ამერიკის შეერთებული შტატები დარწმუნებულია, რომ სირიაში სამხედრო ბანაკი რუსეთმა დაბომბა. აღნიშნულ ინფორმაციას REUTER ავრცელებს.
მაუწყებლის ცნობით, აღნიშნული განცხადება ამერიკელმა მაღალი რანგის დიპლომატმა გააკეთა.
"ჩვენ არ ვებრძვით სირიაში ასადის რეჟიმს და არ გვაქვს არანაირი მიზეზი რომ სამიზნედ სირიის არმია ვაქციოთ, გარდა ამისა, ჩვენ გვაქვს ინფორმაცია, რომ კვირას საჰაერო დარტყმები სირიაში რუსეთმა განახორციელა,"_ განაცხადა მან.
როგორც ცნობილია, სირიის ხელისუფლებამ ამერიკის შეერთებული შტატების ანტიტერორისტული კოალიცია სამხედრო ბანაკის დაბომბვაში დაადანაშაულა.
გავრცელებული ინფორმაციით, სამხედრო ბანაკის დაბომბვის შედეგად დაიღუპა სამი, ხოლო დაშავდა 13 სამხედრო.
სირიის საგარეო საქმეთა სამინისტროს ინფორმაციით, ანტიტერორისტულ კოალიციაში შემავალმა ოთხმა ამერიკულმა საბრძოლო თვითმფრინავმა სამხედრო ბანაკს ცხრა რაკეტა ესროლა.
"სირიის არაბთა რესპუბლიკა მკაცრად გმობს ამერიკის შეერთებული შტატების ანტიტერორისტული კოალიციის სამხედრო ძალების მიერ გამოვლენილ აშკარა აგრესიას, რომელიც უხეშად არღვევს გაეროს ქარტიის მიზნებს,"_ წერია სირიის საგარეო უწყების მიერ გაეროს უშიშროების საბჭოსა და გენერალური მდივნის მიმართ მიწერილ წერილში.
საინფორმაციო სააგენტოს ცნობით, ამერიკის შეერთებული შტატები სირიის სამხედრო ბაზის დაბომბვას უარყოფს.
"გადავხედეთ სირიაში მიმდინარე სამხედრო ოპერაციების განრიგს, რის საფუძველზეც, ჩვენ არ ჩაგვიტარებია არანაირი სახის სამხედრო ოპერაცია დეირ ეზორში, არსებობს ამის მტკიცებულება,"_განაცხადა კოალიცის სპიკერმა, პოლკოვნიკმა სტივ უორენმა.
როგორც ცნობილია, ანტიტერორისტული კოალიცია ისლამური სახელმწიფოს წინააღმდეგ სამხედრო ოპერაციას 2014 წლის სექტემბრიდან ახორციელებს, რომელსაც დამასკოს ხელისუფლება კოორდინაციას არ უწევს, რის გამოც სირიის მთავრობას დიდი ბრიტანეთში ხშირად აკრიტიკებენ.
გავრცელებული ინფორმაციით, სირიის პრეზიდენტმა ბაშარ ალ-საადმა ასევე დაგმო სირიაში დიდი ბრიტანეთის მიერ "ისლამური სახელმწიფოს" წინააღმდეგ იერიშის წარმოება და მას "მავნე და უკანონო" ქმედება უწოდა.
