"ნაციონალური მოძრაობის" ოზურგეთის ოფისში ლანჩხუთის, ოზურგეთისა და ჩოხატაურის რაიონული ორგანიზაციის ხელმძღვანელებმა _ კახა ასკურავამ, დავით მჟავანაძემ და მამია ბარამიძემ პრესკონფერენცია გამართეს და გურიის გუბერნატორის გია სალუქვაძის გადაყენება მოითხოვეს.
მჟავანაძის თქმით, გიორგი კვირიკაშვილმა, პრემიერის კანდიდატის რანგში, საპარლამენტო ტრიბუნიდან განაცხადა, რომ თუ დადასტურდებოდა გურიის გუბერნატორის მონაწილეობა ბავშვებისთვის ძალადობის ამსახველი კადრების ჩვენებაში, აუცილებლად მიიღებდა ზომებს.
მჟავანაძის თქმით, ამ განცხადების გაკეთებიდან საკმაო დრო გავიდა, თუმცა რეაგირება არ მომხდარა.
იმის დასადასტურებლად, რომ გურიის გუბერნატორი ძალადობის ამსახველი კადრების ჩვენების ორგანიზებაში მონაწილეობდა, "ნაციონალური მოძრაობის" ოფისში კონკრეტული ვიდეო-მასალა გაუშვეს.
"ერთიანი ნაციონალური მოძრაობის" ადგილობრივი ლიდერები იმედს გამოთქვამენ, რომ მათ მიერ ნაჩვენები სიუჟეტის გასვლის შემდეგ, პრემიერი აუცილებლად შეასრულებს იმ დაპირებას, რომელიც პარლამენტის ტრიბუნიდან გასცა.
პრესკონფერენციაზე ლანჩხუთის ორგანიზაციის თავმჯდომარემ კახა ასკურავამ პარტიის ოფისზე განხორციელებულ თავდასხმაზე და ინცინდენტში მონაწილე პირების დაუსჯელობაზე გააკეთა აქცენტი. მისი თქმით, დანაშაულში საბიუჯეტო ორგანიზაციების თანამშრომლები მონაწილეობდნენ, რომლებიც დღემდე მუშაობენ აღნიშნულ სამსახურებში და მათ მიმართ ხელისუფლებას არანაირი ღონისძიება არ გაუტარებია.
_ "ნაციონალური მოძრაობის" ლანჩხუთის ოფისზე განხორციელებულ თავდასხმაზე საქმე იმავე დღეს აღიძრა, თუმცა ფაქტია, რომ თაროზე შემოდეს. ამიტომ ეჭვი გვაქვს, რომ პირადად გურიის გუბერნატორი აფარებს ხელს აღნიშნულ პირებს, რისთვისაც იგი უნდა ჩამოშორდეს თანამდებობას," _ აღნიშნა ასკურავამ.
გია სალუქვაძე "გურია ნიუსთან" აღნიშნავს, რომ მისი მისამართით მიზანმიმართული კამპანია მიმდინარეობს:
"ეს ის ჯგუფია, რომელიც აბსოლუტურად გაკოტრებულია და რაზე საუბრობს, თავად არ აქვს წარმოდგენა. წამება "ნაციონალური მოძრაობის" დროს ხორციელდებოდა და ასკურავა იმ დროს გუბერნატორის მოადგილე იყო.
რაც შეეხება კონკრეტულ კადრებს _ ისინი ოქტომბერში, უკრაინულ საიტზე გავცრელდა. მაშინ გუბერნატორი ვიყავი და ასეთი კადრების ჩვენება მოხდა არა გურიაში, არამედ სხვა რეგიონში _ ეს კადრები აჩვენეს სამეგრელოში.
ჯერ კიდევ გუბერნატორობამდე, ციხიდან გამოსვლის შემდეგ ,როგორც პოლიტპატიმარმა, დავაარსე არასამთავრობო ორგანიზაცია და გოგა ხაინდრავას სტუდიაში დავამზადე 16-წუთიანი ფილმი სააკაშვილის სისხლიან რეჟიმზე, რომელიც ვაჩვენე სტრასბურგში და ევროპის სხვა ქალაქებში. ეს არის დოკუმენტური ფილმი, სადაც წამების კადრები არ არის, თუ არ ჩავთვლით ციხის ეპიზოდს." _ აცხადებს გურიის გუბერნატორი.
რაც შეეხება გუბერნატორის მონაწილეობას საკადრო პოლიტიკაში, სალუქვაძე ამას კატეგორიულად გამორიცხავს და აღნიშნავს, რომ ის არ ერევა კადრების შერჩევაში :
" მათ მიერ გავრცელებული აზრი, რომ თითქოსდა მე ვიყავი "ნაციონალური მოძრაობის" ოფისზე თავდასხმის ორგანიზატორი, გახლავთ ტყუილი. "ქართული ოცნების" ოფისზე შეტევა მათ მიიტანეს და ცოცხები მიამაგრეს. ამ მოვლენებში გუბერნატორის ჩარევა არ შეიძლება. ასკურავამ და მისნაირებმა უნდა იცოდნენ, რომ გუბერნატორი არ ერევა საკადრო პოლიტიკაში, რომელიც მუნიციპალიტეტებში მიმდინარეობს" _ ამბობს სალუქვაძე.
მისივე თქმით, ეს არის მიზანმიმართული კამპანია, რომ "ნაციონალურმა მოძრაობამ" თავისი დანაშაულებრივი რეჟიმის ნამდვილი სახე დაუმალოს საზოგადოებას და ყველანაირად ცდილობენ მოგონილი და ცრუ ბრალდებებით ჩიქრი მოცხონ ხელისუფლების წარმომადგენლებს.
