23-25 მარტს, ქალაქ სტამბულში, გაიმართა მსოფლიო ჩემპიონატი შოტოკან-კარატეში, რომელშიც 16 ქვეყნის 2 200 სპორტსმენი მონაწილეობდა. საქართველოს ნაკრების შემადგენლობაში ლანჩხუთის სპორტული ცენტრის 6 კარატისტი იყო. ლანჩხუთელთა გამოსვლა პირველივე დღესვე წარმატებული აღმოჩნდა _ 13 წლის გიორგი კეჭეხმაძემ 7 ბრძოლა მოიგო და პირველი ადგილი დაისაკუთრა. სხვათა შორის, გიორგი 2011 წელს კარატეს-დოს ფედერაციამ ქვეყნის საუკეთესო სპორტსმენად დაასახელა. იმავე დღეს 15 წლის ნიკა ჩხაიძემ ვერცხლის მედალი მოიპოვა.
მეორე დღეს ტრადიციულ კარატეში გაიმართა ორთაბრძოლები, სადაც ჩემპიონები გახდნენ: გიორგი ზენაიშვილი (9 წლის, მწვრთნელი ლაშა ბერიძე), გიორგი კეჭეხმაძე, რომელმაც პირველივე დღესვე გვასახელა, და 13 წლის ასაკში, ოღონდ მძიმე წონაში, თორნიკე ცინცაძე, ნიკა ჩხაიძემ წინა დღის ვერცხლს ოქრო დაამატა, 11 წლის ასაკში ვერცხლის მედალი კი გუგა ივანაშვილმა მოიპოვა.
მერაბ თურქია, ლანჩხუთელი სპორტსმენების მწვრთნელი: _ ლანჩხუთელთა საბოლოო შედეგი 5 ოქროს და 2 ვერცხლის მედალი გახლდათ. აღსანიშნავია ნიკა ჩხაიძის კიდევ ერთი მედალი. იგი საქართველოს ნაკრების წევრია და გუნდურ ასპარეზობაში ბრინჯაოს მედალს დასჯერდა. მან მსოფლიო პირველობაზე სამივე სინჯის მედალი მოიპოვა.
მერაბ თურქია ჩემპიონატზე მსაჯად იყო მიწვეული და თურქეთისა და რუმინეთის ნაკრებების ორთაბრძოლა მთავარი არბიტრის რანგში ჩაატარა: “მინდა ვისარგებლო შემთხვევით და მადლობა ვუთხრა ლანჩხუთის გამგეობას გვერდში დგომისა და ფულადი დახმარებისთვის”, _ გვითხრა რესპონდენტმა.
