გურიის რამდენიმე სოფელს მესამე დღეა ელექტროენერგია არ მიეწოდება. განსაკუთრებით რთული მდგომარეობაა ჩოხატაურის მუნიციპალიტეტში. 30 დეკემბრის შემდეგ უშუქოდაა დარჩენილი ზემო და შუასურები, ვანზომლეთი, ბუკნარი.
_ მხოლოდ თქვენი იმედი გვაქვს. იქნებ დაგვეხმაროთ. სამი დღეა უშუქოდ ვართ. გვესმის რომ თოვლია, მაგრამ ამდენი ხნის განმავლობაში როგორ ვერ მოახერხეს გაწყვეტილი სადენების აღდგენა?!
ახალ წელს ბნელში შევხდით. სადაა ხელისუფლება? ჩოხატაურის ცენტრში კონცერტზე რომ სიტყვით გამოდიოდნენ, ამ დროს ასობით ოჯახი უშუქოდ შეხვდა ახალ წელს.
ეს არაა ხალხზე ზრუნვა! ჩვენ რა შუაში ვართ, კერძო კომპანიის ბრალიაო გვეუბნებინა. ჩვენ კერძო კომპანია არ აგვირჩევია, ხელისუფლება ავირჩიეთ და მათი ვალდებულება ჩვენი დაცვაა, _ აღნიშნეს "გურია ნიუსთან" საუბრისას ვანზომლეთელებმა.
იგივე პრეტენზიები აქვთ ბუკნარის, ზემო და შუა სურების მოსახლეობასაც.
_ მთას ყურადღებას ვაქცევთო, ჩვენთვის პრიორიტეტულიაო, სოფლები არ უნდა დაიცალოსო და ახალ წელს ელექტროენერგიის გარეშე დაგვტოვეს! ამათ იმედზე როგორ უნდა ვიყოთ. ზაფხულში გაკეთებული ბოძები წააქცია 70-მა სანტიმეტრმა თოვლმა!!!
აი, ასე აკეთებენ საქმეს და ფულს! ჩვენი ხელისუფლება კი დუმს და სულ არ ადარდებს ჩვენი ბედი. არჩევნებზე ამოვლენ და ხმა მოგვეცითო გვეტყვიან. ხმას კი არა, ქვას არ მივცემთ, _ გვითხრეს სურებლებმა.
"ენერგო პრო ჯორჯიას" ჩოხატაურის სერვისცენტრის მენეჯერის ვანო ჭარბაძის თქმით სარემონტო სამუშაოები ამ წუთებშიც მიმდინარეობს:
_ ვიცით, რომ პრობლემებია და ეს ჩვენთვისაც საწყენია. 24 საათის განმავლობაში მუშაობენ ჩვენი თანამშრომლები. რამდენიმე წუთის წინ აღვადგინეთ მაღალი ძაბვიოს გადამცემი ხაზები სოფელ დიდვანსა და ქვენობანში.
შესაბამისად, დენის ჩართვა მოხერხდა. სურებში ზვავი ჩამოწვა და დამატებითი პრობლემები შეიქმნა. ვეცდებით, რომ ხვალ აღვადგინოთ. რაც შეეხება ვანზომლეთს, სარემონტო სამუშაოები ახლაც მიმდინარეობს და ყველაფერს ვაკეთებ იმისთვის, რომ სოფელს დენი უმოკლეს ვადაში მივაწოდოთ, _ გვითხრა ჭარბაძემ.
მოსახლეობა ამბობს, რომ "ენერგო პრო ჯორჯიას" წინააღმდეგ მასშტაბურ აქციებს დაიწყებენ. კომპანიის ამბონენტების თქმით, დენის გათიშვა მხოლოდ სტიქიის ბრალი არ არის:
_ ათი თეთრი რომ დაგრჩეს გადაუხდელი შუქს გითიშავენ. ყოველთვიურად უამრავი თანხა მიაქვთ. განსაკუთრებით იმ დასახლებებიდან, სადაც გამრიცხველიანება არ მომხდარა და თანხას კომუნალური მრიცხველის მიხედვით ახდევინებენ მოსახლეობას.
ხაზების და ბოძების გამოსაცვლელად თანხის დახარჯვა არ უნდათ. ვისი ბრალია რომ ბოძები ძველია? თავს არ იწუხებენ. პასუხს არავინ სთხოვს და რატომ დახარჯავენ ზედმეტ თანხას! ამათ რომ კითხოთ სულ სტიქიაა, არადა, პატარა ნიავზეც კი ითიშება დენი, _ აღნიშნავენ "ენერგო პრო ჯორჯიას" აბონენტები.
