ოზურგეთის მუნიციპალიტეტის საკრებულოს რიგგარეშე სხდომაზე გურიის გუბერნატორს გია სალუქვაძეს "ერთიანი ნაციონალური მოძრაობის" დეპუტატმა დავით მჟავანაძემ კითხვით მიმართა:
"ამ დღეებში ქალაქ ოზურგეთის მუნიციპალიტეტის მიერ გამოცხადებულ ტენდერში გაიმარჯვა რუსულმა კომპანია "ლიტომ." ეს კომპანია ერთი კვირაა შეიქმნა. ასევე ტენდერში იღებდნენ მონაწილეობას ქართული კომპანიები, რომლებსაც წლების განმავლობაში მუშაობის გამოცდილება აქვთ. ვფიქრობ, რომ ეს არის კორუფციული გარიგების კიდევ ერთი მაგალითი. ეს კომპანია ქალაქის სანაპიროებზე აპირებს სამუშაოების წარმოებას და ამისთვის საკმაოდ დიდი თანხაა გამოყოფილი."
გია სალუქვაძემ მჟავანაძეს შესთავაზა, რომ მის კაბინეტში მერიის თანამშრომლებთან ერთად გაერკვია ტენდერის დეტალები.
" თუ ეს ასე არ იქნება, როგორც თქვენ ამბობთ, მაშინ მოგიწევთ საჯაროდ თქმა, რომ ტყუილი თქვით," – უთხრა გუბერნატორმა დეპუტატს.
შეხვედრა 2016 წლის ბიუჯეტის დამტკიცების შემდეგ შედგა. გუბერნატორის კაბინეტში ქალაქ ოზურგეთის მერის, ბეგლარ სიორიძესა და "ნაცმოძრაობის" დეპუტატს, დავით მჟავანაძის შორის შელაპარაკება მოყვა.
"პირველ რიგში მინდა გითხრათ, რომ ქალაქ ოზურგეთის მერიამ დაიწყო დიდი პროექტი, რომლის ღირებულება ჯამში 2 000 000 ლარს შეადგენს. ამ სამუშაოების შესასრულებლად გამოაცხადა ტენდერი, რომელშიც მონაწილეობდა 8 კომპანია, მათ შორის იყოს ერთი კვირის წინ დარეგისტრირებული კომპანია. მინდა აღვნიშნო, რომ ამ კომპანიის წარმომადგენლობა დარეგისტრირდა 2015 წლის 30 ნოემბერს, რომლის შემდეგ გამოცხადდა ტენდერი და სწორედ ამ კომპანიას მიენიჭა უპირატესობა.
აქ საუბარი არის იმაზე, რომ მერიამ უპირატესობა მიანიჭა ერთი კვირაში დარეგისტრირებულ კომპანიას, არავინ იცის საიდან მოვიდა და ეს ფაქტორი ძალიან საეჭვოდ მეჩვენება.
ამასთან დაკავშირებით გავაკეთე განცხადება, რომ არსებობდა გონებრივი ეჭვი ამ ტენდერით ყოფილიყო კორუფციული გარიგებები. ეს ეჭვები კი გაამყარა იმ ფაქტმა, როდესაც შეხვედრის დროს, რომელიც გურიის გუბერნატორის კაბინეტში შედგა, გაიქცა ბეგლარ სიორიძე. " – თქვა "გურია ნიუსთან"საუბრის დროს დავით მჟავანაძემ.
"განსაკუთრებული არაფერი არ მომხდარა. გულდასაწყვეტია, რომ "ნაციონალების" ლიდერმა, დემაგოგმა დავით მჟავანაძემ მიაღწია იმას, რომ აეშალა ნერვები ჩვენთვის. სრული პასუხისმგებლობით ვაცხადებ, რომ ქალაქის მერიაში ყველა ტენდერი ჩატარდა კანონის სრული დაცვით და აბსოლუტურად გამჭვირვალედ." – ამბობს ბეგლარ სიორიძე.
მისივე თქმით, ნებისმიერ მოქალაქეს შეუძლია შევიდეს შესაბამის ვებ-გვერდზე და ყველა დოკუმენტი მისთვის ხელმისაწვდომი იქნება.
რაც შეეხება აღნიშნულ ტენდერს, დავით მჟავანაძე ჯერ ამბობდა, რომ საქმე გვაქვს კორუფციასთან. შემდეგ გადააკეთა მისივე ნათქვამი, თითქოს ეჭვი ჩნდება კორუფციასთან დაკავშირებით, მოჰყვა კიდევ სხვა ზღაპრები და ხვალ რას იტყვის, არ ვიცი. მინდა განვაცხადო, რომ ბოლო ტენდერში ჩვენ ჩავდეთ ზემკაცრი მოთხოვნები, რადგან საქმე გვაქვს ძალიან სერიოზულ პროექტთან. რთული სამუშაოებია ჩასატარებელი.
ტენდერში მონაწილეობა მიიღო ცხრა კომპანიამ და გაიმარჯვა ერთმა. ეს არის ერთ-ერთი რუსული კომპანია. თუმცა მას საბოლოო გამარჯვებამდე მიცემული აქვს დრო, დოკუმენტაციის დასაზუსტებლად. ჩვენ არანაირი უფლება არ გვაქვს კომპანიას დისკვალიფიკაცია უმიზეზოდ მივცეთ. თუ ისინი დოკუმენტაციის დაზუსტებას ვერ მოახერხებენ ან ამ მხრივ მათ რამე ხარვეზი ექნებათ, მათ აუცილებლად მიეცემათ დისკვალიფიკაცია და გადავალთ მომდევნო კომპანიაზე. ეს არის და ეს. სხვა არაფერი მომხდარა. კიდევ ერთხელ ვუსვამ ხაზს, რომ ჩვენ არ უნდა ვიყოთ დაკავებულები "ნაციონალური "მოძრაობის ლიდერის წინაშე თავის მართლებით, ძალიან ბევრი საქმე გვაქვს გასაკეთებელი. ამას მოსახლეობა ძალიან კარგად ხედავს. კიდევ ბევრ საქმეს გავაკეთებთ მომავალშიც." _ გვითხრა სიორიძემ.
