უმოწყალოდ დახარჯული მილიონები

(გურია ნიუსი, ოზურგეთი) _ გასული კვირის ოთხშაბათს, “თავისუფალი დემოკრატების” ერთ-ერთმა ლიდერმა თემურ სალუქვაძემ მორიგი პრესკონფერენცია გამართა. მისი აზრით, არ არის ძნელად შესამჩნევი, რომ გურია ყველასგან მიტოვებულია: _ გავიხსენოთ გასართობი ცენტრის “ციცინათელას” მშენებლობა, რომელიც ხელისუფლების მიერ მიწერილ იქნა აჭარის ტერიტორიაზე გახორციელებულ ინვესტიციად. ასევე შეკვეთილის ტერიტორიაზე გამოცხადებულ ეგრეთწოდებული სამშენებლო ბუმის პროცესის ამსახველ სატელევიზიო კლიპებში გურია ხსენებულიც არ არის. უფრო მეტიც, პრეზიდენტმა ერთ-ერთ თავის გამოსვლაში, ისიც კი გვაკადრა, რომ გურულები, თბილისის ნაცვლად, ბათუმში ან ფოთში უნდა დასაქმდნენო. გურია ხელისუფლებისთვის არ წარმოადგენს ღირსეულ კუთხეს, იგი წარმოდგენილი ჰყავთ, როგორც “ვაგონი”, რომელიც შეიძლება ყოველ დღე სხავადასხვა ელმავალს მიაბან.  ამას ხელს უწყობს რეგიონის ხელისუფლების უნიათობა და უსუსურობა.
ზემოხსენებულ შეხედულებას ამყარებს 15 დეკემბერს, ოზურგეთის მუნიციპალიტეტის საკრებულოს სხდომაზე, შპს “საქართველოს გაერთიანებული წყალმომარაგების კომპანიის” ოზურგეთის სერვისცენტრის ხელმძღვანელის იასონ ცინცაძის მიერ გაჟღერებული ფრაზა; ჩემს მიერ დასმულ კითხვაზე, რა ქნას ქალაქის მოსახლეობამ, რომელსაც წყალი არ მიწოდება, ასეთი პასუხი მივიღე _ ქალაქ ოზურგეთის მცხოვრებლებმა წყლის რეზერვუარები უნდა დაამონტაჟონ. როგორც ჩვენთვის ცნობილია. ოზურგეთის წყლის მომარაგებისთვის დაიხარჯა 7 000 000 ლარზე მეტი; სამუშაოები ჩატარდა არაკვალიფიციურად, რის გამოც თავიდანვე პრობლემები შეიქმნა, მიმდინარეობდა ხარვეზების გამოსწორება. მიუხედავად ამისა, მაშინდელმა ადგილობრივმა ხელისუფლებამ ხელი მოაწერა მიღება-ჩაბარების აქტს, რაც, ჩვენი აზრით, დანაშაულია.
_ ბატონო თემურ, იქნებ კონკრეტულად დაასახელოთ, ვინ მოაწერა ხელი მიღება-ჩაბარების აქტს?
_ ჩვენ აუცილებლად ვიტყვით ამის შესახებ, ოღონდ მაშინ, როდესაც მივიღებთ ოფიციალურ დოკუმენტს. მოსახლეობის მოთხოვნით ვქმნით ჯგუფს, სპეციალისტებთან და არასამთავრობო სექტორთან ერთად შევისწავლით აღნიშნულ საკითხს, რათა გამოძებნოს ოპტიმალური მატერიალური თუ ტექნიკური შესაძლებლობა, რომ მოსახლეობას მიეწოდოს სასმელი წყალი, _ ამბობს სალუქვაძე.