28 ნოემბერს სტიქიამ კურორტ ბახმაროს შეუტია _ როგორც ჩვენთან საუბრისას ა(ა)იპ "ბახმაროს" დირექტორმა დავით საჯაიამ აღნიშნა, ქარიშხალმა კურორტზე ხეები მოგლიჯა და სახლები დააზიანა:
_ 50-ზე მეტი სახლია დანგრეული. სახურავებია ახდილი. დაზიანდა სასტუმროს შენობის ნაწილი. ზარალი საკმაოდ დიდია, _ გვითხრა საჯაიამ.
საჯაიას ინფორმაციით, განსაკუთრებით დაზარალდა ვაკიჯვრის, ინგოროყვას და სატყეოს ქუჩაზე მცხოვრები მოსახლეობა.
საჯაია, 28 ნოემბერს, ჩვენთან საუბრისას ამბობდა, რომ გზა 30 ნოემბერს გაიწმინდებოდა და დაზარალებულებს საკუთარი ქონების ნახვა შეეძლებოდათ, თუმცა, როგორც გვითხრეს, ბახმაროში შესასვლელი გზა ამ დრომდე არ გაწმენდილა:
_ იმის საშუალებაც არ გვაქვს, რომ ავიდეთ და ვნახოთ, რა მდგომარეობაა. თუ რაიმეს გადარჩენაა შესაძლებელი, გადავარჩინოთ. ვიცით, რომ ბევრი სახლია დანგრეული, ზოგი _ ნახევრად, ზოგი _ მთლიანად. არ ვიცით, რა უნდა ვქნათ. სახურავახდილ სახლებში წყალი ჩადის და პატრონი არავინ ჰყავს. გურიას და ჩოხატაურს კი ისეთი ხელისუფლება ჰყავს, რომ დახმარების მაგივრად ხელს გვიშლის _ ხუთი დღეა გზის გაწმენდა ვერ მოახერხეს, _ აღნიშნეს "გურია ნიუსთან" საუბრისას ბახმაროში არსებული კოტეჯების მეპატრონეებმა.
დავით საჯაია ამბობს, რომ გზის გაწმენდას ხელს უამინდობა უშლის. თუმცა, ჩვენი წყარო ამტკიცებს, რომ ამის მიზეზი ტექნიკის არქონაა:
_ ტექნიკა არ ჰყავთ და ვერ წმენდენ. გუბერნიას ჰყავდა ისეთი ტრაქტორი, რომელსაც გზის გაწმენდა შეეძლო რთულ პირობებში. ეს ტრაქტორი გია სალუქვაძემ ქალაქ ოზურგეთის მერიას გადასცა, რომელსაც სამტრედიაში ჰყავს გაქირავებული და მისი გამოყენება ამიტომ ვერ ხერხდება, _ ამბობს ჩვენი წყარო.
ამ ინფორმაციას კატეგორიულად უარყოფს დავით საჯაია და გურიის გუბერნატორი.
_ ტექნიკა იყო ასული და გზის ერთ კილომეტრზე მეტი ვერ გაწმინდა გზა. ამიტომ ლაფეტით აგვყავს უფრო ძლიერი ტექნიკა. ამავდროულად საკმაოდ ცუდი ამინდის პროგნოზია უახლოეს დღეებში გამოცხადებული, _ აღნიშნა ჩვენთან საუბრისას გია სალუქვაძემ.
_ ბატონო გია, როგორც გვითხრეს, ერთადერთი ტექნიკა, რომელსაც ბახმაროში გზის გაწმენდა შეეძლო, თქვენ ქალაქის მერიას გადაეცით, რომელმაც ის გააქირავა…
_ დღეს მქონდა შეხვედრა კურორტის დირექტორთან და მუნიციპალიტეტის გამგებელთან. ტექნიკის აყვანის საკითხი გადაწყდა და ლაფეტით აიყვანენ. დანარჩენი გამგებელმა დაწვრილებით იცის, _ ამბობს გურიის გუბერნატორი.
ჩოხატაურის მუნიციპალიტეტის გამგებლის, ირაკლი კუჭავას თქმით, გზის გაწმენდა ძლიერი თოვის გამო ვერ ხერხდება:
_ თოვა გაგრძელდა და ახლა გზის გაწმენდა წყალში ფულის გადაყრაა. როგორც ვიცით, ორი დღე კიდევ ითოვებს.
_ მანამდე სახლები სახურავახდილი უნდა იყოს?
_ რა გავაკეთოთ ახლა? გუშინ გაიწმინდა მხოლოდ ასოცი მეტრი.
_ როგორც გვეუბნებიან, გზის გაუწმენდაობა შესაბამისი ტექნიკის არარსებობის ბრალია…
_ "კამაცუა" ერთი, რომელიც წმენდს.
_ ეს ის "კამაცუა", რომელიც გუბერნიამ მერიას გადასცა და ახლა გაქირავებულია?
_ კი, ჩვენ არ გვყავს. როცა გამოვა ამინდი, ვეცდებით არსებული ტექნიკით გავიყვანოთ გზა და ავიდეთ ბახმაროში, _ გვითხრა კუჭავამ.
ქალაქ ოზურგეთის მერის ბეგლარ სიორიძის თქმით, მისთვის ტრაქტორი არავის უთხოვია:
_ გაქირავების შესახებ ხელშეკრულება გაფორმებულია, თუმცა, ჯერ არ წაუყვანიათ და შესაბამისად, ტრაქტორი ოზურგეთშია. გარდა ამისა, თუკი სტიქიის გამო მისი საჭიროება იქნება, არცერთ მუნიციპალიტეტს პრობლემა არ შეექმნება. ჩვენთვის ტრაქტორი არავის მოუთხოვია. როგორც ვიცი, ბახმაროში თოვს და დღეს, ხვალ და ზეგ ტრაქტორი არ სჭირდებათ, _ აღნიშნა ჩვენთან საუბრისას სიორიძემ.
