გოჩა ჯიქია, კოალიცია “ქართული ოცნების” საარჩევნო შტაბის ხელმძღვანელად, ჩოხატაურში, გასულ კვირას დაინიშნა. ამის შესახებ, ოფიციალური განცხადება “რესპუბლიკური პარტიის” ერთ-ერთმა ლიდერმა, დავით ბერძენიშვილმა გააკეთა.
_ საარჩევნო შტაბის ხელმძღვანელად ჩემი დანიშვნა ჯერ არ არის ბოლომდე დადასტურებული. ჩვენ შეხვედრა გვქონდა “ქართუ ჯგუფში”, პოლიტსაბჭოსთან, მაგრამ ბოლომდე დადასტურებული პასუხი არ მიმიღია, _ ამბობს ჯიქია.
_ ამ პოსტზე ბევრი ჩვენებური ოპოზიციონერი განიხილებოდა. მართალია, თქვენ ამბობთ, რომ ჯერ დადასტურებული არაფერია, თუმცა, გუშინ (საუბარი ჩაწერილია 23 მარტს. ავტ.) დავით ბერძენიშვილმა ამის შესახებ ოფიციალურად განაცხადა. რატომ მაინცდამაინც თქვენ? რითი ხართ განსაკუთრებული და რა გამოგარჩევთ დანარჩენი კოლეგებისგან?
_ ჩემს გარდა, პოლიტსაბჭოს, რომელიც ამ თანამდებობაზე დასანიშნ პირებს არჩევს, შეხვდა ვლადიმერ ლომთათიძე, თამაზ ჯინჭარაძე და ვლადიმერ სიხარულიძე. რაც შეეხება თქვენს შეკითხვას, ჩემს თავს განსაკუთრებულად არ მივიჩნევ, გარდა იმისა, რომ ვიბრძოლებ ბოლომდე.
_ სხვები ამას არ გააკეთებენ?
_ რა თქმა უნდა, იმედია, რომ გააკეთებენ, მაგრამ უკეთესია, რომ პასუხი მათგან მიიღოთ. ჩემგან არ მოდიოდა ამბიცია, რომ ვყოფილიყავი შტაბის ხელმძღვანელი ან რაიმე ჩინის მატარებელი. ეს მე პოლიტსაბჭოსაც კარგად ავუხსენი და ვუთხარი, რომ მნიშვნელობა არ ექნებოდა, ვინ იქნებოდა ამ თანამდებობაზე, გამომდინარე იქიდან, რომ ყველას ერთი საქმე გვაქვს საკეთებელი.
_ ბატონო გოჩა, ჩვენი მკითხველისთვის კარგად არის ცნობილი თქვენი პოლიტიკური ისტორია. თუმცა, ახლახან გაირკვა, რომ 2010 წელს, სოფელ დაბლაციხეში, წინასაარჩევნოდ, სოფლის პროგრამის ფარგლებში სამუშაოები თქვენ შეასრულეთ… როგორ ფიქრობთ, რატომ მოგცათ ხელისუფლებამ ამ სამუშაოების ჩატარების შესაძლებლობა?
_ ეს ინფორმაცია სიმართლეს არ შეესაბამება და ამის გადამოწმება ადვილია. როდესაც პროექტი მზადდებოდა, ამ საქმეში ჩართული იყო სოფლის მოსახლეობა, მათ ამირჩიეს კომისიის თავმჯდომარედ დაბლაციხის ხაზზე, იმისთვის, რომ გამეკონტროლებინა შესრულებული სამუშაოს ხარისხი. ეს იყო ჩემი მონაწილეობა ამ პროექტში.
_ თუკი იყავით მხოლოდ კომისიის თავმჯდომარე, უნდა შედგენილიყო სპეციალური ოქმი. შედგა თუ არა მსგავსი ოქმი და როგორ გახორციელდა 2010 წელს სოფლის პროგრამის სამუშაოები თქვენს სოფელში?
_ ეს იყო ადგილობრივი არჩევნების წელი. მე არჩევნებში ვიღებდი მონაწილეობას და კენჭს ვიყრიდი მაჟორიტარ დეპუტატად ჩემსავე სოფელში “რესპუბლიკური პარტიიდან”. მშენებლობები მიმდინარეობდა აქტიური საარჩევნო პერიოდის დროს. მე ოქმი არ დამიწერია, რადგან როცა მოვითხოვე ჩემი უფლებამოსილების დამადასტურებელი დოკუმენტი, რომელიც შედგა სოფლის კრებაზე, აღმოჩნდა, რომ ასეთი დოკუმენტი აღარ არსებობდა და მე ვერ შევძლებდი დოკუმენტის გარეშე რაიმე სახის ოქმი დაწერას. რაც შეეხება გახორციელებულ პროექტს, სამუშაოებს ასრულებდა ინდმეწარმე თეიმურაზ ჯიქია, რომელიც მხოლოდ და მხოლოდ ჩემი მეგვარეა და ჩემი თანასოფლელი, თუმცა, მუშებად მუშაობდნენ ჩემი ბიძაშვილი და ორი უახლოესი მეგობარი. როცა ამის შესახებ ცნობილი გახდა ადგილობრივი ხელისუფლებისთვის, შეჩერდა მუშაობა. ჩემსა და იმდროინდელ გამგებელს, მამუკა დოლიძეს შორის, რომელიც იმ პერიოდში გადამდგარი იყო არჩევნების საჭიროებიდან გამდინარე, შედგა ძალიან ცხარე საუბარი ტელეფონით. ამ საუბრის დროს მითხრა დოლიძემ, რომ ჩემს ახლობლებს სამუშაოები არ უნდა შეესრულებინა, წინააღმდეგ შემთხვევაში ხელშეკრულება გაუქმდებოდა და პრობლემა შეექმნებოდა ინდმეწარმეს. ამ საუბრის შემდეგ, არჩევნების დასრულებამდე, დაბლაციხეში ეს პროგრამა შეჩერებული იყო და არჩევნების შემდეგ, როცა გაიმარჯვა მათმა კანდიდატმა, განაახლა იგივე ადამიანებმა, რომლებმაც თავიდან დაიწყეს.
_ ეს საკმაოდ სერიოზული თემაა. თუ ეს ყველაფერი მართლაც 2010 წლის თვითმართველობის არჩევნების წინ ხდებოდა, თუკი თქვენს ახლობლებს მუშაობის საშუალებას არ აძლევდნენ, თუკი სოფლის კრების ოქმის გაქრა, რატომ აქამდე არ გაახმაურეთ ან შესაბამის უწყებებს არ მიმართეთ?
_ არ ჩავთვალე საჭიროდ, რადგან დოკუმენტის გაქრობა თუ არჩევნების გაყალბება ხდებოდა იმ ხალხის მიერ, რომლებისთვისაც კანონის თანახმად უნდა მიმემართა.
_ პრესას რატომ არ აცნობეთ?
_ ახლა მეკითხებით და მეც გპასუხობთ.
_ ამდენ ხანს, თქვენივე ინიციატივით რატომ არ ისაუბრეთ ამ თემაზე?
_ ეს სოფელში გახმაურებული თემა იყო და არ მივიჩნიე მიზანშეწონილად, რომ პრესისთვისაც მეცნობებინა.
_ ტროტილის შეძენა-შენახვასთვის, რაც დღემდე საკამათო თემაა, 3 წლის წინ მოგისაჯეს სამწელიწადნახევრით თავისუფლების აღკვეთა, თუმცა, ციხეში მხოლოდ 4 თვე გაატარეთ, რადგან საბოლოოდ გადაკვალიფიცირდა მუხლი და დაგეკისრათ 2 500 ლარიანი ჯარიმის გადახდა. ვიცით, რომ ეს თანხა დღემდე გადაუხდელი გაქვთ. რატომ არ გთხოვენ შესაბამისი ორგანოების ამდენი ხნის განმავლობაში ამ თანხის გადახდას?
_ კი, ამ თანხის გადახდა ნამდვილად დამაკისრეს, მაგრამ არ გადავიხდი, რადგან ეს იგივეა, რომ ვაღიარო ე.წ. დანაშაული, რომელიც თითქმის ტერორისტობის ტოლფასი გახადეს. რაც შეეხება იმ პროვოკაციულ შეკითხვას, თუ რატომ არ მთხოვენ, მე მაქვს საკუთარი მანქანა, რომელიც არის დაყადაღებული ამ თანხის სანაცვლოდ.
_ და ეს დაყადაღებული მანქანა დღეს თქვენს ეზოში დგას.
_ დიახ. თუმცა, ამაში არაფერი გასაკვირი. იმ მანქანით დაყადაღების შემდეგ არ მისარგებლია.
_ ჩოხატაურელი ოპოზიციონერებიდან ხშირად ისმის ერთმანეთის საწინააღმდეგო ბრალდებები. ცალ-ცალკე რომ მოგისმინოთ, “ყველა ვიღაცასთან ხართ შეკრული”. ასეთი “ერთიანობით” გეგმავთ არჩევნებში გამარჯვებას?
_ მე, პირადად, არავის მისამართით არ მქონია მსგავსი ბრალდება. მე პირდაპირი ადამიანი ვარ და თუ ვინმეზე ასე ვფიქრობ, დამერწმუნეთ, პირდაპირ ვეტყვი და ჩვენს გვერდით ასეთი არ იქნება.
_ ვინ იქნება თქვენს გვერდით, გარდა იმ სახეებისა, რომლებითაც დღეს არის წარმოდგენილი “ქართული ოცნება” ჩოხატაურში?
_ ჩვენს გვერდით იქნება ყველა ის ადამიანი, ვინც რეალურად ხედავს დღევანდელი ხელისუფლების იმ ძალადობრივ ქმედებებს, რომელიც რამდენიმე წელია სულ უხუთავს მოსახლეობას. ჩვენ არავის ვზღუდავთ, ყველას შეუძლია მოვიდეს და ჩვენთან ერთად იბრძოლოს უკეთესი მომავლისთვის.
_ ვის ოცნებებს ასრულებს “ქართული ოცნება”? ბოლო დროს ეს კითხვა ძალიან აქტუალურია, რადგან ამ კოალიციაში საკმაოდ არაპოპულარულ კადრებს ვხედავთ.
_ მე არ ვიცი, თქვენ ვის გულისხმობთ არაპოპულარულ კადრებში. ყველა ის ადამიანი, ვინც “ქართულ ოცნებაშია”, თავისი საქმის მცოდნე და პროფესიონალია. ყველა მათგანი გულით აკეთებს საერთო საქმეს, რომელიც ქართველი ხალხისთვის, ჩვენი ქვეყნისთვის იქნება სასიკეთო. როდესაც “ქართული ოცნების” არაპოპულარულ კადრებზეა საუბარი, ნუ დაგვავიწყდება, ვინ არის დღევანდელ ხელისუფლებაში და როგორია მათი პოპულარობა.
_ როგორ ფიქრობთ, თქვენ ხართ პოპულარული და ჩოხატაურელები მხარს დაგიჭერენ?
_ პოპულარობა არ მჭირდება. რაც შეეხება ჩემს პიროვნულ თვისებებს, ეს მათ იციან, ვინც მე მიცნობს და ის საქმე, რომელსაც ახლა ვაკეთებ, ჩემს შესაძლებლობებს ყველას დაანახებს.
_ არჩევნებში გამარჯვებისთვის მხოლოდ თქვენი ნაცნობების ცნობები არ არის საკმარისი.
_ არჩევნებში გოჩა ჯიქია არ იმარჯვებს. იმარჯვებს ხალხი, რომლებსაც სურს უკეთესი ცხოვრება, დღეს კი ცხოვრება უსამართლო და გაუსაძლისია.
_ თუმცა, როცა ხდები პარტიისა და კოალიციის სახე, ბუნებრივია, პასუხისმგებლობა მეტია. გასაგებია, რომ ხალხი იმარჯვებს, მაგრამ ეს ხალხი უნდა დაარწმუნოთ იმაში, რითი ხართ მოქმედ ხელისუფლებაზე უკეთესი.
_ დღევანდელი ხელისუფლება ხალხისთვის არის მაგალითი ძალადობის, მკვლელობის, კორუფციის და იმ ყაჩაღობის, რომელიც 9 წელია გრძელდება. ჩვენი კოალიცია ასეთ მოქმედებებს მაქსიმალურად გამორიცხავს და ამის გარანტი უპირველესად ბიძინა ივანიშვილია, რომელსაც ხალხის ფული არ სჭირდება.
_ ამბობთ, რომ ხელისუფლება ცუდია, ბიძინა ივანიშვილი კი _ კარგი, მაგრამ მოსახლეობამ ხმა თქვენ უნდა მოგცეთ, იმ გუნდს, რომლითაც დღეს ხართ წარმოდგენილები, რომლებმაც რამდენიმე არჩევნებში ვერ გაიმარჯვეთ და რომლებსაც, რაც არ უნდა ბევრი ვისაუბროთ, ამ ეტაპზე ავტორიტეტი და ნდობა არ აქვს.
_ საპრეზიდენტო არჩევნები ჩვენ მოვიგეთ.
_ თქვენ არა…. არჩევნები მოიგო კანდიდატმა და აქ თქვენი გუნდის როლი ძალიან უმნიშვნელო იყო. თქვენ ვერ შეძელით მოგეგოთ საპარლამენტო არჩევნები, ვერ შეძელით თვითმმართველობის არჩევნების დროს თუნდაც ერთ სოფელში, გაგეყვანათ თქვენი კანდიდატი. თქვენ პირადად, საკუთარ სოფელში წააგეთ არჩევნები და ჩვენი რამდენიმე დღის წინ ჩატარებული გამოკითხვა მოწმობს, რომ ავტორიტეტთან და ნდობასთან დაკავშირებით კოალიცია “ქართული ოცნების” ჩოხატაურის ორგანიზაციის წარმომადგენლებს ჩოხატაურელები არ ენდობა და მათი, შესაბამისად თქვენი ხელისუფლებაში მოსვლის სურვილი არ აქვთ.
_ ადგილობრივ არჩევნებში ჩემს წაგებასთან დაკავშირებით, მაქვს მყარი პოზიცია _ მე არჩევნები წავაგე არა ხალხთან, არამედ ხელისუფლებასთან, რომელმაც ყველაფერი გააკეთა იმისთვის, რომ თავისი კანდიდატი გაეყვანა _ არ დაუკლიათ არც მოსყიდვა, არც დაპირება და უფრო მეტიც, საკუთარი სახსრებით ჩამოიყვანეს ადამიანები სხვადასხვა რაიონებიდან, რომ მათი კანდიდატისთვის მიეცათ ხმა. ეს ყველამ კარგად იცის.
