“გაცნობებთ, რომ სს “ენერგო-პრო ჯორჯიას” ოზურგეთის სერვისცენტრის თანამშრომლებმა გამომძალეს ელექტროენერგიის დანახარჯის 6 თვის საფასური…” “ბატონო გიორგი, გაცნობებთ, რომ წლების განმავლობაში…” “ბატონო შოთა, გაცნობებთ, რომ…” “ქალბატონო შორენა, 2007 წლის ნოემბერში…” _ ასე იწყება არა ერთი განცხადება, მიმართვა, დახმარების თხოვნა კერძო და საჯარო პირებისადმი, სახელმწიფო და სამართლებრივი სტრუქტურებისადმი, ზედა და საშუალო ეშელონებისადმი. სახეზე გვაქვს ვითარების არა ერთი ახსნა, თხოვნა თუ მოთხოვნა, რომელიც უპასუხოდ დარჩა”.
საქმე ეხება დავას სს “ენერგო-პრო ჯორჯიას” და აბონენტს შორის. დაზარალებული აბონენტი, რომელმაც რედაქციას დახმარებისთვის მიმართა, ოზურგეთის მუნიციპალიტეტის სოფელ ჭანიეთის მკვიდრი, გურამ ლომჯარიაა.
“დავალიანების შესახებ 2007 წლის ნოემბერში გავიგე. ცნობის მიხედვით, თურმე, არ ვიხდიდი დახარჯული ელექტროენერგიის საფასურს,” _ ასე დაიწყო ჩვენთან საუბარი გურამ ლომჯარიამ.
ლომჯარიას მიერ დახარჯული ელექტროენერგიისა და მისი გადახდის ცხრილი, რომელიც 2007 წლის ნოემბრის ჩათვლით მონაცემებს მოიცავს და ინკასატორი აწერს ხელს, თავად არის დარღვევების ამსახველი. მით უმეტეს, თუ “ენერგო-პრო ჯორჯიას” მიერ გადმოცემულ აბონენტთა დარიცხვა-ამოღების უწყისსა და ფილტრაციას შევადარებთ. თვალსაჩინოებისთვის ავიღოთ ერთი თვის, აგვისტოს მონაცემები: ელექტროენერგიის გახარჯვისა და მისი ანაზღაურების ცხრილის მიხედვით, ამ თვეში აბონენტმა, ფაქტობრივად, დახარჯა 7 ლარი, გადაახდევინეს 19,99 ლარი, რასაც ადასტურებს დარიცხვა-ამოღების უწყისი და ფილტრაცია. თუ ზოგად სურათს შევხედავთ, აგვისტოში, 467-1 ფიდერზე ყველა აბონენტის ერთობლივი დანახარჯი იყო 353 ლარი, ხოლო ინკასატორმა სალაროში შეიტანა 410 ლარი, რაც დასტურდება სალაროს შემოსავლის ორდერით _ #1225. “ენერგო-პრო ჯორჯიას” მონაცემებით ამ თვეში, ამავე ფიდერზე, დანახარჯის რაოდენობამ 365,27 ლარი შეადგინა, გადახდით კი მხოლოდ 283 ლარი გადაიხადეს. იმავე თვეში გაცემული სხვა დოკუმენტის მიხედვით, რომელიც “ენერგო-პრო ჯორჯიამ” შინაგან საქმეთა სამინისტროს ოზურგეთის რაიონული სამმართველოს მიერ შესაბამისი ქვითრის წარდგენის შემდეგ გასცა, წერია, რომ აგვისტოში, იმავე ფიდერზე 410 ლარი გადაიხადეს. თუმცა, ჩახედავთ თუ არა დოკუმენტს, თვალში მოგხვდებათ სხვა ფიდერზე (467-3 და 467-5) დაფიქსირებული 6 აბონენტი, რაც, ალბათ, ქვითარსა და “ენერგო-პრო ჯორჯიას” მიერ გაცემულ ინფორმაციას შორის შესაბამისობის აღდგენისთვის გახდა საჭირო.
ინკასატორის მიერ ზედმეტი თანხის გადახდა, სავარაუდოდ, ცალკეულ აბონენტთა დანახარჯების ჯამსა და საერთო მრიცხველის მონაცემებს შორის არსებული სხვაობით აიხსნება, რასაც კიდევ ერთ დარღვევამდე მივყავართ _ აბონენტთა დარიცხვა-ამოღების დოკუმენტის მიხედვით, გურამ ლომჯარიას 19,99 ლარი დაერიცხა, მაშინ როცა 467-1 ფიდერის ყველა სხვა აბონენტის გადასახადმა 10,79 ლარი შეადგინა, ეს კი “სემეკ-ის” 2007 წლის 30 მაისის #9 დადგენილების უხეში დარღვევაა. ამ დადგენილების მიხედვით, იმ შემთხვევაში, თუ აბონენტთა ცალკეული დანახარჯების ჯამსა და საერთო მრიცხველის მაჩვენებელს შორის სხვაობაა, მის აღმოსაფხვრელად აბონენტებს ზედმეტი გადასახადი რეალური დანახარჯის პროპორციულად ერიცხებათ.
“ეს პრინციპული საკითხია. საქმე ფულს არ ეხება, ჩემთვის სამართლიანობის აღდგენაც საკმარისია,” _ აღნიშნა აბონენტმა.
შსს სამინისტროს ოზურგეთის რაიონული სამმართველოს რჩევით, გურამ ლომჯარიამ ოზურგეთის რაიონულ სასამართლოს მიმართა, თუმცა, ოზურგეთის რაიონული სასამართლოს მოსამართლის მიერ გურამ ლომჯარიასადმი 2008 წლის 23 დეკემბერს მიწერილ პასუხში წაიკითხავთ: “შსს ოზურგეთის რაიონული სამმართველოს მიერ არასწორად მოგეცათ განმარტება, თითქოს თქვენ მიერ დასახელებული ფაქტი შეიცავდეს კერძო ბრალდების დანაშაულის ნიშნებს. აღნიშნული შეიცავს სისხლის სამართლის კოდექსის საჯარო ბრალდების დანაშაულის ნიშნებს და სწორად გქონდათ მიმართული სამართალდამცავი ორგანოსადმი”.
ოზურგეთის რაიონულმა სამმართველომ, შსს სამინისტროს დავალებით, ხელმეორედ დაიწყო გამოძიება. სამმართველოს უფროსმა კი საქმის მოკვლევა სამმართველოს უბნის უფროს ინსპექტორ-გამომძიებელს, აკაკი სადრაძეს მიანდო. გამომძიებელმა ორთვიანი ძიების შემდეგ დაადგინა, რომ “აღნიშნული არ განეკუთვნება პოლიციის ორგანოს განსჯადობის საგანს”.
შემდეგი მიმართვა აბონენტისგან კვლავ ოზურგეთის რაიონულმა სამმართველომ მიიღო, საქმის მოკვლევაც ახალ გამომძიებელს, ს. ურუშაძეს დაევალა, თუმცა, პასუხი კვლავ გაუგებარი აღმოჩნდა: “ელექტროენერგიის მითვისება საქმის მასალებიდან არ ჩანს”. არადა, ამ საკითხზე აბონენტი სულაც არ დავობდა.
გურამ ლომჯარიას მიმართვა მიიღო “სემეკ”-მა, საქართველოს პარლამენტის იურიდიულ საკითხთა კომიტეტმა, საქართველოს პროკურატურამ, ოზურგეთის მუნიციპალიტეტის საკრებულომ და სხვებმა. მოთხოვნა: სამართლიანობის აღდგენა და კომპენსაცია მორალური ზიანის ასანაზღაურებლად. პასუხი: აღნიშნული არ შეიცავს დანაშაულის ნიშნებს, თანხის მითვისება არ დასტურდება და ა.შ.
5 წლის განმავლობაში, სამართალდამცავმა ორგანოებმა საქმის არსის გარკვევა და მისი რომელიმე უწყებისთვის მიკუთვნება ვერ მოახერხეს, ვერც დანაშაულის ნიშნები იპოვეს, მაშინ, როცა დანაშაულის დამადასტურებელმა ფაქტებმა და წერილობითმა დოკუმენტებმა რედაქციამდე მარტივად მოაღწია.
_ ზოგიერთი ჩინოვნიკი ფიქრობს, დღეს მე კარგად ვარ და პრობლემა რატომ უნდა შევიქმნაო. ასეთი მიდგომა დამღუპველია, საზოგადოება ხელისუფლების რწმენას კარგავს, რაც ქაოსამდე მიგვიყვანს. ვიმედოვნებ, ამჯერად ყველაფერი გაირკვევა. იმედს ჯერ კიდევ ვიტოვებ, სამართალდამცავი ორგანოები საკუთარი კომპეტენციის საზღვრების დადგენას თუნდაც იქედან დაიწყებენ, რომ კერძო და საჯარო ბრალდების დანაშაულის ნიშნებს ერთმანეთისგან გაარჩევენ. ხოლო თუ დანაშაულის დამადასტურებელი მტკიცებულებები კომპეტენტური პირების თვალთახედვის არეალში მოხვდება და ამ საქმეს მოეხსნება დასკვნა: “დანაშაულის ნიშნები არ არსებობს”, მაშინ შეიძლება ითქვას, რომ შედეგი დადგა, _ გვითხრა გურამ ლომჯარიამ.
ამ ეტაპზე, აღნიშნულ საქმეს ოზურგეთის რაიონული პროკურატურის პროკურორი სწავლობს.
