ე.წ. ნარკოკარტელის საქმეზე მსჯავრდებული ანასტასია ზაუტაშვილი შეწყალების კომისიის ყოფილი თავმჯდომარის, ალეკო ელისაშვილის მიერ გავრცელებული ინფორმაციის საფუძველზე დაწყებულ გამოძიებასთან დაკავშირებით პირველ საჯარო განცხადებას აკეთებს. მისი განცხადებით, "ზღაპარია ის ინფორმაცია, რომელიც ალეკო ელისაშვილმა და ქორიძემ გამოძიებას მიაწოდეს".
ადვოკატის მეშვეობით ზაუტაშვილი ჟურნალისტებს ტელეფონით ესაუბრა და აღნიშნა, რომ მას არანაირი თანხა არავისთვის არ მიუცია.
"არასოდეს მითხოვია შეწყალება. ყოველთვის ვითხოვდი გამართლებას. პროკურატურა ჩემს საქმეს გადახედავს და თვითონ გამამართლებს. როდესაც ალეკო ელისაშვილი გახდა შეწყალების კომისიის თავმჯდომარე, იგი შემოსული იყო ციხეში. ამას ესწრებოდნენ სხვა მსჯავრდებულებიც. მან თქვა, რომ ჩემს საქმეს იცნობს და მითხრა, რომ ადვოკატებს მიეტანათ კომისიაში განცხადება, რომ უდანაშაულო ვარ, რის შემდეგაც პრეზიდენტს თვითონ შეუტანდა ჩემს საქმეს. სწორედ ამის შემდეგ გადავწყვიტე შეწყალების შესახებ განცხადება დამეწერა და ამის შემდეგ მოვიკითხე მანანა კობახიძესთან ჩემი საქმე. მანამდე შეწყალება არ მითხოვია. ვითხოვდი გამართლებას", _ განაცხადა ზაუტაშვილმა და დასძინა, რომ "ზღაპარია ფულის გადახდასთან დაკავშირებული განცხადებები. კანფეტიც არავისთვის მიმიცია".
მისი თქმით, იგი უკანონო პატიმარია და მხოლოდ იმიტომ ზის ციხეში, რომ იძულების მიუხედავად წარდგენილი ბრალდება არ აღიარა.
რაც შეეხება ეკა ბესელიას, ზაუტაშვილის განცხადებით, "მთელი ამ ხნის განმავლობაში მისი მისამართით უკმაყოფილებას გამოთქვამდა, რადგან ბესელია მათ საქმეზე უმოქმედო იყო".
