შემოსავლების სამსახურის გამარტივებულმა ურთიერთობამ ბიზნესს პრობლემები პირველივე დღიდან შეუქმნა
სასაქონლო ზედნადების გამოყენება სავალდებულო დღეიდან გახდა. შემოსავლების სამსახურის მიერ გავრცელებული ინფორმაციის თანახმად, სავალდებულო ხდება შემოსავლების სამსახურმა, ურთიერთობის გამარტივების მიზნით, სასაქონლო ზედნადების ელექტრონული ფორმით გამოწერის შესაძლებლობა დანერგა. სიახლის მიზანია, საგადასახადო ადმინისტრირების გამარტივება. შემოსავლების სამსახურის მტკიცებით, ამ სიახლით შესაძლებელი იქნება საქონლის მოძრაობის სრული სიზუსტით აღრიცხვა, მოწესრიგება და სრულყოფა.
“ეს არ არის სისტემა, რომ ჩვენ ჩავეძიოთ ბიზნესს დეტალებში, მივყვეთ კარდაკარ და შევუქმნათ რაიმე უხერხულობა. პირიქით, ეს სისტემა არის შექმნილი იმისთვის, რომ ბიზნესი იყოს ნორმალურ და კომფორტულ გარემოში”, – განაცხადა პრევენციის დეპარტამენტის უფროსმა ზურაბ სოხაძემ.
თუმცა, ამ სისტემამ პრობლემები ყველა გადამხდელს შეუქმნა.
შემოსავლების სამსახურის სერვერი rs.ge დილიდან იყო გადატვირთული და მომხმარებელი სისტემაში შესვლას რამდენიმე საათის განმავლობაში ვერ ახერხებდა.
“გურია ნიუსის” დისტრიბუტორები, რომლებმაც რამდენიმე ათეული კილომეტრი გამოიარეს გაზეთის წასაღებად, გაზეთის წაღებას იმ მიზეზით ვერ ახერხებდნენ, რომ სისტემა გადატვირთული იყო.
შემოსავლების სამსახურის თანაშრომლის ირაკლი დონაძის განცხადებით ელექტრონული ზედნადების გარეშე გაზეთის გატანა არ შეიძლება:
_ პროდუქტს სასაქონლო ზედნადების გარეშე ვერ გაუშვებთ, _ გვითხრა დონაძემ.
_ ბატონო ირაკლი, თუ ბაზაში ვერ შევდივარ, ვერ გავუშვებთ გაზეთს ქსელში?
_ სასაქონლო ზედნადების გარეშე საქონელს ვერ ამოძრავებთ.
_ რა ვქნათ, გაზეთი გავაჩეროთ? _ ამ კითხვაზე დონაძემ პასუხი არ გაგვცა და ტელეფონი გაგვითიშა. თუმცა, მოგვიანებით თავადვე დაგვიკავშირდა და გვითხრა, რომ პრობლემები სერვერის გადატვირთვამ შექმნა.
_ დღეს დეკლარაციების შევსების და მიღების ბოლო დღეცაა და ცოტა ხანში გასწორდება…
_ სანამ გასწორდება რა ვქნათ? გაზეთი ათ საათზე ქსელში უნდა გასულიყო და გავაჩეროთ? თქვენი პრობლემის გამო ჩვენ დავზარალდეთ?
_ მესმის, დიდ ბოდიშს გიხდით, მაგრამ პირველი ჩართვაა და რამდენიმე წუთში გამოსწორდებაო მითხრეს.
შემოსავლების სამსახურის პრესსამსახურის ხელმძღვანელის, მაკა ფანქველაშვილის თქმით, პირველ დღეებში საქონლის უსაბუთოდ გატანის გამო არავინ დაჯარიმდება.
_ სისტემა უკვე ჩაირთო. თუმცა, პირველი დღეების განმავლობაში შეიძლება ისე გაატანოთ. მერე, როცა იქნება ისე შეავსებთ…
_ამის გამო საჯარიმო სანქცია ხომ არ დაგვეკისრება?
_ არა. თქვენ შეგიძლიათ ახლა გაზეთი გაუშვათ.
_ამის შესახებ ოფიციალურ განცხადებას არ გააკეთებთ? დარწმუნებული ვართ, ეს პრიობელმა ბევრს აწუხებს და ასეთ მდგომარეობაში ბევრი ადამიანია…
_ კი და, ველაპარაკებით ყველას;, ვეუბნებით, რომ ჯარიმა არ იქნება. მე არა ვარ უფლებამოსილი, რომ ოფიციალური განაცხადები გავაკეთო ან სპეციალური დოკუმენტი ვაწარმოო, მაგრამ გეუბნებით იმას, რა ინფორმაციაც მივიღე ჩემი ხელმძღვანელობიდან. ახლა მუშაობს სისტემა და დღის განმავლობაში რაიმე პრობლემა თუ იქნება, გამოსწორდება. გაუშვით გაზეთი და მერე დაიწყეთ, _ აღნიშნა ჩვენთან საუბრისას ფანქველაშვილმა.
გურიის საგადასახადო სამსახურის უფროსი, ანტონ ბარამიძე კი განსხვავებულ მითითებებს იძლევა და ამბობს, რომ გაზეთი ძველი წესით გავუშვათ ქსელში.
_ ბატონო ანტონ, დღეს სერიოზული პრობლემა შეგვექმნა სასაქონლო ზედნადების ელექტრონული ფორმით შევსებასთან დაკავშირებით. თქვენი ბაზა გადატვირთულია…
_ ბოდიშს გიხდით. დღეს ძალიან გადაიტვირთა და ოპერატიულად გასწორდება. თუ ტექნიკურად ხელი გეშლებათ, გამოწერეთ ხელით და საღამოს, როცა ელექტრონული სისტემა ჩაირთვება, აუცილებლად შეავსეთ.
_ პრესსამსახურმა სხვა რამ გვითხრა…
_ ეს გადაწყვეტილება რამდენიმე წუთია რაც მივიღე. მთელ საქართველოშია ეგ პრობლემა. არანაირი ხელშეშლა არ იქნება. უბრალოდ, ჩვენი თხოვნა იქნება საღამოს ელექტრონულად შეავსოთ.
_ თქვენი პრობლემის გამო რომ ჩვენ ვზარალდებით ხომ ფაქტია?
_ ახლა ზარალზე არ არის საუბარი.
_ რატომ არ არის? 25 კილომეტრიდან ჩამოვიდა დისტრიბუტორი და გაზეთი ვერ გავატანეთ. უკვე პირველის ნახევარია და მთელი დღეა ამის გარკვევას ვცდილობთ.
_ ეს ტექნიკური პრობლემა იყო. მთელი დღე როგორაა _ 11-ის ნახევრიდან თორმეტის ნახევრამდე იყო პრობლემა. ჩვენ გეუბნებით, რომ ხელი არავის შეუშალოთ. გაატანეთ გაზეთი და საღამოს შეავსეთ.
ბარამიძის განცხადება, რომ პრობლემა მხოლოდ ერთი საათის განმავლობაში არსებობდა, სიმართლეს არ შეესაბამება. ამას ჩვენს მიერ შემოსავლების სამსახურში გაგზავნილი რამდენიმე მეილი და სატელეფონო ზარი მოწმობს, რომელის გახორციელება დილის 10 საათიდან დავიწყეთ და პირველის ნახევარამდე ვერ მივიღეთ პასუხი რა გვექნა.
-სასაქონლო ზედნადების ელექტრონულად გამოწერით მეწარმეები ადამიანური რესურსების და დროის დაზოგვას შეძლებენ. ამ სიახლით, გადამხდელს საშუალება ეძლევა, მოაწესრიგოს აღრიცხვიანობა, მინიმუმამდე შეამციროს შევსების დროს შეცდომების დაშვების რისკი და უზრუნველყოს ინფორმაციის დაცულობა, _ ასეთია შემოსავლების სამსახურის ოფიციალური განცხადება, თუმცა, დღეის მდგომარეობით, გადამხდელები გადატვირთული სერვერს არიან შეჩერებული.
