ყოფითი გასაჭირის სათავე, აქაურთა თქმით, უმუშევრობაა. მაღალმთიან და საკმაოდ რთული რელიეფის მქონე სოფელში უპირველეს პრობლემად უგზოობა სახელდება _ ისედაც მეწყერსაშიშ ზონაში მდებარე გზის კატასტროფულად დაზიანება ჰესის მშენებლობის გამო წარმოშობილმა ბზარებმა და ნაქცევებმა გამოიწვია. ეს ყველაფერი ახალი მეწყრის წარმოქმნის საშიშროებას ქმნის. სწორედ ამის გამო, ახლახან აქ მოსახლეობამ აქციაც კი გამართა.
სოფელ მთისპირში ბეტონიტური თიხის გადამამუშავებელი ქარხანაც მალე ამოქმედდება. ერთადერთ შემოსავლის წყაროდ სოფელში თხილი მიიჩნევა, რომლის შემყურეც, აქ მცხოვრებლები წლიდან წლამდე არიან.
ოზურგეთის მუნიციპალიტეტის სოფელ მთისპირის რწმუნებულის ვლადიმერ ჩავლეშვილის თქმით, სოფელში 281 კომლი და 931 მცხოვრებია. მთისპირის თემში შემავალი სოფლებია _ ვანისქედი, ოქროსქედი და სოფელი უკანავა. სოფელში ფუნქციონირებს ამბულატორია, მუშაობს ექიმი გივი ბელიჯანაშვილი, რომელიც ღირსეულად ემსახურება მაღალმთიან სოფელს.
უმუშევრობა და კვლავ უმუშევრობა, აი, ის, რაც სოფელს წელში წყვეტს. მთისპირის მკვიდრნი “გურია ნიუსთან” საუბარში აღშფოთებას ვერ მალავენ იმის გამო, რომ აქ მშენებარე ჰესზე დასაქმებულ ადგილობრივ მცხოვრებლებს დღეში 7 ლარი გადაუხადეს.
_ მთელი დღის მანძილზე, მძიმე ფიზიკური შრომით დაკავებულ ადამიანს, მხოლოდ 7 ლარი უნდა გადაუხადო? _ გვეკითხებიან ისინი.
ჯემალ ბოლქვაძე, სოფელ მთისპირის სამარშრუტო ტაქსის მძღოლი: _ არაფერს არ ვითხოვთ მეტს, ოღონდაც ეს გზა გაგვიკეთონ. თავადაც ხომ ხედავთ, რა მდგომარეობაა, ასე ყოფნა სანამდე შეიძლება? შარშან შემოდგომაზე შეაკეთეს, დაყარეს 5-6 მანქანა ხრეში და მორჩა. თქვეს, რომ ეს გააკეთეს სოფლის დახმარების პროგრამით.
ტარიელ ბერაძე: _ გვაწუხებს უმუშევრობა, უგზოობა, მეწყერი. ნახეთ ეს დამეწყრილი გზა და მიხვდებით, რა დღეშიც ვართ. კი, ბატონო, შენდება ჰესი და კარგია, მაგრამ გზა ისე მოსპეს, ამ ზამთარში ფეხმძიმე სამშობიაროდ ძლივს ჩავიყვანეთ ოზურგეთამდე. საავადმყოფოში კი უთხრეს, დროზე რატომ არ ჩამოხვედიო!
გულნარა ვაშალომიძე: _ ქვრივი ქალი ვარ, მყავს ოთხი შვილი, ოჯახში ყველა უმუშევარი ვართ. ერთი შვილი სტუდენტი მყავდა და სწავლას თავი დავანებებინე, რადგან ვერ გადავიხადე საფასური. არანაირი შემოსავალი არ გვაქვს, ერთადერთი თხილია, რომლითაც მთელი წლის განმავლობაში თავი გაგვაქვს. სოფელში ყველაფერი ჩამკვდარია, აქედან თურქეთში დადიან სამუშაოდ, მე სად გავუშვა ბავშვები? ახალგაზრდა ხარ და იმუშავეო, მითხრეს. დამასაქმონ მაშინ, არაფერს ვითაკილებ ჩემი შვილების საკეთილდღეოდ, მაგრამ, სად? _ გვეკითხება ოთხი ობოლი შვილის დედა გულნარა ვაშალომიძე.
ნანული თხილაიშვილი: _ რაღაც კი კეთდება, მასე ვერ ვიტყვით, მაგრამ არ არის საკმარისი. სოფლის განვითარების მხარდამჭერი პროგრამით გათვალისწინებული თანხებით გააკეთეს წყალსადენი. ჩვენი დიდი პრობლემა უგზოობაა. მე პენსიონერი პედაგოგი ვარ, მაქვს რაღაც შემოსავალი, მაგრამ ვინც დაუსაქმებელია, იმან რა უნდა ჰქნას? როდის უნდა გამოჩნდეს ვინმე დამსაქმებელი, რომ ხალხს ეშველოს?
მედეა თალაკვაძე: _ იმედი გვაქვს, ჰესის მშენებლობა რომ დასრულდება, ჩვენი სოფლის მცხოვრებლებს დაასაქმებენ. ისე, ძალიან ღარიბი სოფელია, შემოსავალი არაფერი არ არის. ინდივიდუალური გამრიცხველიანება გვინდა, წყლის მილებია შესაცვლელი. აქ მცოცავი თიხაა, რომელიც არ ატარებს წყალს. მილები რომ შეიცვლება და ეს წყალი არ დაიღვრება, ნაკლები იქნება მეწყერიანობა.
_ სოფლის მხარდამჭერი პროექტით რა გაკეთდა?
_ ერთ მონაკვეთზე წყლის მილები შეცვალეს, მაგრამ სოფელი უფრო დიდია და თუ იქნება სახსრები, ალბათ, გააკეთებენ.
სოფელ მთისპირის რწმუნებული ვლადიმერ ჩავლეშვილი, “გურია ნიუსთან” სოფელში არსებულ პრობლემებზე საუბრობს:
_ პრობლემები, როგორც ყველგან, ასევეა ჩვენთანაც, მაგრამ გამოუსწორებელი არაფერია. პირველ რიგში, მაინც უმუშევრობის პრობლემას დავასახელებდი. აქ არის დაწყებული ჰესების მშენებლობა, ახლა მიმდინარეობს “ბახვი 3” ჰესის მშენებლობა, სადაც 50-მდე ადგილობრივია დასაქმებული. ამასთან ერთად, მოქმედებს ოჯახური სასტუმროები, სადაც დაბინავებულები არიან ჩამოსული მუშა ხელი, ინჟინრები. პარალელურად. “ბახვი 2” და “ბახვი 5” ჰესების მშენებლობა მიმდინარეობს, სადაც 16 ადამიანია დასაქმებული. ყველაზე სასიხარულო, რაც მთისპირში ხდება, არის ბეტონიტური თიხის საბადოსთან დაკავშირებით, მუშაობის დაწყებაზე დადებითი პასუხი, რომ გაზაფხულზე სერიოზული მშენებლობა დაიწყება. აქ 60 -70 ადამიანი, მთისპირელები უნდა დასაქმდნენ.
_ ბატონო ვლადიმერ, სოფელ მთისპირში, რამდენიმე დღის წინ, მოსახლეობამ აქციაც მოაწყო. რას ითხოვდნენ ისინი?
_ გზებთან დაკავშირებულ პრობლემებზე ისაუბრეს და გზის აღდგენა მოითხოვეს. თავადაც ნახეთ, ალბათ, გზები როგორ არის დაზიანებული, თუმცა, ეს უხვნალექიანი ზამთრის ბრალიც იყო. გარდა ამისა, ამ გზებზე დადიან მძიმე მანქანები, რომლებიც ჰესის მშენებლობაზე მუშაობენ. აქედან გამომდინარე, გზაზე გაჩნდა ნაპრალები, ნიადაგში ჩაიღვარა უხვი ნალექი და გზა უკვე გზას აღარ ჰგავს. შეწუხდა მოსახლეობა და საკუთარი სათქმელი თქვა.
_ რა გააკეთეთ შარშან სოფლის განვითარების მხარდამჭერი პროგრამით?
_ ყველაზე დიდი პრობლემა რაც იყო ჩვენთან, ესაა ამორტიზირებული წყლის მილები, განსაკუთრებით _ ცენტრალური მილები. მოხდა ეტაპობრივი შეცვლა, თითქმის, ყველა უბანში. ვანისქედში წინა წლების განმავლობაში ახალი სისტემა გაკეთდა. დაახლოებით, 900 მეტრი სიგრძის და 300 -350 მეტრის სიმაღლის მთიდან ხდება ახალი მილსადენის შემოყვანა სოფელში. 38 კომლი მიიღებს ამ წყალს.
_ რამდენი სოციალურად დაუცველი ოჯახი გყავთ?
_ ასეთი სულ 30 ოჯახია .
_ არის ისეთები, ვისაც ეკუთვნის დახმარება და არ აქვს?
_ თითქმის, არა.
_ რა არის თქვენი სოფლის შემოსავლის წყარო?
_ ძირითადად, თხილი. მოჰყავთ კარტოფილიც.
