ბიზნესმენი დავით სიხარულიძე, რომელმაც ციხეში 6 წელი გაატარა და საპატიმრო შეწყალების შედეგად დატოვა, უფლებადამცველ თამაზ ბაკურიძეს თაღლითობაში ადანაშაულებს.
_ ჩემ საქმეში ბევრი კითხვის ნიშანია. მოკლედ რომ ვთქვა, დამაკავეს იმიტომ, რომ „ნაციონალებს“ საარჩევნოდ ფული, ე. წ. „საქმის ატკატი“ არ მივეცი და ჩემი სიმართლის დამტკიცებას ციხიდანაც ვცდილობდი. ციხიდან ერთდროულად რამდენიმე პროცესს ვაწარმოებდი. ამ სასამართლო დავის პერიოდში, სახლში რომ დავრეკე, მითხრეს თამაზ ბაკურიძეს უნდა შენთან საუბარიო და მომცეს მისი ტელეფონის ნომერი.
თამაზს ახლოს არ ვიცნობდი, ჩემი სიძის ბიძაშვილია. დავურეკე და მითხრა, შენს სახლთან „ტოიოტას“ ჯიპი დგას, წავიყვან და თანხას ნელ-ნელა გადაგიხდიო. ფასი მკითხა. ვუთხარი, რომ მოეცა ის თანხა, რაც ბაზარზე ღირდა მსგავსი ავტომობილი. დავუკონკრეტე, რომ მეზობელს უნდოდა ყიდვა, 5 000 დოლარს იხდიდა, არ მივეცი ამ ფასად, თუმცა, მას მივცემდი.
შევთანხმდით, რომ მანქანას წაიყვანდა და თანხას ნაწილ-ნაწილ გადაიხდიდა. მანქანა რომ წაიყვანა, გაიგო, რომ პარლამენტსა და პროკურატურაში წერილები მქონდა გაგზავნილი _ ჩემი საქმის გადახედვას ვითხოვდი. უფრო კონკრეტულად, წერილები ეხებოდა საქმის დაშლას, რადგან მითვისების მუხლი სრულიად უსაფუძვლო იყო. ზონიდან მინიშნებებით ვსაუბრობდით. მითხრა, მე მოგიგვარებ მაგ საქმეებსო. ერთხელ შემატყობინა, რომ ნახა ადამიანი, ვინც ამ საქმეს გააკეთებდა და თავიდან 10 ათასი დოლარი უნდოდა.
დასრულების შემდეგ კიდევ ამდენი. გავრისკე _ ამდენი დამკარგე და იქაც ერთი 10 ათასი იყოს,-მეთქი. ვუთხარი, რომ თუ ამ საქმეს გააკეთებდა, მანქანის ფული არ მინდოდა. ჩემებმა როგორღაც 8 ათასი იშოვეს და მისცეს თამაზს. აქედან 3 000 დოლარი კერძო გზავნილით გადაუგზავნა ჩემმა დამ ჩოხატაურიდან, რომლის შესაბამისი ქვითრებიც მაქვს. _ გვიყვება სიხარულიძე.
მისივე თქმით, შეთანხმების შემდეგ, ბაკურიძე ციხეში ადვოკატს უგზავნიდა:
_ ამის შემდეგ სპექტაკლებს დგამდა _ საპატიმროში მიგზავნიდა მის ყოფილ ადვოკატს, რომელიც ამბის საკითხავად შემოდიოდა. რომ ვეკითხებოდი, რა ხდებოდა ჩემს საქმეზე, ის აზრზე არ იყო. ერთი-ორჯერ პრესკონფერენცია გააკეთა რაღაც სხვა თემებზე და გვერდით ჩემი ქალიშვილი მოისვა. როგორც ჩანს, ამით მე მაჩვენებდა, რომ რაღაცას აკეთებდა.
ასე გავიდა თითქმის 3 წელი და მერე მკაცრად მოვთხოვე, თანხის დაბრუნება. მახსოვს, ბოლო ვადა ითხოვა 26 მაისამდე, ბურჯანაძის აქციები რომ იყო. ალბათ, ფიქრობდა ბურჯანაძე სააკაშვილს გადააგდებდა, მაინც გამოგვიშვებდნენ და ეს ფული შერჩებოდა. 26 მაისის მოვლენების შემდეგ დავემუქრე ციხიდან და თანხის დაბრუნება მოვთხოვე. ის 8 000 დოლარი დააბრუნა, 400 დოლარი კი დააკლო, მაგრამ ასე თუ ისე, დააბრუნა. რაც შეეხება მანქანას, ჩემებს ეუბნებოდა, დათომ მაჩუქაო.
რატომ უნდა მეჩუქა თამაზისათვის, რომელსაც არც ვიცნობდი წესიერად? მაგრამ ვიფიქრე, ციხეგამოვლილი კაცია და ასეთ რამეს არ გააკეთებს,-მეთქი. დავის მიუხედავად, მანქანის დაბრუნება არ უნდოდა. ბევრი ვინმე სთხოვდა ამ თანხის დაბრუნებას. მე მაშინ ძალიან ცუდად ვიყავი და სიკვდილს ძლივს გადავრჩი _ ჯერ ტუბერკულიოზის გამო და მერე ნემსი შეცდომით გამიკეთეს. „ნასილკით“ წამიყვანეს, ისე ვიყავი გამხდარი, 70 კილოგრამს ვიწონიდი.
ჩემებიც აწუხებდნენ ბაკურიძეს და 1 600 დოლარი გამოუგზავნია _ მეტად ვერ გავყიდე მანქანა, ძრავი „დავასტუკეო“. გამოსვლის დღიდან ვცდილობდი შეხვედრას და არ შემხვდა. მერე ფეისბუქზე მივწერე და აქეთ დამემუქრა, ხომ იცი, ლაპარაკში ვერ მომიგებ, გაიხსენე შენი „შავი ბუღალტერია“, გინდა გამოგაჭენოო?! გამეცინა _ „შავი ბუღალტერია“ არ მქონდა და რომც მქონოდა, თამაზს ვინ აჩვენებდა?! _ ამბობს სიხარულიძე, რომელმაც ბაკურიძის წინააღმდეგ სარჩელი პროკურატურაში უკვე შეიტანა.
_ ახლა პროკურატურაში მეორეჯერ შევიტანე განცხადება, რომელიც დაეწერა დიდუბის რაიონის პოლიციის განყოფილებას. ტელეფონის ნომერი, როგორც იქნა, გავიგე და გამომძიებელს მივეცი. იმედია, მანქანას მაინც დავიბრუნებ, _ ამბობს სიხარულიძე.
ბიზნესმენის ბრალდებებს კატეგორიულად უარყოფს თამაზ ბაკურიძე, რომლის თქმით, სიხარულიძეს 8 000 დოლარი ბიზნესსაქმიანობისთვის გამოართვა:
_ პროკურატურაში ნამდვილად არის საჩივარი შეტანილი, თუმცა, რა უნდა და რას დაობს, ნამდვილად ვერ გავიგე.
_ ბატონო თამაზ, სიხარულიძისთვის 8 000 დოლარი არ გამოგირთმევიათ?
_ არა, არანაირად.
_ ბატონი დავითი ამბობს, რომ 8 000 დოლარი საქმის გაკეთების სანაცვლოდ გამოართვით…
_ არა, არავის არაფერი არ გამოურთმევია. ეს იყო რაღაც ბიზნსესგეგმისთვის და როდესაც ეს არ გამოვიდა, მან მთხოვა გამეწია შეწყალების კომისიასთან რეკომენდაცია. რეკომენდაცია არა, მაგრამ თხოვნით მივედი ქალბატონ ელენე თევდორაძესთან, რომელმაც მითხრა, რომ კანონით განსაზღვრული ვადა არ იყო გასული და ამაზე საუბარი მხოლოდ ვადის გასვლის შემდეგ იქნებოდა შესაძლებელი.
რაც შეეხება სხვა დანარჩენ დეტალებს, ვუთხარი, რომ მიემართა სამართალდამცავი ორგანოებისთვის. მართლაც მიმართა და როდესაც ვიყავი დაკითხვაზე, მივიტანე ოჯახის წერილი, რადგან მოლაპარაკებებს სწორედ მათთან ვაწარმოებდი. დოკუმენტის თანახმად, მათ ჩემთან არავითარი ფინანსური და ქონებრივი პრეტენზიები არ გააჩნია.
_ როგორც სიხარულიძე ამბობს, თანხა დააბრუნეთ ჩარევის შემდეგ…
_ არავინ არ ჩარეულა. მან მოითხოვა პოლიტპატიმრების სიაში შეყვანა, სხვა პრეტენზიებიც გაუჩნდა. ძალით არავის არაფერი გამოურთმევია. ვუთხარი, აგერაა, რაც მომეცი და მიხედე შენს თავს,-მეთქი.
_ საუბრის დასაწყისში გვითხარით, რომ თანხა არ გამოგირთმევიათ, ახლა კი ამბობთ, რომ ბიზნესისსაქმიანობისთვის გამოართვით…
_ ვერ გაიგეთ სწორად. მას სურდა, რომ ერთობლივი ბიზნესი გვქონოდა და პროექტებზეც მესაუბრებოდა. ამ დროს მთხოვა, პოლიტპატიმრების სიაში ჩასმაშიც დავხმარებოდი. ხელის მოწერა არაფერზე არ შემეძლო და სადაც კი მიმიწვდებოდა, ვიყავი. ამას არ უარვყოფ. როცა არ გამოვიდა, ყველაფერი მიიღო. რა პრეტენზია აქვს, ვერ გავიგე.
მან ხომ მიიღო თანხა? ახლა რა უნდა?! ეს მანქანა თავიდან მაჩუქა. ჩვენ საერთო ნათესავი გვყავს და ციხიდან ახალ გამოსული ვიყავი, როცა მითხრა, რომ ეზოში ეგდო და წამეყვანა. რომ მივედი და ვნახე მანქანა, ფაქტობრივად, განადგურებული იყო. წავიყვანე, ორი ახალი „აკუმულატორი“ ჩავდგი, საბურავები გამოვუცვალე, სარემონტო სამუშაოები ჩავუტარე.
ისიც კი არ მითხრა, რომ ძრავი იყო გაფუჭებული. როცა ვნახე, მანქანის ვერ ივლიდა, ვკითხე, რა მექნა. მითხრა, რომ უნდა გამეყიდა. 1 600 დოლარად გაიყიდა და მივიტანე ის თანხა ოჯახში, _ გვითხრა ბაკურაძემ, რომელიც მზადაა, რომ საკუთარი სიმართლე სასამართლოში ამტკიცოს.
ამავე თემაზე: ბიზნესმენი სიხარულიძე: "პოლიტპატიმართა სიაში ჩასმის სანაცვლოდ ბაკურიძე 3000 დოლარს მთხოვდა"
