3 საცხოვრებელი სახლი, 8 მიწის ნაკვეთი და 3 არასაცხოვრებელი ფართი საქართველოს პარლამენტის უმრავლესობის დეპუტატის, ზაქარია ქუცნაშვილის ოჯახის საკუთრებაშია.
კერძოდ, როგორც ქუცნაშვილის ქონებრივ დეკლარაციაშია აღნიშნული, დეპუტატი ფლობს 88.00 კვ.მის ფართობის საცხოვრებელი სახლს ბათუმში, გორგასლის ქუჩაზე. ასევე, 89.00 კვ.მ-ის არასაცხოვრებელ ფართს თბილისში, საბურთალოს ქუჩაზე. მიწის ნაკვეთის 33%-იანი წილის მფლობელია თიანეთის მუნიციპალიტეტის დაბა სიონში, რომლის ფართობიც 941.00 კვ.მ-ია (მეწილე პეტრე ქიტესაშვილი). გარდა ამისა, ქუცნაშვილის საკუთრებაშია მიწის ნაკვეთის 70%-იანი წილი თიანეთში, ხევსურთსოფელში, რომლის ფართობიც 602.00 კვ.მ-ია (მეწილეები ელგუჯა ჩოლოგაური, რევაზ ბოდაველი). ქუცნაშვილი ამავე ტერიტორიაზე ფლობს 345.92 კვ.მ -ის არასაცხოვრებელი ფართის 70%-იანი წილს. გარდა ამისა, დეკლარაციის მიხედვით, ზაქარია ქუცნაშვილი ფლობს 135.00 კვ.მ-ის არასაცხოვრებელი ფართის 100%-იან წილს თიანეთის რაიონის სოფელ ზარიძეებში და ამავე სოფელში მდებარე 137.00 კვ.მ-ის ფართობის მიწის ნაკვეთს.
რაც შეეხება ოჯახის სხვა ქონებას, მამის, ომარ ქუცნაშვილის საკუთრებაშია მიწის ნაკვეთი თიანეთში, სოფელ ხოფცაში, რომლის ფართობიც ფართობი – 1900.00 კვ.მ-ია და ამავე სოფელში მდებარე 150.00 კვ.მ-ის ფართობის საცხოვრებელი სახლი. ასევე, მიწის ნაკვეთი თბილისში, სოფელ აგარაკების ტერიტორიაზე, რომლის ფართობი 1500.00 კვ.მ-ია. გარდა ამისა, ომარ ქუცნაშვილს ეკუთვნის 430.00 კვ.მ-ის ფართობის საცხოვრებელი სახლი თბილისში, საირმის ქუჩაზე და ამავე ტერიტორიაზე არსებული 430.00 კვ.მ-ის ფართობის მიწის ნაკვეთი. ომარ ქუცნაშვილის 100%-იან საკუთრებაშია მიწის ნაკვეთი ნაფარეულში, რომლის ფართობიც 13 333.00 კვ.მ-ია.
გარდა ამისა, ზაქარია ქუცნაშვილის საკუთრებაშია მსუბუქი ავტომანქანა Toyota Land Cruzer Prado, ხოლო ომარ ქუცნაშვილი ფლობს მსუბუქ ავტომანქანა Honda CRV-ის.
რაც შეეხება ოჯახის ფინანსურ მდგომარეობას, დეკლარაციის მიხედვით, მათი წლიური შემოსავალი 68 358 ლარი იყო.
აქედან, ზაქარია ქუცნაშვილმა საქართველოს პარლამენტის წევრობისთვის 55485.00 ლარი მიიღო,
მეუღლემ, თეა სანიკიძემ, კომპანია "ქ ენდ ქ კონსალტინგის" მარკეტინგის მენეჯერის პოზიციისთვის 7500.00 ლარი, ხოლო ქუცნაშვილის დედამ, თალიკო ლაგაზაურმა პირველი ექსპერიმენტული სკოლიდან, სადაც ის ისტორიის მასწავლებელია 5443.20 ლარი.
გარდა ამისა, ზაქარია ქუცნაშვილმა შემოსავლის სახით 8925 დოლარი არასაცხოვრებელი ფართისა (7000.00 დოლარი ) და ბინის გაქირავებიდანაც (1925.00 დოლარი) აიღო.
რაც შეეხება ოჯახის სამეწარმეო საქმიანობაში მონაწილეობას, დეკლარაციის მიხედვით, თეა სანიკიძემ შპს "ნიტაპროქურუმენტგრუპი" 103822.00 ლარის შემოსავალი მიიღო, ომარ ქუცნაშვილმა კი, შპს "ჯეოინჟინერინგიდან" 66907.68 ლარი.
აღსანიშნავია ისიც, რომ ზაქარია ქუცნაშვილი სამი შპს-ს პარტნიორია (შპს მიგრანტთა საადვოკატო ბიურო", შპს "ადვოკატები რეპრესირებულთათვის", შპს "ქ ენდ ქ კონსალტინგი") თუმცა, ას ამ შპს-ებიდან შემოსავალი გასულ წელს არ მიუღია.
რაც შეეხება დეკლარაციის შევსების მომენტში ქუცნაშვილისა და მისი ოჯახის წევრების საბანკო ანგარიშებზე არსებულ თანხებს, ასე გამოიყურება:
ზაქარია ქუცნაშვილს ,,თი–ბი–სი" ბანკის სახელფასო ანგარიშზე 1500.00 ლარი ჰქონდა; ხოლო დეპოზიტზე 11000.00 დოლარი; "ლიბერთი" ბანკის მიმდინარე ანგარიშზე კი, 900.00 ლარი. გარდა ამისა, მას ნაღდი ფულის სახით ჰქონდა 5000.00 ლარი.
რაც შეეხება ომარ ქუცნაშვილს, მას "ლიბერთი" ბანკის საპენსიო ანგარიშზე 300.00 ლარი ერიცხებოდა; თალიკო ლაგაზაურს კი, "ლიბერთი" ბანკი საპენსიო ანგარიშზე 150.00 ლარი ჰქონდა;
ზაქარია ქუცნაშვილის მეუღლეს, თეა სანიკიძეს ,,თი–ბი–სი" ბანკის სახელფასო ანგარიშზე 500.00 ლარი; ხოლო ამავე ბანკის დეპოზიტზე 5.00 ერიცხებოდა.
რაც შეეხება ოჯახის გასავლებს, დეკლარაციაში აღნიშნულია, რომ ზაქარია ქუცნაშვილმა 30 000-ლარიანი სამომხმარებლო სესხის პროცენტის დასაფარად 13170.00 ლარი გადაიხადა;
ხევსურთსოფლის ფართის გასარემონტებლად კი, 150 000 ლარი აქვს გადახდილი. დეკლარაციაში ასევე აღნიშნულია, რომ ზაქარია ქუცნაშვილის შვილის, თორნიკე ქუცნაშვილის სწავლა ოჯახს გასულ წელს 8300.00 ლარი დაუჯდა.
