ლანჩხუთის მუნიციპალიტეტის სოფელ სუფსაში მცხოვრები 57 წლის ვაჟა ჯიბლაძე სუფსის პოლიციის განყოფილების თანამშრომლებს სიტყვიერი და ფიზიკური შეურაცხყოფის მიყენებაში ადანაშაულებს:
_ სანადიროდ მივდიოდით, როცა პოლიციის თანამშრომლებმა გაგვაჩერეს. ჯერ სიტყვიერი შეურაცხყოფა მიაყენეს, შემდეგ პოლიციის მანქანაში ჩასვეს და ცემა დაუწყეს, _ აღნიშნა ჩვენთან საუბრისას ფაქტის თვითმხილველმა, ვაჟა ჯიბლაძის ძმისშვილმა კახა ჯიბლაძემ.
შინაგან საქმეთა სამინისტროს პრესსამსახურის ინფორმაციით, საქმეზე გამოძიება სისხლის სამართლის კოდექსის 118-ე მუხლითაა დაწყებული.
_ ჯიბლაძემ განცხადებით ფოთის პოლიციას მიმართა და შესაბამისად, გამოძიებას ფოთის პოლიციის სამმართველო აწარმოებს, _ გვითხრეს პრესსამსახურში.
კახა ჯიბლაძე, გუშინ, „გურია ნიუსთან“ საუბრისას ამბობდა, რომ ბიძამისი სასტიკად იყო ნაცემი და სახლში იწვა. გვითხრა ისიც, რომ მომხდარის დეტალებზე დღეს ისაუბრებდა, თუმცა, ცოტა ხნის წინ, ვაჟა ჯიბლაძემ ჟურნალისტებთან საუბარზე უარი განაცხადა.
როგორც კახა ჯიბლაძემ გვითხრა, მათ ურჩიეს, რომ გამოძიების ინტერესებიდან გამომდინარე, ჟურნალისტებს არ ესაუბრონ, თუმცა, ვისგან მიიღეს ეს „რჩევა“ არ აკონკრეტებს.
ვაჟა ჯიბლაძის, როგორც სიტყვიერ, ასევე, ფიზიკურ შეურაცხყოფას კატეგორიულად უარყოფენ სუფსის პოლიციის თანამშრომლები. როგორც მათ გვითხრეს, ჯიბლაძე ოპერატიული ინფორმაციის საფუძველზე, შემოწმების მიზნით გააჩერეს:
_ გვქონდა ინფორმაცია, რომ ვაჟა ჯიბლაძე იმყოფებოდა ნარკოტიკული ზემოქმედების ქვეშ და ამიტომ გავაჩერეთ. დაკავების დროს გაგვიწია წინააღმდეგობა და შეიძლება ითქვას, ძალით ჩავსვით მანქანაში. გადავიყვანეთ ნარკოლოგიურში, სადაც შემოწმების შედეგად ინფორმაცია დადასტურდა და ხელწერილის საფუძველზე სასამართლომ გაუშვა, _ გვითხრეს სუფსის პოლიციის თანამშრომლებმა.
მათივე ინფორმაციით, ვაჟა ჯიბლაძე ნარკოტიკების მოხმარებისთვის, 260-ე მუხლით ერთხელ უკვე ნასამართლევია და ის ახლა მეტადონის პროგრამაშია ჩასმული.
ჩვენთან საუბრისას ამ ინფორმაციას კახა ჯიბლაძეც ადასტურებს:
_ ნარკოტიკის ზემოქმედების ქვეშ იქნებოდა, რადგან სახელმწიფო აძლევს ნარკოტიკს და პროგრამაშია ჩართული, _ გვითხრა კახა ჯიბლაძემ, რომელიც ამბობს, რომ ბიძამისს სამართალდამცველებისთვის წინააღმდეგობა არ გაუწევია.
პოლიციების თქმით, ჯიბლაძემ ფოთის საავადმყოფოს და შემდეგ პოლიციას მომხდარიდან 24 საათის შემდეგ მიმართა, რაც ეჭვებს ბადებს:
_ თუკი ვცემეთ, დაზიანებები ჰქონდა, საავადმყოფოს და პოლიციას დაუყონებლივ, სასამართლო დარბაზიდან გასვლის შემდეგ რატომ არ მიმართა? 24 საათი არაა ცოტა დრო და არავინ იცის, რა მოხდა ამ ხნის განმავლობაში, _ აღნიშნავენ ჩვენთან საუბრისას პოლიციელები.
ჩვენ მიერ მოპოვებული ინფორმაციით, ვაჟა ჯიბლაძეს ხელთ აქვთ სამედიცინო დასკვნა, რომელშიც მის სხეულზე არსებული დაზიანებები დადასტურებულია.
პოლიციელები ვარაუდობენ, რომ მცირე დაზიანებები, ე.წ. „დაბეჟილობა“ ჯიბლაძემ მაშინ მიიღო, როცა სამართალდამცველებს ფიზიკურ წინააღმდეგობას თავად უწევდა. არ გამორიცხავენ იმასაც, რომ ჯიბლაძემ დაზიანებები სხვაგან მიიღო და ახლა პოლიციელებს აბრალებს.
კახა ჯიბლაძის თქმით, ყველაფერს გამოძიება და სასამართლო დაადგენს და მანამდე მათი მხრიდან კომენტარი არ გაკეთდება.
ამ ეტაპზე საქმეს ისევ ფოთის პოლიცია იძიებს. საქმეში ამ დრომდე არ ჩართულა გენერალური ინსპექცია. საქმეს სახალხო დამცველიც სწავლობს.
