“სოციალურად დაცული” ოჯახი საქონლის სადგომში ცხოვრობს

სახლის დაწვამდე, ოჯახი სოციალურ დახმარებას იღებდა, თუმცა, ხანძრის შემდეგ, ოჯახის სოციალურმა ქულამ აიწია(?!) და ოსეფაიშვილების ოჯახს, სადაც სამი სული ცხოვრობს, დახმარება შეუწყდა.

_ მე და ჩემი მეუღლე საპენსიო ასაკის არ ვართ. ერთი წლის წინ ჩემთან საცხოვრებლად და გადმოვიყვანეთ, რადგან ჩემი ძმა, რომელთანაც ის ცხოვრობდა, გარდაიცვალა და მარტო ვერ დავტოვებდი. იგი მეორე ჯგუფის ინვალიდი და ფსიქიურად დაავადებულია. ჩემი და, ჩემთან გადმოსვლამდე, სოციალურ დახმარებას იღებდა, თუმცა, მერე მასაც შეუწყვიტეს. ჩვენი ერთადერთი შემოსავალი, ჩემი ავადმყოფი დის პენსიაა, _ გვითხრა გიგა ოსეფაიშვილმა.

ოსეფაიშვილებს, სახლის დაწვის შემდეგ, ადგილობრივმა გამგეობამ 2 000 ლარიანი დახმარება გაუწია, თუმცა, ამ თანხით მხოლოდ სახლის გადახურვა მოახერხეს. დღეს ეს ოჯახი საქონლის სადგომში ცხოვრობს, რომელსაც არც ფანჯარა აქვს, არც იატაკი, არც ჭერი და არც საყოფაცხოვრებო პირობებია: _ 2 წელია, ასეთ მდგომარეობაში ვართ. წასასვლელი რომ არ მქონდა, გამოვასუფთავეთ საქონლის სადგომი და აქ დავბინავდით. მაგიდა და სკამიც კი არ გვაქვს, _ ამბობს ციალა ოსეფაიშვილი და აღნიშნავს, რომ მათი ოჯახის სოციალური ქულის მატება, ეზოში მდგარმა ძველმა ავტომანქანამ გამოიწვია, რომელიც მის სიძეს ეკუთვნის.

_ ჩემიც რომ იყოს, ვერ ვხდები ამის გამო რატომ მომიმატეს ქულები. იმაზე ცუდ მდგომარეობაში ვართ, ვიდრე მაშინ, როცა სოციალურ დახმარებას ვიღებდით. პურის ფული არ გვაქვს, _ აღნიშნავენ ოსეფაიშვილების ოჯახში.

ოსეფაიშვილებთან მისულ “გურია ნიუსს” მართლაც გაუსაძლისი მდგომარეობა დახვდა. ოჯახის ორი წევრი საწოლში იწვა _ ოჯახის დიასახლისის თქმით, ერთი კვირაა ამ მდგომარეობაში არიან, რადგან წამლის საყიდელი ფული არ აქვთ.

სოციალური მომსახურების სააგენტოს ჩოხატაურის განყოფილებაში ამ საკითხზე კომენტარი არ გააკეთეს და პრესსამსახურთან გადაგვამისამართეს.

სოციალური მომსახურების სააგენტოს პრესსამსახურში გვითხრეს, რომ ამ ოჯახის მდგომარეობას სოციალური მომსახურების სააგენტოს ჩოხატაურის განყოფილება აუცილებლად გადაამოწმებს. მათი თქმით, დეკლარაციაში მხოლოდ ის მონაცემებია შეტანილი, რაც ოჯახმა მიაწოდა, თუმცა, ფაქტია, რომ “სოციალურად დაცულ” ოჯახს საარსებოდ არაფერი გააჩნია და საქონლის სადგომში ცხოვრობს (ამ ოჯახის საცხოვრებელი მდგომარეობის ამსახველი ვიდეომასალა შეგიძლიათ იხილოთ ჩვენს ვებგვერდზე www.gurianews.com)

_ ეს საერთოდ არასაკომენტარო თემაა. სირცხვილია, როცა ასეთი რამე ხდება. ოჯახებს ქულა ენიჭებათ სააგენტოს ადგილობრივი ფილიალის სოციალური აგენტების მიერ. რამდენადაც ვიცი, მიზანმიმართულად უმატებენ ქულებს, რომ მოახლოებული არჩევნების დროს “გამოასწორონ” თავიანთი შეცდომები და ამ ხალხს ისევ აღუდგინონ დახმარება. თუმცა, როცა ადამიანი ფსიქიურად არის დაავადებული და ცხოვრობს საქონლის ბინაში, მისთვის არც არჩევნებს აქვს მნიშვნელობა და არც სხვა რამეს. ამ ოჯახს, და ასეთები ძალიან ბევრია, სასწრაფოდ სჭირდებათ დახმარება და ჩვენს მიერ დაქირავებული ხელისუფლების მოვალეობა სწორედ ეს არის. ადვილია კაბინეტებიდან, რბილი სავარძლებიდან კომენტარების კეთება. რთული და გაუსაძლისი ამ ადამიანების ბედია. ხელისუფლება ამბობს, რომ სოციალური სააგენტო მათ არ ექვემდებარება. როგორც გამგეობას, ასევე საკრებულოს, ჰყავს სოციალური სამსახურები და კომისიები _ ისინი ვალდებულები არიან, ყველა ასეთი შემთხვევა შეისწავლონ ადგილზე, გასცენ რეკომენდაციები, აღძრან შუამდგომლობები და ყველაფერი გააკეთონ ამ ადამიანების დასახმარებლად. იმედია, არჩევნების დროს მაინც გამოსწორდებიან, _ აღნიშნა ჩვენთან საუბრისას “თავისუფალი დემოკრატების” წევრმა, ვახტანგ გაჩეჩილაძემ.

ჩოხატაურის მუნიციპალიტეტის გამგებლის, ლელა იმედაშვილის თქმით, ოსეფაიშვილების ერთჯერადი ფინანსური დახმარება აუცილებლად გაეწევა.