ჩოხატაურის მუნიციპალიტეტის სოფელ ზოტში თოვლი საფარი, თითქმის, ნახევარი მეტრია. როგორც ზოტელებმა გვითხრეს, ორი დღეა, არც გზა აქვთ და არც _ შუქი:
_ ასე გვგონია, მიტოვებულ კუნძულზე ვცხოვრობთ. დიდი თოვლი უცხო არ არის ჩვენთვის, მაგრამ უკვე მეორე დღეა, ტრანსპორტი ვერ მოძრაობს. ამას უშუქობაც ემატება და აღარ ვიცით, რა გავაკეთოთ. ხელისუფლება პრობლემების მოგვარებას გვპირდება და ჩვენც მოლოდინის რეჟიმში ვართ, _ აღნიშნეს "გურია ნიუსთან" სატელეფონო საუბრისას ზოტელებმა.
"ენერგო პრო ჯორჯიას" ჩოხატაურის სერვისცენტრის ხელმძღვანელის, ვანო ჭარბაძის თქმით, ელექტროენერგიის გათიშვა სტიქიამ გამოიწვია:
_ თოვლმა ხაზი გაწყვიტა და, შესაბამისად, ვერ ვაწოდებთ ელექტროენერგიას. ჩვენი თანამშრომლები ორი დღეა მუშაობენ. გზა არ არის და კვალი, ფეხით უწევთ სიარული, _ გვითხრა ჭარბაძემ.
ჩოხატაურის მუნიციპალიტეტის გამგებლის, ირაკლი კუჭავას თქმით, გზის გაწმენდა მალე დაიწყება:
_ საწვავი გუშინვე აიტანეს სოფელში და ტექნიკის პრობლემაც არ ყოფილა. როგორც მითხრეს, გუშინ არ იყო გზის გაწმენდის საჭიროება. ახლა იწყებენ გზის გაწმენდის სამუშაოებს, _ გვითხრა კუჭავამ და დეტალების გასარკევად ჩოხატაურის მუნიციპალიტეტის გამგეობის მიერ დაფუძნებული შპს "ჩოხატაურის ავტოსერვისცენტრის" ხელმძღვანელთან გადაგავმისამართა.
გამგებლის თქმით, "ჩოხატაურის ავტოსერვისცენტრმა" ტენდერში გაიმარჯვა და გზების გაწმენდა სწორედ მას ევალება.
ცენტრის დირექტორის, ერეკლე მრელაშვილის თქმით, ზოტში გათოლვითი სამშაოები ამ დილით დაიწყო:
_ გუშინ, საღამოს 6 საათისთვის დამირეკა რწმუნებულმა და მითხრა, რომ პრობლემა იყო. შევთანხმდით, რომ დღეს, ადრიანად წავიდოდა ტრაქტორი და დაიწყებოდა მუშაობა, რაც მოხდა კიდეც. ჩვენ სოფლის რწმუნებულებზე ვართ დამოკიდებული. თუ არ დაგვირეკეს და არ გვითხრეს, რომ პრობლემა აქვთ, ვერ დავუწყებთ ყველა მათგანს დარეკვას, _ აღნიშნა ჩვენთან საურბისას მრელაშვილმა.
იხილეთ ასევე: "ეს არის ისლამის და მუსულმანური მოსახლეობის შეურაცხყოფა"
