აიპ-ების შენახვაზე 2 837 057 ლარი იხარჯება!

“დასასაქმებელი ჯერ კიდევ ბევრი ნაციონალი და მათი მხარდამჭერი დარჩა. წინასაარჩევნო პერიოდში და არჩევნების დღეს აქტიურობით გამორჩეული ნაცმოძრაობის მრავალი აქტივისტი ჯერ კიდევ დაუსაქმებელია”, _ ამ შინაარსის სტატია “გურია ნიუსში”  2010 წლის 9 აგვისტოს (#62) გამოქვეყნდა.
როცა ოზურგეთის მუნიციპალიტეტის ახალარჩეული საკრებულო შვიდი არასამეწარმეო იურიდიული პირის (აიპ-ის) დაფუძნების საკითხს განიხილავდა, გარდა სოფელ ოზურგეთის მაჟორიტარის გია ხუჭუასა და ოპოზიციონერი დეპუტატის ლელა ნაცვალაძისა, კითხვები სხვა დეპუტატებს არ გასჩენიათ.
ლელა ნაცვალაძე დაინტერესდა, თუ რა საჭიროა ახალი აიპ-ები, რადგან არსებობს სპორტის განვითარების სამსახური, რომლის ბიუჯეტი ათიათასობით ლარია. ნაცვალაძემ ამ სფეროზე დამატებით დახარჯულ თანხებს არაეფექტური უწოდა.
“არსებობს წინა მოწვევის საკრებულოს დადგენილება სანერგე მეურნეობის პროექტის შესახებ. ამ პროექტით შესაძლებელია ყველა იმ ფუნქციების გახორციელება, რის გამოც კიდევ ერთი აიპ-ი უნდა შეიქმნას. მიმაჩნია, ამისთვის ბიუჯეტიდან გადახდილი თანხა არამიზნობრივი ხარჯია”, ჴ თქვა საკრებულოს ნაციონალმა დეპუტატმა გია ხუჭუამ და აქვე დასძინა, რომ არსებობს სოფლის მეურნეობის სამმართველო, საკრებულოში შესაბამისი კომისია; ამასთან, აგრონომის ინსტიტუტი ყველა მუნიციპალიტეტში დაინერგა.
“გურია ნიუსის” კითხვაზე, რამდენი ათასი ლარით დაფინანსდებიან არასამეწარმეო იურიდიული პირები, რამდენი შტატი შეიქმნება და ვინ დასაქმდება, საკრებულოს თავმჯდომარემ ალეკო მამეშვილმა უპასუხა, რომ ხელმძღვანელს თავად დანიშნავს, რაც შეეხება დაფინანსებას, რა საშუალებასაც მისცემს ბიუჯეტი, იმის მიხედვით მოხდება(?!).
“…კერძო სამართლის იურიდიული პირების მიერ, საკრებულოს თავმჯდომარესთან შეთანხმებულ იურიდიული პირების თანამდებობათა დასახელებას, საშტატო განრიგსა და თანამდებობრივ სარგოს, ხოლო რაც შეეხება იმ პირთა თანამშრომელთა თანამდებობრივ დასახელებებს და სახელობით სიას, რომლებიც დასაქმებულნი არიან საკრებულოს მიერ დაფუძნებულ იურიდიულ პირებში, შეგიძლიათ, გამოითხოვოთ შესაბამისი დაწესებულებიდან, ვინაიდან საკრებულოს აღნიშნულ საკითხზე ოფიციალური ინფორმაცია არ გააჩნია”, _ ამ შინაარსის ოფიციალური წერილი ოზურგეთის მუნიციპალიტეტის საკრებულოდან 15 დეკემბერს, მას შემდეგ მივიღეთ, რაც საკრებულოს თავმჯდომარეს, საქართველოს ზოგადი ადმინისტრაციული კოდექსის მე-3 თავის თანახმად, საჯარო ინფორმაციის მოწოდება მოვთხოვეთ.
“გურია ნიუსმა” ოზურგეთის მუნიციპალიტეტის მიერ ჩამოყალიბებული კერძო სამართლის ყველა არასამეწარმეო (არაკომერციული) იურიდიული პირების (აიპ-ების) ჩამონათვალი მოითხოვა ისევე, როგორც დეტალური ინფორმაცია ოზურგეთის მუნიციპალიტეტის ბიუჯეტიდან თითოეული აიპ-ის დაფინანსების შესახებ, იმ პირთა სახელობითი სია და თანამდებობრივი სარგო, ვინც აიპ-ებშია დასაქმებული.
რაც შეეხება დასაქმებულთა სახელობით სიას, როგორც ზემოთ აღვნიშნეთ, საკრებულოს იგი არ მოუწოდებია. ოფიციალური ინფორმაციის თანახმად კი, ოზურგეთის მუნიციპალიტეტის საკრებულომ, მისი უფლებამოსილების ცნობის დღიდან _ დღემდე, შვიდი არაკომერციული იურიდიული პირი დააფუძნა, გასული მოწვევის საკრებულომ კი _ ცხრამეტი.
ახალი მოწვევის საკრებულოს მიერ შექმნილ შვიდ აიპ-ში 39 ადამიანია დასაქმებული, ხოლო წინა მოწვევის საკრებულოში _ დაახლოებით 5-ჯერ მეტი. ზუსტ ციფრს იმ მოტივით ვერ გამოიანგარიშებ, რომ ჩვენს მიერ მოთხოვილი დეტალური ინფორმაცია არ მიგვიღია.
“ურეკი-შეკვეთილის განვითარების ცენტრში” ოთხი ადამიანია დასაქმებული. დირექტორის ხელფასი 550 ლარს შეადგენს. სპეციალისტების ხელფასი საინფორმაციო მომსახურების, საფინანსო მომსახურების და რესურსების მართვის საკითხებში 400-400 ლარს. თვეში მათი სახელფასო ფონდი 1750 ლარია.
“ოზურგეთის მუნიციპალიტეტის კომუნალური მომსახურების ცენტრის” საშტატო განრიგსა და თანამდებობრივ სარგოს, საკრებულოს თავმჯდომარემ ალეკო მამეშვილმა ხელი 2010 წლის 1 დეკემბერს მოაწერა. მისი ხელწერით აღნიშნულ აიპ-ში 12 ადამიანი დასაქმდა. დირექტორის ხელფასი 550 ლარით განისაზღვრა, მოადგილის _ 480 ლარით, მთავარი სპეციალისტის საფინანსო დარგში _ 450, სპეციალისტის საფინანსო დარგში _ 370 ლარით. კონტროლის განყოფილების უფროსის _ 450 ლარით. მთავარ სპეციალისტს შესყიდვების დარგში 370 ლარი აქვს ხელფასი. ასევე _ 370-370 ლარი აქვთ მთავარ სპეციალისტს მომარაგების დარგში და იურისტს. ბუღალტერ-ოპერატორს, სპეციალისტს მატერიალურ-ტექნიკურ საკითხებში, სპეციალისტს საქმის წარმოებისა და საორგანიზაციო დარგში _ 350-350 ლარი. ასევე 350-ლარიანი ხელფასი აქვს აღნიშნული აიპ-ის სპეციალისტს.
მამეშვილმა 27 ოქტომბერს “სოფლის მეურნეობის განვითარების და დასაქმების ხელშემწყობი ცენტრის” საშტატო განრიგს, თანამდებობათა დასახელებას და მათ თანამდებობრივ სარგოს მოაწერა ხელი. აღნიშნულ აიპ-ში ექვსი ადამიანია დასაქმებული, რომელთა ხელფასებზე თვეში 2550 ლარი იხარჯება. დირექტორს 550 ლარი ერგო, სპეციალისტს სოფლის მეურნეობის დაგეგმარების საკითხებში, სპეციალისტს მექანიზაციისა და სოფლის მეურნეობის პროდუქციის გადამუშავების საკითხებში, სპეციალისტს აგრონომიული მომსახურების საკითხებში, სპეციალისტს ფერმერებთან ურთიერთობის საკითხებში და სპეციალისტს ვაჭრობისა და ეკონომიკური ურთიერთობების საკითხებში კი _ 400-400 ლარი.
ხუთი ადამიანი დასაქმდა “სპორტის განვითარების, საინფორმაციო-ანალიტიკური და მეთოდური დახმარების ცენტრში”, რომელთა ხელფასებზე თვეში 2200 ლარი დაიხარჯება. დირექტორს, როგორც სხვა აიპ-ების დირექტორებს 550 ლარი აქვს ხელფასი. მოადგილეს სასპორტო-სააღმზდელო საკითხებში _ 450. მთავარ სპეციალისტს საფინანსო აღრიცხვის საკითხებში, მთავარ სპეციალისტს საინფორმაციო-ანალიტიკური მომსახურების საკითხებში და ასევე, მთავარ სპეციალისტს მეთოდური დახმარების საკითხებში _ 400-400 ლარი.
არასამეწარმეო (არაკომერციული) იურიდიული პირი “გომისმთას” საშტატო განრიგი და თანამდებობრივი სარგო 6 სექტემბერს განსაზღვრეს. “გომისმთის” დირექტორს თვეში 550 ლარი აქვს ხელფასი, მთავარ სპეციალისტს ტურიზმის საკითხებში კი _ 400 ლარი.
“ოზურგეთის მუნიციპალიტეტის სკოლამდელი სააღმზრდელო-საგანმანათლებლო ცენტრი” ოფიციალურად 15 სექტემბერს შეიქმნა. აქ დასაქმებული ათი ადამიანის სახელფასო ფონდი თვეში 4100 ლარია. დირექტორს აქვს 550 ლარი, დირექტორის მოადგილეს _ 480, მთავარ სპეციალისტს საფინანსო დარგში _ 450, სპეციალისტს საფინანსო დარგში კი _ 400 ლარი. 370-370 ლარი აქვთ სპეციალისტებს _ სააღმზრდელო დარგში, შესყიდვების დარგში, მატერიალურ-ტექნიკური უზრუნველყოფის დარგში, საქმის წარმოებისა და საორგანიზაციო დარგში, საზოგადოებასთან ურთიერთობის დარგში. ასევე, 370 ლარი აქვს აღნიშნულ აიპ-ში დასაქმებულ იურისტს. სულ  ხარჯები 253 137 ლარია. აღნიშნული აიპის შექმნამდე, საბავშვო ბაღებზე, 2010 წლის ბიუჯეტის თანახმად, 751 048 ლარი იყო გამოყოფილი.
“კეთილმოწყობისა და არქტიტექტურული დაგეგმარების ცენტრის” ხარჯები 2010 წლის ბიუჯეტით 60 425 ლარია, “მუნიციპალური ტრანსპორტის ხელშეწყობის ღონისძიებების” ხარჯები კი 37 700 ლარს შეადგენს. “დასუფთავების სამსახური” 351 676 ლარით ფინანსდება. “მოსწავლე ახალგაზრდობის სახლი” კი _ 67 625 ლარით.
“სპორტის განვითარების ცენტრის” ხარჯები წლის დასაწყისში 180 347 ლარით განისაზღვრა. საფეხბურთო კლუბის “მერცხალის” კი _ 106 640 ლარით. “სტადიონი” _ 38 570, “საჩოგბურთო სკოლა” _ 13 748 ლარით, “სპორტსკოლა” კი 114 674 ლარით ფინანსდება. “სპორტის განვითარების კომპლექსის” ხარჯები 2010 წელს 5 364 ლარს შეადგენს, “საბავშვო თეატრის” _ 47 955 ლარს, “მუსიკალური სკოლის” _ 73 200 ლარს, “თანამედროვე სახვითი ხელოვნების ცენტრის” _ 54 300 ლარს.
ანსამბლ “გურიას” დაფინანსება 2010 წელს 98 112 ლარს შეადგენს, “ურეკის კულტურის სახლის” _ 43 581 ლარს, “კულტურის და დასვენების პარკის” _  45 728 ლარს, “ბიბლიოთეკების” _ 88 811 ლარს, ხოლო “კულტურის სახლების” დასაფინანსებლად ბიუჯეტიდან 270 747 ლარი იხარჯება; მუზეუმებისთვის _ 71 370 ლარი.
ჯამში, ზემოთ აღნიშნული 26 აიპ-ების დაფინანსებაზე სუბსიდიების სახით, 2010 წელს 2 837 057 ლარი გამოიყო.