არჩევნების მოახლოებასთან ერთად, ხელისუფლება სულ უფრო მეტად ცდილობს მოსახლეობის გულის მოგებას. მთავრობის და უმრავლესობის ყოველდღიური შეხვედრები ხალხთან სწორედ ამაზე მეტყველებს. ლანჩხუთის საკრებულოს თავმჯდომარე რევაზ ჩიტიძე თვლის, რომ ეს შეხვედრები სამუშაო ტიპისაა და არ ატარებს სააგიტაციო ხასიათს.
_ ჩვენ მოსახლეობას წელიწადში ორჯერ ვხვდებით _ გაზაფხულზე და გვიან შემოდგომაზე. ამ შეხვედრების დროს ხდება პრობლემების შეჯერება და პრიორიტეტების განსაზღვრა. წლის ბოლოს მტკიცდება ბიუჯეტი, რომელშიც ადგილობრივი შემოსავლები აისახება. ამ თანხებით ვცდილობთ ადგილზე არსებული კონკრეტული პრობლემების მოგვარებას. მთავრობა იღებს გადაწყვეტილებას, რა რაოდენობის თანხა გამოუყოს სოფელს არსებული პრობლემის მოსაწესრიგებლად. ზუსტად ამას ემსახურება ჩვენი შეხვედრები და მას არა აქვს საარჩევნო ხასიათი. დავდივართ სოფლებში, ვხვდებით მოსახლეობას და მათგან ვიგებთ, რა სჭირდებათ და რომელი საკითხის გადაწყვეტას ანიჭებენ უპირატესობას, _ გვითხრა საკრებულოს თავმჯდომარემ.
_ სოფლის მხარდაჭერის პროგრამით გამოყოფილი თანხების ხარჯვა ხშირად ისე ხდება, რომ ხალხის აზრი საერთოდ არ არის გათვალისწინებული. მაგალითად, შარშან, ერთ-ერთ შეხვედრაზე პრიორიტეტად დასახელდა გზის შეკეთება, მაგრამ გადმორიცხული თანხა _ 28 ათასი ლარი მოხმარდა სოფლის კლუბის აღდგენას.
_ სოფლის პროგრამის ფარგლებში გზა უმნიშვნელოდაა გათვალისწინებული. ეს პროგრამა ითვალისწინებს ისეთი პროექტების გახორციელებას, რომლებიც ხანგრძლივი ვადით იმუშავებს. ასეთთა რიცხვს გზა არ მიეკუთვნება. მოხრეშილი გზა, მინიმუმ, 6-7 თვეს არის ვარგისიანი, შემდეგ კი კვლავ შესაკეთებელი ხდება. გამგებლის ინიციატივით, შიდა სასოფლო გზებზე, 6-7 ადგილზე მოეწყობა კარიერები და გზები მდინარის ხრეშით მოიხრეშება. წელს, ბიუჯეტიდან 940 ათასი ლარი გამოიყო ინფრასტრუქტურის მოსაწესრიგებლად. ამ თანხის სამოცი პროცენტი გზების მოწყობაზე დაიხარჯება. გარემონტდება სუფსა-ღრმაღელის გზის 6-კილომეტრიანი მონაკვეთი, ნიგვზიანში _ 4 კილომეტრიანი მონაკვეთი. ქალაქის ტერიტორიაზე კი იგეგმება სამი ქუჩის მოასფალტება.
_ როგორია ხალხის განწყობა ამ შეხვედრებზე?
_ ხალხი თბილად გვხდება, არაკეთილგანწყობა არსად შემინიშნავს. ვიცით, რომ ჯერ კიდევ ბევრი პრობლემაა ჩვენს სოფლებში, ჯერ კიდევ არ ცხოვრობს ხალხი კარგად, მაგრამ ჩვენ ამ პრობლემების გადაჭრის გზებს ვეძებთ. მთავარია, ხალხი გვენდობოდეს, ჰქონდეს იმედი, რომ ერთად მუშაობით ნელ-ნელა მოწესრიგდება ყველაფერი. ახლახან ეწერზე ვიყავით. ალბათ, იცით, რომ აქ ძალიან კარგი ხარისხის გზა გაკეთდა შარშან. გარდა გზისა (იგულისხმება ოზურგეთი-ლანჩხუთის დამაკავშირებელი მაგისტრალი), სოფელში გაკეთდა სარიტუალო სახლი. ახლა ვგეგმავთ საბავშვო ბაღის გარემონტებას.
სოფელ ჯურუყვეთში, სოფლის პროგრამის ფარგლებში, მოხდება ძველი შენობის აღდგენა და მასში ბიბლიოთეკა და ჩაის მცირე საწარმო გაკეთდება. ნორვეგიის მთავრობის დახმარებით, ლანჩხუთის ორ სოფელში _ ჩიბათსა და ჯურუყვეთში ჩაის გადამამუშავებელი მცირე საწარმოები გაიხსნება. უახლოეს დღეებში ნორვეგიიდან ჩამოვა საწარმო ხაზი.
_ ბატონო რეზო, რესპუბლიკური პარტიის წევრმა, რომან ბიწაძემ ჩვენთან საუბარში თქვა, რომ თქვენ ცდილობდით იგი სამსახურიდან გაგეთავისუფლებინათ.
_ რომან ბიწაძე, როგორც თავად ამბობს, ყველა მთავრობის ოპოზიციაა და ეს არ არის ახალი ამბავი. ვინმეს რომ მოესურვებინა მისი გათავისუფლება, ამას მოახერხებდა კიდეც. მაგრამ იგი დღესაც მუშაობს სახელმწიფო დაწესებულებაში. არ ვიცი, რაში დასჭირდა ამის თქმა.
_ კიდევ ერთი, განსხვავებული პოლიტიკური შეხედულების მქონე სახელმწიფო მოხელეს მიაჩნია, რომ პარტიული ნიშნით იდევნება. საქმე ეხება სოფელ ნიგვზიანის რწმუნებულის მოადგილეს.
_ სურმანიძე სახელმწიფო სამსახურშია და მას როგორც სახელმწიფო მოხელეს, შინაგანაწესით გაწერილი პასუხისმგებლობა აკისრია. იგი ვალდებულია სამუშაო საათებში სამსახურში იმყოფებოდეს. სამუშაო დროის გასვლის შემდეგ კი, უფლება აქვს ნებისმიერ ღონისძიებას დაესწროს. ამას არავინ უკონტროლებს.
გარდა ამისა, ჩვენ მისგან მოვითხოვეთ ახსნა-განმარტება და არა სამსახურიდან წასვლაზე განცხადების დაწერა. იგი ვალდებულია აუხსნას ზემდგომებს, რა მოტივით არ შეასრულა უშუალოდ მასზე დაკისრებული მოვალეობა, როცა თავი აარიდა მუნიციპალიტეტის პირველ პირებთან შეხვედრას. მინდა განვაცხადო, რომ იგი სამსახურიდან არავის გაუთავისუფლებია.
