როგორც ცნობილია, გურიაში “ქართული ოცნების” ოფისი მხოლოდ ლანჩხუთში გაიხსნა. როგორც “გურია ნიუსი” წერდა, ოზურგეთში ოფისის გახსნა ჩოხატაურის შემდეგ იგეგმება. საქართველოს მასშტაბით კი ოფისების გახსნა 15 აპრილამდე უნდა დამთავრდეს.
ჩვენი წყაროს ინფორმაციით, “ქართული ოცნების” ოზურგეთის ოფისის ხელმძღვანელის პოსტზე რამდენიმე კანდიდატურა განიხილებოდა. მათ შორის იყვნენ _ საკრებულოს ოპოზიციონერი წევრი ლელა ნაცვალაძე, “თავისუფალი დემოკრატების” ლიდერი თემურ სალუქვაძე, ეროვნული ფორუმის გურიის ლიდერი შოთა გოგიბერიძე, ოპოზიციონერი კოტე შარაშენიძე, რომლის კანდიდატურაც ამ პოსტზე აქტიურად განიხილება ახლაც და ჩვენი წყაროს ინფორმაციით, შესაძლოა, არჩევანიც ამ უკანასკნელზე შეჩერდეს. ასევე, განიხილება წარმოშობით ოზურგეთელი გია ცეცხლაძის კანდიდატურაც, რომელიც ამჟამად თბილისში ცხოვრობს და მუშაობს, იგი ჟანი კალანდაძის თანაშემწე იყო.
წყაროს თქმით, ამ კანდიდატებს “ქართული ოცნების” სათაო ოფისში პერსონალური დოსიები წარუდგინეს და წარსული შეახსენეს.
“გურია ნიუსთან” საუბარში ამ საკითხზე კომენტარს არც ლელა ნაცვალაძე აკეთებს და არც თემურ სალუქვაძე.
“გურია ნიუსი” კომენტარისთვის დაუკავშირდა გია ცეცხლაძესაც, თუმცა მანაც თავი შეიკავა და მხოლოდ ორი სიტყვით შემოიფარგლა: _ დაველოდოთ გადაწყვეტილებას, გთხოვთ, მოვლენებს ნუ გავუსწრებთო.
ჩვენს ხელთ არსებული ბოლო ინფორმაციით, კოტე შარაშენიძის შანსები გაიზარდა, თუმცა, ამბობენ, რომ ის ხელისუფლებასთან საკმაოდ დაახლოებული პირია.
“გურია ნიუსთან” ოპოზიციონერი კოტე შარაშენიძე ასეთ კომენტარს აკეთებს:
_ არის საუბარი, რა თქმა უნდა, თუმცა, ჯერჯერობით, რაიმეს თქმა არ შემიძლია, არაფერია გადაწყვეტილი, ვერაფერს დაგიდასტურებთ!
_ ჩვენც ვიცით, რომ ჯერ არაფერია გადაწყვეტილი, მაგრამ ამბობენ, რომ თქვენი კანდიდატურა აქტიურად განიხილება. ბატონო კოტე, ვინ წარადგინა თქვენი კანდიდატურა?
_ ძალიან კარგი, თუ განიხილება. მაგას რა სჯობს? ჩემი კანდიდატურა მე თავად წარვადგინე, ჩემმა განვლილმა ცხოვრებამ. კი განიხილება ჩემი საკითხი, მოვიაზრები ამ პოსტზე, თუმცა, ჯერ არაფერია გადაწყვეტილი.
_ ბატონო კოტე, აქტიურად საუბრობენ აგრეთვე იმაზე, რომ თქვენ ხელისუფლებასთან საკმაოდ დაახლოებული პირი ხარ. ადასტურებთ ამ ინფორმაციას?
_ არ შეიძლება მაგ თემაზე საუბარი. ჟურნალისტები ხართ და მოდით, სხვაგან იკითხეთ ეგ.
_ სხვაგან ვიკითხეთ და ჩვენმა წყარომ დაგვიდასტურა. ამიტომ, ახლა თქვენ გეკითხებით _ ადასტურებთ თუ არა ამ ინფორმაციას?
_ რა თქმა უნდა, არა.
_ წყარო ამტკიცებს, რომ თქვენ სამხარეო ადმინისტრაციის ერთ-ერთი მაღალჩინოსნის უახლოესი მეგობარი ბრძანდებით.
_ რას ნიშნავს უახლოესი მეგობარი?
_ მეგობარი რას ნიშნავს, არ იცით?
_ მეგობარი კი ვიცი, მაგრამ ეს ხომ იმას არ ნიშნავს, რომ პოლიტიკაში ერთნაირი ხედვა გვქონდეს? შეგიძლიათ, იკითხოთ, როდის დამინახეს სამხარეო ადმინისტრაციის შენობაში ბოლოს, თუ გაინტერესებთ. ბევრი რამ შეგიძლიათ იკითხოთ ჩემზე, რატომ წამოვედი სამსახურიდან, რატომ ვარ ოპოზიციაში და ასე შემდეგ…
