ბათუმის მე-3 პენიტენციური დაწესებულების მსჯავრდებული კახა მეცხვარიშვილი საქართველოს პრეზიდენტს, პრემიერს, პარლამენტის თავმჯდომარეს, პარლამენტარებს, სახალხო დამცველს, გენერალურ პროკურორს, ადვოკატთა ასოციაციის თავმჯდომარესა და მედია-ორგანიზაციების ხელმძღვანელებს წერილით მიმართავს.
როგორც პატიმარი წერილში აღნიშნავს, მისი ჯანმრთელობის მდგომარეობა გაუარესებულია, ციხის ადმინისტრაციის მხრიდან კი, შესაბამისი ყურადღება არ ექცევა.
მეცხვარიშვილი “გურია ნიუსისთვის” გამოგზავნილ წერილში წერს, რომ მიუხედავად ხელისუფლების შეცვლისა, ბათუმის მე-3 დაწესებულებაში არაფერი შეცვლილა და თანამშრომლების 60% უცვლელი დარჩა.
“მე მივიყენე თვითდაზიანებები და გადაყლაპული მაქვს რკინის მეტალი. ეს მოხდა მიმდინარე წლის 8 იანვარს, პროტესტის ნიშნად სამედიცინო განხრით. ამა წლის 10 იანვარს ვანდალურ საკანში სამი საათის განმავლობაში ვითხოვდი ექიმს, რათა ჭრილობებზე გადახვეული ბინტი შეეცვალა. ორივე ხელზე მადევს ნაკერები და არ მინდოდა ბინძური ბინტიდან შემჭროდა ინფექცია. რადგან ექიმი არ მომიყვანეს, ჩემი ხელით დავიწყე ბინტის მოხსნა. შემომიცვივდნენ კორპუსის უფროსი ირაკლი და სამი თანამშრომელი. დამადეს ხელბორკილი, ორი საათის შემდეგ ამოიყვანეს მორიგე ექიმი მალხაზი, ამაყენეს ბეტონის იატაკიდან და ამხსნეს ხელბორკილები. ხელბორკილებით მაქვს ხორცები ამოგლეჯილი, რაც დააფიქსირა მორიგე ექიმმა”, _ წერს მეცხვარიშვილი (სტილი დაცულია. ავტ.)
მისივე თქმით, 14 იანვარს შიმშილობა დაიწყო და წერილის ადრესატებს სთხოვს მოინახულონ, წინააღმდეგ შემთხვევაში, შიმშილობის შეწყვეტას არ აპირებს.
“გთხოვთ, ვისაც შეგიძლიათ დაწესებულებაში შემოსვლა, შემხვდით. გადამტერებული მყავს დაწესებულების რეჟიმის უროსი დათო შატაკიშვილი, სულ მაფრთხილებდა და მემუქრებოდა, თუ არ გავანებებდი თავს საჩივრების წერას, ჩემს თავს დავაბრალებდი. მიმიყვანა იმ ზომამდე რომ გადავყლაპე რკინის მეტალი. მომათავსა ვანდალურ საკანში. მითვლის, ჩემს ძმაკაცს ხომ დაუწერე უსაფრთხოების უფროსს გაგნიძეს სტრასბურგში საჩივარი, ახლა სანამ საჩივრების წერას და შიმშილობას დაიწყებ, სანამ მე გამეხარდება მანდ იქნებიო.
შიმშილობის შეწყვეტას არ ვაპირებ, გთხოვთ, შემოხვიდეთ და ნახოთ ჩემი სამედიცინო ისტორია, რამდენი ქრონიკული დაავადება მჭირს. შიმშილობით ამომძვრება სული თუ რეჟიმის უფროსი ფსიქოლოგიური ზეწოლით ამომხდის, ჩემთვის მნიშვნელობა აღარ აქვს. ამ საჩივარს ბეტონის იატაკიდან გწერთ იმიტომ, რომ აქ არც მაგიდაა, არც სკამი. მიკეთებენ უჰაერობის ნემსებს, არ არის ჟანგბადი, არ იღება ფანჯარა. გთხოვთ დამეხმაროთ, ორგანიზმში რკინის მეტალი მაქვს და შიმშილობა არ შეიძლება, მაგრამ მეტი გზა არ დამიტოვეს. გამირთულდა ქრონიკული ფარინგიტი, თვალის არეში დამეწყო წვა…
გთხოვთ, პრესით და ტელევიზიით გამოიყენოთ ჩემი სახელი და გვარი, აცნობოთ საზოგადოებას რომ ბათუმის მე-3 დაწესებულებაში ჯოჯოხეთია და ჩემნაირად ბევრი პატიმარი იტანჯება. ამ წუთში ვარ რეჟიმის უფროსის, დათო შატაკიშვილის პირადი პატიმარი, ვყავარ საწამებელ ოთახში ჩაკეტილი. თვით ჰიტლერიც არ ექცეოდა ასე ებრაელებს. იმედი მაქვს, რეჟიმის უფროსის ხელით არ მომკლავთ; მიიღებთ რეაგირებას და სათანადო ზომებს”, _ აღნიშნულია მეცხვარიშვილის წერილში, რომლის გამოგზავნის თარიღადაც 13 იანვარია მითითებული, თუმცა, “გურია ნიუსმა” აღნიშნული წერილი 5 დღის შემდეგ, დღეს მიიღო.
კახა მეცხვარიშვილის უფლებების დამცველი, “ადამიანის უფლებათა ცენტრის” იურისტი თამარ ლუკავა “გურია ნიუსთან” საუბრისას ამბობს, რომ კახა მეცხვარიშვილს ჯანმრთელობის მდგომარეობა გაუარესებული ჰქონდა, რის გამოც, არაერთხელ გაუგზავნეს მიმართვა სასჯელაღსრულების დაწესებულებას, თუმცა უშედეგოდ.
“არაერთხელ მივმართეთ სასჯელაღსრულების დაწესებულებას, თუმცა ყოველთვის ერთნაირი პასუხები მოდის. ვითხოვდით კონკრეტული გამოკვლევების ჩატარებას, მედიკამენტების მიწოდებას, ოპერაციულ მკურნალობას, მაგრამ მათგან მოგვივიდა პასუხი, რომ რამოდენიმეჯერ გაყვანილი იყო გამოკვლევებზე და მედიკამენტებიც მიეწოდებაო. ასე მოგვდის პასუხი ყველა პატიმართან მიმართებაში. თუმცა, მსჯავრდებულები ამბობენ, რომ მედიკამენტები არ მიეწოდებათ და ექიმებიც არ აქცევენ სათანადო ყურადღებას. მარტო ეს პრობლემაც არ არის, ბათუმის მე-3 დაწესებულებიდან ძალიან ბევრი პატიმარი გვწერს მსგავს პრობლემებთან დაკავშირებით. მე პირადად მაქვს წარმოებაში 17 პატიმრის წერილი, რომლებიც ძირითადად ჯანდაცვის პრობლემებზე საუბრობენ”, _ აღნიშნავს ლუკავა.
იურისტი ასევე ამბობს, რომ სახალხო დამცველის წარმომადგენლების გარდა უშუალოდ ციხეში ამ პრობლემების შესამოწმებლად ვერავინ შევა.
“ადვოკატს ნებისმიერ დროს შეუძლია შევიდეს და ნახოს პატიმარი, თუმცა მონიტორინგის განხორციელება მხოლოდ სახალხო დამცველის პრეროგატივაა. მას აქვს ვალდებულება, რომ შეტყობინების მიღებისთანავე მოინახულოს პატიმარი და ოქმი შეადგინოს”, _ აღნიშნავს ლუკავა.
“გურია ნიუსი” დეტალების გასარკვევად დაუკავშირდა სასჯელაღსრულებისა და პრობაციის სამინისტროსაც. უწყებაში აცხადებენ, რომ აღნიშნულ საკითხებთან დაკავშირებით უწყების გენერალურ ინსპექციას მოკვლევა აქვს დაწყებული.
“N 3 პენიტენციურ დაწესებულებაში მყოფ მსჯავრდებულ კ. მ.-სთან დაკავშირებით სასჯელაღსრულებისა და პრობაციის სამინისტრო აცხადებს, რომ მსჯავრდებული არ შიმშილობს. მომხდართან დაკავშირებით გენინსპექციას მოკვლევა აქვს დაწყებული”, _ აცხადებენ სამინისტროში.
რაც შეეხება სახალხო დამცველის ოფისის რეაგირებას, როგორც “გურია ნიუსს” ომბუდსმენის აპარატში უთხრეს, მეცხვარიშვილის წერილი დღეს მიიღეს. შესაბამისად, რეაგირებასაც უმოკლეს ვადებში მოახდენენ.
“აღნიშნული პატიმრის წერილი დღის მეორე ნახევარში მივიღეთ. უმოკლეს ვადებში შევლენ სახალხო დამცველის წარმომადგენლები და მოინახულებენ”, _ აცხადებენ ომბუდსმენის აპარატში.
“გურია ნიუსი” აღნიშნულ საკითხზე მუშაობას აგრძელებს. აქვე გთავაზობთ პატიმრის მიერ გამოგზავნილი წერილის ასლს.
