ოფიციალური დოკუმენტების საფუძველზე, სახელმწიფო რწმუნებულის – გუბერნატორის ადმინისტრაციას 2015 წლის განმავლობაში გაცემული პრემიებისა და დანამატების შესახებ ინფორმაციის ოფიცალურად გამოთხოვის მიზნით "გურია ნიუსმა" 2016 წლის 5 იანვარს მიმართა.
გურიის გუბერნიის პრესსამსახურმა 11 იანვარს ოფიციალური პასუხი გამოგვიგზავნა. აღასანიშნავია, რომ დოკუმენტში აპარატის უფროსის, მდივან რეფერენტის , მთავარი სპეციალისტის, სამსახურის უფროსების, უფროსის მოადგილეებისა და სპეციალისტების სახელი და გვარი გაშიფრული არ არის, მითითებულია მხოლოდ პრემიების ოდენობა. ასევე აღსანიშნავია, რომ თანამშრომლებზე გაცემული პრემია ერთნაირი ოდენობის არაა.
გუბერნიიდან მოწერილი ოფიციალური წერილის თანახმად, 2015 წელს წინასაახალწლოდ გაცემულმა პრემიების ჯამმა სულ 7010 ლარი შეადგინა. რამდენიმე თვის წინ გაცემული პრემია კი, რომელიც მხოლოდ გუბერნატორის მოვალეობის შემსრულებელს, გუბერნატორს, მდივან -რეფერენტსა და მთავარ სპეციალისტს აქვს აღებული, 38 386 ლარს შეადგენს.
სახელმწიფო რწმუნებულ- გუბერნატორს წინასახალწლოდ 2 950 ლარი აქვს აღებული, მის პირველ მოადგილეს ქეთი მოისწრაფეშვილს – 2360 ლარი, მოადგლეებმა იოსებ ერქომაიშვილმა და გია ებრალიძემ 2 250 – 2250 ლარი აიღეს.
მდივან რეფერენტს – 1360, აპარატის უფროსს – 3100, სამსახურის უფროსის მოადგილეს – 1180 ლარი, მთავარ სპეციალიტს – 1500 , მთავარ სპეციალისტს – 750, უფროს სპეციალისტს – 680, უფროსს სპეციალისტებს 1360 -1360 ლარი ერგოთ, ერთ-ერთი სამსახურის უფროსს 1550 ლარი, სამსახურის უფროსის მოადგილეს კი 1180 ლარი ერგოთ. ერთ-ერთმა მთავარმა სპეციალისტმა 1930 ლარი , მთავარმა სპეცილისტებმა 1500 – 1500 ლარი მიიღეს, უფროსმა სპეცილისტებმა 1360 -1360 ლარი აიღეს, რიგით სპეციალისტებს კი 1100 და 550 ლარი ერგოთ.
მძღოლს 1650 ლარი ერგო, დამლაგებელს- 960 ლარი, მატერიალურ უზრუნველყოფის საკითხებში სპეცილიტს – 1750 ლარი, საქმის წარმოების საკითხებში სპეცილიტსს – 750 ლარი, მთავარმა სპეცილისტმა საბუღალტრო საკითხებში – 1900 ლარი მიიღო.
2015 წელს გუბერნატორის მოვალეობის შემსრულებელს ქეთევან მოისიწრაფეშვილს – 12 732 ლარი აქვს აღებული.
გუბერნატორმა გია სალუქვაძემ 22 668 ლარი აიღო.
მდივან რეფერენტს – 2176 ლარი, ერთ-ერთ მთავარ სპეციალიტს – 810 ლარი ერგო.
აღნიშნულთან დაკავშირებით გურიის გუბერნატორი გია სალუქვაძე "გურია ნიუსთან" შემდეგს აცხადებს:
"წინა ხელისუფლების დროს არსებული პრაქტიკა დღეს შეიცვალა და ყოველთვიური პრემია აღარ გაიცემა. გურიის რეგიონში ინფრასტრუქტურული თუ სხვა მნიშვნელოვანი პროექტი წარმატებით განხორციელდა, რაშიც კოორდინაციის კუთხით გურიის გუბერნია აქტიურად ჩაერთო. აქედან გამომდინარე, სამხარეო ადმინისტრაციის თანამშრომლებზე სადღესასწაულო (საახალწლო) პრემიაც გაიცა".
