საქართველოს პრემიერ-მინისტრის, გიორგი კვირიკაშვილის საკუთრებაში 2 საცხოვრებელი სახლი, ორი მიწის ნაკვეთი და ბინაა. ამის შესახებ კვირიკაშვილის ქონებრივ დეკლარაციაშია აღნიშნული, რომელიც მინისტრმა 2016 წლის 15 იანვარს შეავსო.
კერძოდ, გიორგი კვირიკაშვილის 100%-იან მფლობელობაშია საცხოვრებელი სახლები თბილისში, ზოვრეთის ქუჩაზე (ფართობი – 190.00 კვ.მ) და დუშეთის რაიონის სოფელ ქვეშეთში (ფართობი – 250.00 კვ.მ). ასევე, ამავე მისამართებზე არსებული მიწის ნაკვეთები – ზოვრეთის ქუჩაზე 432.00 კვ.მ, ხოლო სოფელ ქვეშეთში 3450.00 კვ.მ.
გარდა ამისა, გიორგი კვირიკაშვილი ფლობს ბინას თბილისში, სამგორის რაიონში, რომლის ფართობი – 34.00 კვ.მ-ია.
რაც შეეხება პრემიერ-მინისტრის ფინანსურ მდგომარეობას, დეკლარაციის შევსების მომენტში მის სახელფასო ანგარიშზე "ქართუ" ბანკში 2 062.00 ლარი; ,,თი–ბი–სი" ბანკის საკრედიტო ანგარიშზე 725.00 დოლარი; ბანკი "ქართუს" მიმდინარე ანგარიშზე 902.00 დოლარი და 39.00 GEL ლარი იყო. გარდა ამისა, მას ნაღდი ფულის სახით 4 5000 ლარი ჰქონდა.
რაც შეეხება მისი მეუღლის, მაია ცინაძის ფინანსურ მდგომარეობას, დეკლარაციის შევსებისას, მის მიმდინარე ანგარიშზე ბანკ "ქართუში" 315.00 ლარი იყო.
დეკლარაციის მიხედვით, გიორგი კვირიკაშვილმა წინა წელს შემოსავლის სახით 74 021,72 ლარი მიიღო. კერძოდ, საქართველოს ეკონომიკისა და მდგრადი განვითარების მინისტრის პოსტზე 50 000.00 ლარი, ხოლო საქართველოს საგარეო საქმეთა მინისტრის თანამდებობაზე კი, 24 021.72 ლარი აქვს მიღებული.
გარდა ამისა, დეკლარაციაში აღნიშნულია, რომ პრემიერ-მინისტრის შვილმა, ანა კვირიკაშვილმა სარეკლამო სტუდია "მეტროგრაფიდან", სადაც ის გრაფიკული დიზაინერია 8 400.00 ლარის შემოსავალი მიიღო.
ქონებრივი დეკლარაციის მიხედვით, გიორგი კვირიკაშვილის სახელზე ორი იპოთეკური სესხია.
120 000.00-დოლარიანი იპოთეკური სესხი კვირიკაშვილს 2012 წლის 1 ნოემბერს აქვს აღებული და მისი პროცენტის დასაფარად ბანკ "ქართუს" 109 482.00 დოლარი გადაუხადა. რაც შეეხება 173500.00-დოლარიან იპოთეკურ სესხს, კვირიკაშვილმა ის "ქართუდან" 9 ივლისს აიღო და გადახდის ვადა 2030 წელს ეწურება. პროცენტის გადასახდელად კი, მინისტრმა გასულ წელს 8 545.00 დოლარი გადაიხადა.
რაც შეეხება მინისტრის მეუღლის, მაია ცინაძის სახელზე არსებულ 11 8800.00-დოლარიან ნასყიდობის ხელშეკრულებას, ის 2015 წლის 3 ივლისს გაფორმდა, თუმცა, დეკლარაციაში მითითებული არ არის რა შეიძინა ცინაძემ.
პრემიერ-მინისტრის დეკლარაციაში ასევე აღნიშნულია, რომ კვირიკაშვილს გასულ წელს შვილების სწავლა 9 042.50 ლარი დაუჯდა.
ქონებრივი დეკლარაციის მიხედვით, პრემიერის ოჯახი არ ფლობს ფასიან ქაღალდებსა და ძვირადღირებულ ნივთებს. გასული წლის მანძილზე მათ არც ფასიანი საჩუქრები მიუღიათ.
