“ვერც დაგიდასტურებთ და ვერც უარვყოფთ!”

როდესაც თქვენ ამ სტატიას წაიკითხავთ, ალბათ, უკვე გეცოდინებათ, დააპატიმრეს თუ არა გარემოს დაცვის სამინისტროს სატყეო დეპარტამენტის ხელმძღვანელი, მაგრამ ახლა, პარასკევს, მე მხოლოდ ის ვიცი, რაც ქართულმა საინფორმაციო სააგენტოებმა და რადიოარხებმა გადმოსცეს: სატყეო დეპარტამენტი და სამინისტრო “არც ადასტურებენ და არც უარყოფენ” ცნობას პაპუნა ხაჩიძის დაკავების შესახებ.
როგორც ამ ინფორმაციებშია ნათქვამი, მისი დანაშაული ტყეების იჯარით გაცემაში არსებულ კორუფციასა და ტყეში გაჩენილ ხანძრებს უკავშირდება.
ბოროტი არ ვარ და სულაც არ მიხარია ვინმეს, მით უმეტეს ახალგაზრდა კაცის ციხეში ჩასმა და ღმერთმა ქნას, ეს ინფორმაცია არ დადასტურდეს, მაგრამ ახლა სხვა რამე მაინტერესებს: კი, ბატონო, შეიძლება არც ძმაა და არც ბიძაშვილი (ესეც არ ვიცი, იქნებ, არის კიდეც?!), მაგრამ ქართველ კაცს უბრალო მოგვარეც რომ ურჩევნია სხვას, ეს ხომ ყველამ ვიცით და ეტყობა, მართლა ისეთი ამბავი იყო იმ სატყეო დეპარტამენტში, რომ ვერც მინისტრის ხაჩიძეობამ უშველა ამ კაცს.
საერთოდ რას ნიშნავს ეს _ “არც ადასტურებს და არც უარყოფს”?!
ამ ბოლო დროს ძალიან მოხშირდა ეს ფორმულირება. შე “კეთილდალოცვილო”, ამხელა დეპარტამენტის დირექტორია, ბოლოს და ბოლოს, სამსახურში რომ არ მოვიდა, არ უნდა იკითხო, სად არის? იქნებ, ლიფტში გაიჭედა, ან გრიპი აქვს, ან ბენზინი გაუთავდა?! მთელი ინტერნეტი რომ გადაჭრელებულია და ყველა რადიო (ტელევიზიები “არც უარყოფენ და არც ადასტურებენ”) ერთხმად იძახის, დაიჭირესო, ამბავი არ უნდა უკითხო?!
ისე, შარზე იყოს დამჭერი, თორემ მიზეზის მოძებნას რა უნდა? გურულებს მაინც რა გვესწავლება _ ორი კვირაც არ გასულა, რაც გურიის სამივე მუნიციპალიტეტში ტყეები იწვოდა, მაგრამ იმ კაცმა რა დააშავა? რავა, მისი კაბინეტიდან გუუკიდა სფიჩქა?! არადა, როცა მართლა პასუხი იყო მოსათხოვი _ მაგალითად, სურებელ გლეხს, ტყეში რომ ცხოვრობს, ცხრა მთას იქით, ონჭიქეთში რომ მოუნიშნეს საშეშედ მოსაჭრელი სამი ღერი ხეი და საკუთარი ღობის ბოძისთვის საკუთარ ეზოში თხემლეს მოჭრისთვის რომ 2 000-ლარიანი ჯარიმა დააწესეს, მაშინ უნდა დაესაჯათ (კიდევ ვიტყვი _ დასაჭერად მეცოდება, მაგრამ ყური კი უნდა აეწიათ).
იცით, რატომ დავიწყე ამ ამბით? რატომ და თბილისის ერთ-ერთმა ჟურნალმა ორი დღის წინ, გარემოს დაცვის სამინისტროს ჩინოსანთა სახელფასო უწყისები გამოაქვეყნა! როგორც ცხონებული ბებიაჩემი იტყოდა, “აი საშინელი რა ნახა ჩემმა თვალებმა!” არა, საშინელი სულაც არ არის მინისტრისა და მისი მოადგილეებისათვის, რომლებიც, არავინ იცის, რაში იღებენ ყოველთვიურად რამდენიმე ათას ლარს ხელფასად და თვით მინისტრის ბრძანებით, “კარგი მუშაობისათვის”, ერთ იმდენს პრემიად!
მგონი, მინისტრის გარდა, ყველა დაიჭირეს მაგ სამინისტროში და “კარგი მუშაობა” რას ჰქვია?! მინისტრი რომ კარგად მუშაობს, ვიცით _ “მიშა მაგარია” დაწერა, მაგრამ დანარჩენები?!
დანაშაული იქეთ იყოს და ამ მინისტრს კი არ ეწყინოს (ისე, თუ ეწყინება, არც მაგაზე მოვიკლავ თავს), მაგრამ მის მოგვარეს თუ ბიძაშვილს რომ ნიშნავდა სატყეო დეპარტამენტის უფროსად, დავიჯერო, მაგაზე კომპეტენტური კაცი არ არსებობდა ამ დარგში?
მომკალით და, აღარ მჯერა, რომ ამ ჩვენს მთავრობაში “ბიძაშვილ-მამიდაშვილობია” მოისპო _ კიდევ ვიცი სხვა სამინისტროებში ასეთები და იმიტომ გეუბნებით.
გურული მეტყევეების კომპეტენციის შესახებ ინფორმაციას არ ვფლობ, მაგრამ ჩემი თვალით ვნახე მცხეთის ერთ-ერთ სოფელში, როგორ ეხვეწებოდა გარემოს დაცვის ინსპექციის თანამშრომელი იქაურ გლეხს, მომეცი შენი ასლი, დავხიოთ ოქმი, ახალს დავწერ და მე გადაგიხდი მაგ ჯარიმასო. დავინტერესდი და ასეთი ამბავი გავიგე: შესულა ტყეში ეს კაცი, მოუჭრია შეშა, იქვე დაუჭრია და ჩაულაგებია თავის “კოლხოზნიკში”. სახლთან მივიდა თუ არა, მოადგა “ჯიპი” და გადმოვიდნენ “კომპეტენტური პირები”, აზომეს შეშა და “გამოვიდა” 23 კუბური მეტრი! “კოლხოზნიკში”!!! ხომ წარმოგიდგენიათ?! ამ რაოდენობას რკინიგზის ვაგონი არ ეყოფა! კაი “ციგანი” ყოფილა ეს დაკავებულიც _ მიმხვდარა, რა ხალხთან ჰქონია საქმე და რომ უკითხავთ, ნუ გვაწვალებ ახლა ამის აქვე გადმოყრაზე და მერე უკან შელაგებაზე, შენ თვითონ გვითხარი რა ჯიშებიაო, ამას უპასუხნია:
_ აქ არის, ძმაო და ნახეთ: 3 კუბურ მეტრზე მეტი მაკაგონი არ მაქვს. დანარჩენი, 10-10 კუბმეტრი ბაობაბი და სექვოიააო.
ჰოდა, ჩაუწერიათ ამ შტერებს ოქმში: ბრაკონიერი დავაკავეთ, რომელმაც 3 კუბური მეტრი მაკაგონის და 10-10 კუბური მეტრი ბაობაბისა და სექვოიის შეშა უკანონოდ დაამზადა მცხეთის(!) ტყეში და სახლში გადაჰქონდა საკუთარი “კოლხოზნიკითო”(!).
მოუწერია იმ კაცს ხელი. ახლა დაქოქე მანქანა და წამოიღე დაპატიმრებული შეშაო, _ უბრძანებიათ. კი, ბატონოო, _ იმასაც, მაგრამ “ვერ დაუქოქია” მანქანა. ამათაც უწვალიათ, მაგრამ ხომ იცით ძველი “კოლხოზნიკის” ამბავი _ პატრონი თუ არ გეტყვის “სეკრეტს”, ისე ვერ დაძრავ ადგილიდან.
_ რა ვქნა, გაფუჭდა ეს ოხერიო, _ გაშალა თურმე ხელები ბაობაბის მჭრელმა. _ კაი, კაი, გადმოცალე და ჩვენ წავიღებთ სხვა მანქანითო, _ გამოსავალი უპოვნიათ ძალოვნებს. _ რა გადმოვცალო, იშიაზი მაქვს. აქვე ვაპირებდი “კოლხოზნიკის” დაყენებას, ვიცოდი, მაინც აღარ დაიქოქებოდა და მერე თითო-თითოდ შევიტანდი ხის ნაჭრებს სახლში “ფეჩისთვისო”.
მოკლედ, გადმოუტვირთავთ ამ ჩვენს წესრიგის დამცველებს ის შეშა, 23 კუბმეტრი რომ ეგონათ, მოუყვანიათ მანქანა, წაუღიათ და… ამბავი მაშინ ამტყდარა, უფროსს რომ ოქმი უნახავს… იმ უფროსს ზომა-წონაც ცოდნია, სექვოია და ბაობაბი სადაც იზრდება, ისიც _ კარგად სწავლობდა სკოლაში, თურმე, აფრიკის გეოგრაფიას.
_ წადით ახლა, ეს ოქმი შეცვალეთ (მეორე პირი ხომ იმ კაცს ჰქონდა სახლში?!) თორემ გაგყრით სამივესო (ვერავინ დამაჯერებს, რომ ესენი ვინმეს “ზემოდან” ბრძანებით დანიშნული ახლობელ-ნათესავები არ იყვნენ, თორემ პირდაპირ რატომ არ გაყარა კინწისკვრით?). მისულან იმ “ხუმარა ბრაკონიერთან” და სიყალბისთვის დაგაპატიმრებთო, _ მკაცრად უთქვამთ. _ მე რა ვიცი, ბატონო ბაობაბის და მაკაგონის ამბავი, გლეხი კაცი ვარ, თქვენ არ უნდა გცოდნოდათ, რას წერდითო?! მოკლედ, ბოლოს ხვეწნაზე გადასულან, ოქმი გამოუცვლიათ, იმის ჯარიმაც გადაუხდიათ და მგონი, ცოტა სხვა რამეც.
ა ბატონო, სად არის აქ კორუფცია?! რომ დაუჩემებიათ, მოვსპეთ კორუფციაო, კორუფციით დააქცევ ქვეყანას თუ დეგენერატობით, რა მნიშვნელობა აქვს?
სამაგიეროდ ხელფასი აქვთ ბევრი ათასი, რა ენაღვლებათ _ “არც უარყოფენ და არც ადასტურებენ”, “არც იქით არიან და არც აქეთ”, “არც წყალი, არც ღვინო”, “არც ქატო, არც ფქვილი”… ანუ, ისევ ბებიაჩემის გამოთქმა რომ ვიხმარო, “აფერ თავში არ არიენ!”
ამიტომ, სანამ მინისტრს სიმღერის გამო დანიშნავენ და მეორე მინისტრს “ლამაზი თვალებისთვის”, მანამდე ვიქნებით ასე _ “გაჩიჩინებული”.
P.S. სხვათა შორის, ბუკისციხეში რომ ტყე იწვოდა, თბილისში ვიყავი. გავიგე და დავრეკე გარემოს დაცვის სამინისტროს პრეს-ცენტრში, ვნერვიულობდი _ “ვერც დაგიდასტურებთ და ვერც უარვყოფთო”, _ მიპასუხეს!