მამუკა იოსავა _ საქართველოს ეროვნული გვარდიის დეპარტამენტის უფროსი, ერთ-ერთი მათგანია იმ ჩამოთვლილთაგან, ვისაც ირაკლი ალასანია შეიარაღებული ფორმირებების შექმნასა და დაფინანსებაში ადანაშაულებს.
“არავისთვის არ არის დასამალი, რომ ჩემს მშობლიურ კუთხეში, სამეგრელოში აბსოლუტურ ძალაუფლებას ფლობს ახალაიების კლანი. როლანდ ახალაია, არის რეგიონის პროკურორი, მისი ერთ-ერთი ვაჟი ვაჟი აკონტროლებს თავდაცვის სამინისტროს შეიარაღებულ ძალებს, მეორე ვაჟი _ შინაგან საქმეთა სამინისტროს ქვედანაყოფებს. სწორედ მათ დაავალა მიხეილ სააკაშვილმა ამგვარი შეიარაღებული ფორმირებების ჩამოყალიბება. თავად ახალაიებმა კონკრეტული დავალებები მისცეს რომან შამათავას, ნუგზარ ფანგანს, სერგო უბილავას, ფრიდონ შენგელიას, თორნიკე მალაზონიას, კობა თოდუას, მამუკა იოსავას, ზაზა ჯანჯღავას, ზვიად გაგუას და დავით დარსმელიძეს. ეს ის პიროვნებები არიან, რომლებიც წარმოადგენენ სხვადასხვა სამართალდამცავ სტრუქტურებს და ისინი აკონტროლებენ, აირაღებენ და აფინანსებენ ამ შეიარაღებულ ფორმირებებს”, _ განაცხადა დღეს გამართულ ბრიფინგზე “თავისუფალი დემოკრატების” ლიდერმა ირაკლი ალასანიამ.
ირაკლი ალასანიას ჩამონათვალში მოხვდა საქართველოს ეროვნული გვარდიის დეპარტამენტის უფროსი, მამუკა იოსავა. იგი ამ თანამდებობაზე ერთი თვის წინ დაინიშნა. ის სამხედრო წოდებით პოლკოვნიკი გახლავთ.
ბიოგრაფიული მონაცემების მიხედვით, მამუკა იოსავა საქართველოს უშიშროების აკადემიის კურსდამთავრებულია.
სამხედრო სავალდებულო სამსახური 1984-1986 წლებში გაირა; 1994-2005 წლებში მუშაობდა საქართველოს უშიშროების სამინისტროში; 2005-2009 წლებში კი საქართველოს შინაგან საქმეთა სამინისტროში.
მისი კარიერა თავდაცვის სამინისტროში 2009 წელს დაიწყო. 2009–2010 წლებში მამუკა იოსავა იყო სამხედრო დაზვერვის დეპარტამენტის უფროსის მოადგილე. მოგვიანებით დააწინაურეს და 2010-2011 წლებში სამხედრო დაზვერვის დეპარტამენტის უფროსად დაინიშნა; 2011 წელს, სამხედრო თავდაცვის სამინისტროშივე გადაიყვანეს პოლიციის დეპარტამენტის უფროსის მოადგილედ; 2011 წელს ეროვნული გვარდიის დეპარტამენტის უფროსის პირველ მოადგილედ დაინიშნა საქართველოს შეიარაღებული ძალების გაერთიანებულ შტაბში.
დღეის მდგომარეობით იოსავა ამავე შტაბის უფროსი გახლავთ.
პოლკოვნიკი მამუკა იოსავა არა ერთი ჯილდოს მფლობელია _ 2005 წელს ის ღირსების მედალით დააჯილდოვეს, 2006 წელს კი _ მხედრული მამაცობისთვის. 2010 წელს მას სამი მედალი აქვს მიღებული: უწყებრივი მედალი “ქაქუცა ჩოლოყაშვილი“; “ღირსების ორდენი” და მედალი “სამშობლოსათვის თავდადებული”.
ირაკლი ალასანიას განცხადების იმ ნაწილს, რომელიც ბრალდებებს უკავშირდებოდა, მყისიერად გამოეხმაურა ამერიკის შეერთებული შტატების ელჩი ჯონ ბასი:
“ნებისმიერი ბრალდება, რომელიც კეთდება წინასაარჩევნოდ და უკავშირდება ძალადობის გამოყენების შესაძლებლობას ან მის წინასწარმეტყველებას, საჭიროებს ყურადღების მიქცევას”, _ ამის შესახებ შეერთებული შტატების ელჩმა, ჯონ ბასმა ჟურნალისტებს ირაკლი ალასანიას განცხადების კომენტირებისას განუცხადა.
“ჩვენ ყველა მხარესთან ნათლად ხაზგასმით აღვნიშნეთ, რომ არ არის ძალადობის ადგილი კონკურენტულ საარჩევნო ციკლში, დემოკრატიულ საზოგადოებაში და ყველა მხარემ უნდა უზრუნველყოს ისეთი ნაბიჯების გადადგმა, რათა თავიდან ავიცილოთ ისეთი პროცესები, რომელმაც შეიძლება გამოიწვიოს ძალადობრივი გარემოს შექმნა. მოვუწოდებ ყველა მხარეს, პასუხისმგებლობით მოეკიდონ ამ საკითხს, რაც გულისხმობს, რომ არ ისაუბრონ ისეთი ბრალდებებზე, რომლებიც არ იქნება ფართო საზოგადოებისთვის ხელმისაწვდომი ფაქტებით გამყარებული, _ თქვა ჯონ ბასმა.
“გურია ნიუსი” ირაკლი ალასანიას მიერ მამუკა იოსავაზე გაკეთებულ განცხადებასთან დაკავშირებით თავდაცვის სამინისტროს საზოგადოებასთან ურთიერთობის სამსახურის უფროსს, სალომე მახარაძეს დაუკავშირდა.
_ ირაკლი ალასანიამ დღევანდელ ბრიფინგზე განაცხადა, რომ იქმნება გაურკვეველი ტიპის შეიარაღებული ფორმირებები. რა კომენტარს გააკეთებდით ამის შესახებ?
_ მე არ მაინტერესებს, ვინ რა თქვა. ის, რაც ზუსტად ვიცი და ვხედავ, ის არის, რომ გეგმის მიხედვით კეთდება რეზერვი. ალასანიას აბსურდის დეტალები არ მაინტერესებს.
_ ალასანიას მიერ სხვა ჩამოთვლილ პირთა შორის, რომელთაც, ოპოზიციონერის თქმით, კავშირი აქვთ შეიარაღებულ ფორმირებებთან, ნახსენები იყო ეროვნული გვარდიის დეპარტამენტის უფროსი, მამუკა იოსავაც.
_ არავითარ ფორმირებებთან არ არის კავშირში მამუკა იოსავა, არავითარი კავშირი არ აქვს მსგავს ფორმირებებთან. ის მუშაობს და თავის სამსახურს ასრულებს. და საერთოდ, მე არ ვიცი, საქართველოში თუ არის რაიმე ფორმირებები. დანამდვილებით მხოლოდ ის შემიძლია გითხრათ, რომ მამუკა იოსავა ასრულებს თავის თანამდებობრივ მოვალეობას. ის არის ეროვნული გვარდიის დეპარტამენტის უფროსი, მას ეხება რეზერვის მომზადება.
_ ალასანიამ განაცხადა, რომ უშიშროების საბჭოს კონკრეტულ ფაქტებს გადასცემს.
_ თქმა არ ნიშნავს ფაქტების და მტკიცებულებების დადებას. აქტი და მტკიცებულება ნიშნავს იმას, რომ რაღაცა თვალნათელია და არის რეალური ფაქტი. თუ მასეთ ფაქტებს დადებენ, დამირეკეთ და აუცილებლად გაგიკეთებთ მაგაზეც კომენტარს.
