოს ვარშავის სამიტს უკავშირდება. პირველივე დღიდან, სწორედ, სამიტისთვის ვმუშაობთ, ბევრი რამ, რასაც ჩვენ ველოდებით ამ სამიტზე უნდა გადაწყდეს, რადგან დეკემბრის მინისტერიალი ამგვარ გადაწყვეტილებებს, უბრალოდ, ვერ მიიღებს", – განაცხადა თინათინ ხიდაშელმა.

თავდაცვის მინისტრმა სატელევიზო ჩართვისას აღნიშნა, რომ საქართველოს მთავრი მიზანი ნატოს წევრობის გზაზე დადგომაა.

"საქართველოს არ სურს, იყოს ნატოს წევრი სახელმწიფოების აზრთა სხვადასხვაობის მიზეზი. საქართველო არ ითხოვს მაპს (MAP). მაპი არ არის ჩვენი თვითმიზანი. მთავარია საქართველო წევრობის გზაზე დადგეს. ამის რეალური შანსი არსებობს. 1 დეკემბერს საგარეო საქმეთა მინისტერიალზე მიღებული დოკუმენტი, რომელსაც ჩვენ ყველანი ერთად ვნახავთ, ძალიან ოპტიმისტური იქნება და ვარშავის სამიტისკენ გაგვიხსნის გზას."

თინათინ ხიდაშელის განცხადებით, არსებითი პაკეტი,  ამ პაკეტით გათვალისწინებული პრიორიტეტები, რომლებიც აძლიერებს საქართველოს თავდაცვისუნარიანობას და ყოველწლიური სამოქმედო გეგმა, სრულიად საკმარისია იმისთვის, რომ საქართველო ნატოს წევრობის გზაზე გაწევრიანების სამოქმედო გეგმის გარეშეც დადგეს.

"ჩვენ უნდა მივაღწიოთ ვარშავის სამიტზე, რომ საქართველოს გზა ნატოსკენ იყოს თავისუფალი, ყოველგვარი შუალედური ბარიერების გარეშე. 1 დეკემბერს საგარეო საქმეთა მინისტერიალზე საქართველოს მიწვევა, გარკვეული პროცედურების გამო, უბრალოდ, ვერ მოხერხდებოდა."

თავდაცვის მინისტრი დარწმუნებულია, რომ მინისტერიალზე შემუშავებულ დოკუმენტში აისახება, რომ გაწევრიანებასთან დაკავშირებული ინსტრუმენტები, რომელიც საქართველოს უკვე გააჩნია, თავსებადი და საკმარისია ნატოს წევრობისთვის. თავდაცვის მინისტრის განცხადებით, ეს მოხდება პირველად და იქნება დიდი შუალედური პროგრესი ვარშავის სამიტის გზაზე.