ოზურგეთის მუნიციპალიტეტის სოფელ ნატანებში მიმდინარე გაზიფიცირების სამუშაოების საკითხი კვლავ პრობლემატური რჩება. ნატანების უბნების "ლეკურას," "ჯაფარეულის" და "დონაურის" მოსახლეობა გაზის სარეაბილიტაციო სამუშაოებს აპროტესტებს, როგორც ისინი ამბობენ, გაზის შეყვანის დროს არ ხდება მილების ეგრეთწოდებული "ქვიშის ბალიშებში" მოქცევა და ხდება მისი დაფარვა ქვიანი მიწით. "გურია ნიუსის" წყაროს ინფორმაციით, აღნიშნული საკითხით გენერალური პროკურატურაა დაინტერესებული. მოსახლეობამ პრობლემების აღმოფხვრის კუთხით გურიის გუბერნიასაც მიმართა.
ოზურგეთის მუნიციპალიტეტის სოფელ ნატანების ე.წ. "ლეკურას", "დონაურის", "ჯაფარაულის" მოსახლეობამ რამდენიმე დღის წინ ზემო ნატანების ცენტრში საპროტესტო აქცია გამართა.
მოსახლეობა ადგილობრივ ხელისუფლებას შიდა გზების მოწესრიგებასა და შეკეთებას თხოვდა. სოფელში რამდენიმე თვეა მიმდინარეობს გაზიფიცირების სამუშაოები. აქ მცხოვრებლების თქმით, კომპანია აღნიშნულ სამუშაოებს არაკეთილსინდისიერად აწარმოებს.
სოფლის მაცხოვრებლები ამბობენ, რომ ისინი კომპეტენტურები არ არიან გაერკვნენ, რამდენად ხარისხიანად სრულდება სამუშაოები, ამაზე შესაბამისმა სამსახურმა უნდა გააკეთოს დასკვნა. მათივე თქმით, გაზიფიცირების სამუშაოები ჯერ ნაწილობრივაა შესრულებული და ისიც მხოლოდ ცენტრალურ უბნებში, შიდა უბნებში კი გაზის შეყვანა შეჩერებულია.
კარლო ვასაძე: "არ ვიცი, რამდენად ხარისხიანად შესრუდა სამუშაოები, ვერაფერს ვერ გეტყვით , ორი მეტრი გათხარეს და ჩაყარეს პლასტმასის მილები, მაგრამ არ ვიცით არის თუ არა ხარისხიანი."
ოზურგეთის მუნიციპალიტეტის გამგებლის წარმომადგენელი სოფელ ნატანებში ილია თავაძე "გურია ნიუსთან" ამბობს, რომ გაზიფიცირების სამუშაოები კეთილსინდისიერად სრულდება:
"სახელმწიფო გაზმომარაგების ერთ-ერთი კომპანიის დირექტორი იყო ჩამოსული, მან დაათვალიერა გაზიფიცირების სამუშაობი, რომელიც მიმდინარეობს ნატანებში. პროექტში შევიდა გარკვეული კორექტირება, ის დაგვპირდა თანხების მომატებას და ამ თანხებით სრულიად იქნება შესაძლებელი დაზიანებული გზების რეაბილიტაცია, რაც გაზიფიცირების დროს დაზიანდა, გზები მოიხრეშება "ლეკურაში", "ჯაფარეულში", "დონაურში." ეს პასუხისმგებლობა აიღო გაზის კომპანიის წარმოამდგენელმა თავის თავზე. აღნიშნული სამუშაოები უნდა დამთავრდეს 15 თებერვლამდე"-ამბობს თავაძე. მისივე თქმით, მხოლოდ 10 ოჯახია დარჩენილი ზემო ნატანებში, სადაც გაზი არ არის მიყვანილი:
"რაც შეეხება ცენტრალურ გზას, აქ ორჯერ ჩატარდა ტენდერი, მაგრამ თანხა იყო დაბალი და ამის გამო ვერ დაიწყო, ახლა მოემატება თანხები, გამოვლინდება გამარჯვებულიც და დაიწყება გაზიფიცირებაც."
გურიის გუბერნატორის გია სალუქვაძის მოადგილე სოსო ერქომაიშვილი "გურია ნიუსთან" ადასტურებს ინფორმაციას იმის შესახებ, რომ ნატანების მოსახლეობამ გუბერნიას გაზიფიცირების სამუშაოებთან დაკავშირებულ პრობლემებთან დაკავშირებით მიმართა , ადასტურებს იმასაც, რომ გაზიფიცირება ხარვეზებით მიმდინარეობს:
"ჩვენთან, გუბერნიაში შემოვიდა ინფორმაცია მოსახლეობიდან, რომ გაზიფიცირების სამუშაოები არაკეთილსინდისიერად არის შესრულებული, იყო რაღაც ხარვეზები, გაზის შეყვანის დროს სპეციფიური თემები იყო გასათვალისწინებული, რომელიც არ შესრულდა. ნატანებში გაზის მშენებლობის საკითხმა, მოსახლოების მხრიდან უკმაყოფილება გამოიწვია, ჩვენ ჩვენი კომპეტენციის ფარგლებში, ჩავერთეთ ამ საკითხის მოკვლევაში. მივმართეთ გაზის ტრანსპორტირების კომპანიას და ვესაუბრეთ მონიტორინგის წარმომადგენლებს. უახლოესს პერიოდში ჩამოვლენ წარმომადგენლები, დაგვიკავშირდებიან და ერთად დავათვალიერებთ ამ სამუშაოებს, გავარკვევთ თუ რა ხარისხით არის შესრულებული. მოსახლეობასაც შევხვდები, პროექტსაც ვნახავთ, თუ არის ის სამუშაოები გათვალსიწინებული, რომელიც უნდა გაკეთებულიყო."_ ამბობს ერქომაიშვილი.
