კონტროლის პალატა მოგელაძის თანამშრომლების ვინაობას და ხელფასებს ასაიდუმლოებს

საქართველოს კონტროლის პალატის პოლიტიკური პარტიების ფინანსური მონიტორინგის სამსახურის საშტატო ნუსხა, რომელსაც საზოგადოებაში ნათია მოგელაძის სამსახურის სახელითაა ცნობილი, 19 საშტატო ერთეულითაა დაკომპლექტებული:

– სამსახურის უფროსი – 1 საშტატო ერთეული;

– სამსახურის უფროსის მოადგილე – 1 საშტატო ერთეული;

– მთავარი კონსულტანტი – 4 საშტატო ერთეული:

– ექსპერტ – ანალიტიკოსი – 12 საშტატო ერთეული;

– სპეციალისტი – 1 საშტატო ერთეული.

ეს ჩამონათვალი “გურია ნიუსმა” საქართველოს კონტროლის პალატისგან 4 აპრილს მიიღო 20 მარტს გაგზავნილი წერილის პასუხად.

კონტროლის პალატისთვის გაგზავნილ წერილში, გარდა პოლიტიკური პარტიების ფინანსური მონიტორინგის სამსახურის საშტატო ნუსხისა, ვითხოვდით შესაბამის საშტატო ერთეულზე მომუშავე საჯარო მომსამსახურისა და მათი შრომითი ანაზღაურების მითითებას.

როგორც აღმოჩნდა, ამ ადამიანთა ვინაობას უწყება საგულდაგულოდ ასაიდუმლოებს.

“გაცნობებთ, რომ კონტროლის პალატა მოკლებულია შესაძლებლობას, გადმოგცეთ ინფორმაცია ზემოთ აღნიშნულ საშტატო ერთეულებზე მომუშავე საჯარო მოსამსახურეთა ვინაობის შესახებ, მათი თანამდებობრივი სარგოების მითითებით, ვინაიდან ხსენებული ინფორმაცია შეიცავს პერსონალურ მონაცემებს”, _ ასეთი პასუხი მიიღო “გურია ნიუსმა”

ადმინისტრაციული დეპარტამენტის უფროსის მოვალეობის შემსრულებლის დავით კაპანაძის ხელმოწერით.

შეგახსენებთ, რომ ეს ის 19 ადამიანია, რომელმაც საქართველოს 295 მოქალაქე დაკითხა. აქედან გამომდინარე, საზოგადოებას სრული უფლება აქვს, იცოდეს მათი ვინაობა. გარდა ამისა, იმ ადამიანებს, რომლებიც მიმდინარე დაკითხვების დროს გახდნენ შეურაცხოფისა და ზეწოლის მსხვერპლნი, აქვთ სრული უფლება, იცოდნენ ვინ ახორციელებდა მათზე ამგვარი სახის ქმედებებს.

ნათია მოგელაძის უწყების თანამშრომლებს უშუალოდ ჰქონდათ ურთიერთობა მოქალაქეებთან და ინფორმაცია მათ შესახებ, არავითარ შემთხვევაში არ შეიძლება, პერსონალურ მონაცემთა სიას მიეკუთვნებოდეს.

საქართველოს ჟურნალისტთა ეთიკის ქარტიის საბჭოს აღმასრულებელი დირექტორი თამარ კორძაია “გურია ნიუსთან” საუბრისას აცხადებს, რომ ეს ინფორმაცია ცალსახად საჯარო და ხელმისაწვდომი უნდა იყოს: “ზოგადი ადმინისტრაციული კოდექსის 42-ე მუხლის “დ” პუნქტის თანახმად, (საჯარო დაწესებულების იმ საჯარო მოხელეთა ვინაობა და სამსახურებრივი მისამართი, რომელთაც უკავიათ პასუხისმგებელი თანამდებობა ან ევალებათ საზოგადოებასთან ურთიერთობა და მოქალაქეთათვის ინფორმაციის მიწოდება) ამ ინფორმაციის გასაიდუმლოება დაუშვებელია იმ ნაწილში, რომელშიც საუბარია პასუხისმგებელ თანამდებობის პირებზე და იმ პირებზე, რომლებსაც ევალებათ საზოგადოებასთან ურთიერთობა. ეს არის პერსონალური მონაცემები, მაგრამ საჯარო და ხელმისაწვდომი.”

„ახალგაზრდა იურისტთა ასოციაციასთან“ არსებული „ქართული მედიის სამართლებრივი დაცვის ცენტრის“ ხელმძღვანელი ნათია კაპანაძე: “თითოეული ეს ადამიანი, ვის შესახებაც ითხოვთ ინფორმაციას თავისი სტატუსიდან და საჯარო ფუნქციიდან გამომდინარე, არ შეიძლება დაცული იქნენ იმ სტანდარტით, რომელსაც საქართველოს კონტროლის პალატა ანიჭებს.

მათ ევალებათ საზოგადოებასთან ურთიერთობა და მათთვის ინფორმაციის მიწოდება

იმ შემთხვევაშიც კი, თუკი საქართველოს კონსტიტუციით ცალსახად იქნებოდა დადგენილი. საქართველოს კონტროლის პალატის მიმართ მაღალი საჯარო ინტერესი მოწმობს, რომ საზოგადოების ინტერესი, მიიღოს ინფორმაცია, გაუწევს კონკურენციას კერძო პირების უფლებას – დაიცვან თავიანთი მაიდენტიფიცირებელი მონაცემები საჯარო ფუნქციის გახორციელებისას.”

არასამთავრობო ორგანიზაცია “საერთაშორისო გამჭვირვალობა საქართველოს” იურისტი ირინე ურუშაძე: საქართველოს კონტროლის პალატის მიმართ და განსაკუთრებით იმ პირთა მიმართ, რომელზედაც თქვენი გაზეთი ინფორმაციას ითხოვდა, საზოგადოებრივი ინტერესი იმდენად მაღალია, რომ არ არსებობს არანაირი საფუძველი, მათ შორის, კანონიერიც, რომელიც განეკუთვნება პერსონალური სახის ინფორმაციას.

გარდა ამისა, კონტროლის პალატის მიერ გამოგზავნილ წერილში ისიც კი არ არის მითითებული, რომელი კანონის რომელი მუხლის თანახმად ხდიან ისინი ამ ინფორმაციას პერსონალურ მონაცემებად. რა თქმა უნდა, აღნიშნული ინფორმაცია საჯარო და ხელმისაწვდომი უნდა იყოს მედიისთვისაც და საზოგადოებისთვისაც.”

თუ ნათია მოგელაძის უწყების 19 თანამშრომელს სამსახურის უფროსს, მოადგილეს, 4 მთავარ კონსულტატსა და ერთ სპეციალისტ გამოვაკლებთ, სულ 12 თანამშრომელი რჩება.

სავარაუდოდ, სწორედ ისინი აწარმოებდნენ მოქალაქეთა დაკითხვებს და სწორედ მათ ვინაობას ასაიდუმლოებს კონტროლის პალატა.

12 ადამიანი კითხავდა 295 მოქალაქეს, თითქმის, ერთდროულად, რაც ნებისმიერ არითმეტიკულ თუ ლოგიკურ გამოთვლებთან წინააღმდეგობაში მოდის.

შეგახსენებთ, რომ ეს რიგით მე-4 წერილი გახლავთ, რომელიც კონტროლის პალატისგან მიიღო “გურია ნიუსმა,” გაგზავნილი 8 წერილის პასუხად.