“მშობლებს მეტი ყურადღება და სახელმწიფო პროგრამების გამოყენება მართებთ”

გაზაფხულის დადგომასთან ერთად, აქტიურ ფაზაში შედის გრიპის ვირუსი და სხვადასხვა ნაწლავური ინფექციები, რომელთა პრევენციაც ძალიან რთულია. განსაკუთრებულ ხიფათს დაავადებები ბავშვებს უქმნიან.

ამ დაავადებების შესახებ “გურია ნიუსი” ექიმ-პედიატრს, ვახტანგ გაჩეჩილაძეს ესაუბრა.

_ გაზაფხულზე აქტიურდება ზოგიერთი დაავადება. მით უფრო, რომ ორგანიზმი ზამთარგამოვლილია, წლევანდელი ზამთარი კი, ძალიან ხანგრძლივი და მკაცრი იყო. იანვარში სხვადასხვა ფორმით შეინიშნებოდა ინფექციების პირველი ნიშნები, თუმცა, საბედნიეროდ, სერიოზული სახის გართულებებს ადგილი არ ჰქონია. მოზრდილ ასაკს უფრო გაუჭირდა, ვიდრე _ პატარებს. გაზაფხულის დადგომისთანავე კალცის დეფიციტი იწყება. ამას ვითვალისწინებთ პედიატრები და შესაბამისად, ბავშვებს საჭირო მედიკამენტებს ვურჩევთ. ეს სიმპტომები 2-3 წლის ასაკშია ნიშანდობლივი. ბრონქიტები მოსალოდნელია უფრო 10 წლის ასაკს ზევით. ამ შემთხვევაში, ბავშვის იზოლაცია აუცილებელი პირობაა. შეინიშნება მცირე ანემიები, რადგან მშობლებს ბავშვები დღის განმავლობაში გარეთ ვერ გამოჰყავდათ და მზის, სუფთა ჰაერის ნაკლებობა მნიშვნელოვანი წინაპირობაა.

_ კლიმატური პირობები მოქმედებს ვირუსების გავრცელებაზე?

_ კლიმატური პირობები არასახარბიელო იყო. ჯერ გაზაფხული არ დამთავრებულა და ისევ არსებობს ვირუსების გავრცელების რისკები, თუმცა, არსებობს პრეპარატები, რომლითაც შესაძლოა თავი დაიცვა, ცხადია, საჭირო დროს და საჭირო რაოდენობით. ინფექციების გავრცელების საკმაოდ დიდი რისკია სკოლებსა და ბაღებში. ჩვენც, მშობლებიც ვაშავებთ, როცა სიცხით ან ვირუსის ნიშნებით ბავშვებს ვაგზავნით სკოლაში ან საბავშვო ბაღში. ეს დაბალ კულტურაზე მეტყველებს და იწვევს სხვადასხვა დაავადებების გავრცელებას.

_ საუკეთესო პრევენცია ბავშვის იზოლაციაა?

_ დიახ, უნდა მოარიდონ კონტაქტებს. თუ საკლასო ოთახშია ვირუსის მიკროკერა, ეს კლასი უნდა განიავდეს ხშირად და ერთი დღით მაინც შეწყდეს სწავლება, რათა გავრცელების რისკი შემცირდეს.

_ რას ურჩევდით მშობლებს?

_ არ შეშინდნენ _ ვირუსები მაინც შედარებით მსუბუქი ფორმებით მიმდინარეობს. ტემპერატურული რეაქციების დროს აუცილებელია სითხეები, ხილი, სუფთა ჰაერი და ექიმის კონსულტაცია.

_ როგორც ვიცით, ამ პერიოდში ენტეროვირუსების საფრთხე იმატებს. ამ ტიპის ვირუსზე რა შეგიძლიათ, გვითხრათ?

_ ენტეროვირუსი სპეციფიურია და ჰაერწვეთოვანი გზით ვრცელდება. აქ მნიშვნელოვანია, რამდენად იცლება ბავშვი სითხისგან. მთავარია, დროული დახმარება, დაუშვებელია თვითმკურნალობა. აუცილებელია დროული მისვლა ექიმთან და შესაბამისი მკურნალობის ჩატარება. მშობლები ხშირად თავს იკავებენ იმის გამო, რომ სამწუხაროდ, ფინანსური საშუალება არ აქვთ, მაგრამ თუ მშობლები დაუყონებლივ მიმართავენ ექიმს, ასე გაცილებით ნაკლები თანხა დასჭირდებათ, ვიდრე დაავადების გართულებისას. არის ურგენტული პროგრამა _ 3 წლამდე ბავშვებს 20%-80%-ით აფინანსებს სახელმწიფო. ასევე, მაგალითად, ჩოხატაურის მუნიციპალიტეტის საკრებულოს სხდომაზე მიღებული გადაწყვეტილებით, 5-წლამდე ასაკის ბავშვების ჯანმრთელობას, რომელთა ოჯახებს არ აქვთ მაღალი სარეიტინგო ქულები, მუნიციპალიტეტის ბიუჯეტი აფინანსებს.

_ ვაქცინაციის სისტემის მოუწესრიგებლობაც ხომ არ არის ხელისშემწყობი ფაქტორი ვირუსების გასავრცელებლად?

_ ჯანდაცვის სისტემაში ახალი კომპანიების გამოჩენამ “ბარდაგი” გამოიწვია. ხშირად ვაქცინა არ არის რაიონში. სადაზღვევო კომპანიებს თითქმის ერთნაირი პირობები აქვთ. დროულ ვაქცინაციას კი, შეუძლია ბევრი პრობლემა აგვარიდოს; მაგალითად, ზაფხულში წითელას ეპიდემია აქტიურდება, მისგან პრევენცია კი მხოლოდ დროული ვაქცინაციითაა შესაძლებელი.