გასულ კვირას, ჩოხატაურის მუნიციპალიტეტის საკრებულოს სხდომაზე სოციალური დახმარების გაცემისა და მიღების წესის დაამტკიცეს.
დოკუმენტის თანახმად, ახალშობილებს, რომლის ერთ-ერთი მშობელი მაინც რეგისტრირებულია ჩოხატაურის მუნიციპალიტეტში და მინიჭებული აქვთ სარეიტინგო ქულა 0-დან 130 000-დე, გაეწევათ ერთჯერადი ფულადი დამხარება 200 ლარის ოდენობით.
ახალშობილის მშობელმა დახმარების მისაღებად მუნიციპალიტეტის გამგეობას ექვსი თვის განმავლობაში უნდა მიმართოს.
გამგეობის მიერ წარმოდგენილი პროექტის მეორე მუხლში აღნიშნული იყო, რომ მეორე მსოფლიო ომის ვეტერანებისა და ომში დაღუპულთა მარჩენალდაკარგული პირების, საქართველოს თავისუფლებისა და ტერიტორიული მთლიანობისთვის ბრძოლის მონაწილე პირების დაკრძალვის სარიტუალო ხარჯის (250 ლარი) გაცემისთვის საჭიროა (!) ომის მონაწილის წერილობითი განცხადება და პლასტიკური ბარათის ქსეროასლი(!). თუმცა, დეპუტატ დავით შარაშიძის შენიშვნით და იმის გათვალისწინებით, რომ წერილობით განცხადებას გარდაცვლილი ვერ დაწერს და დაკონკრეტებაა საჭირო, ასევე, ომის მონაწილეს და პლასტიკურ ბარათს ქსეროასლს ვერ გადაუღებენ, პროექტში შესწორება გაკეთდა.
მესამე მუხლის თანახმად, საქართველოს თავისუფლებისა და ტერიტორიული მთლიანობისთვის ბრძოლაში დაღუპულთა ოჯახები, ასევე, 9 აპრილის მშვიდობიანი აქციის დარბევის შედეგად მოწამლული პირები, აფხაზეთის კონფლიქტის დროს დაღუპულთა ოჯახები, ერთჯერადად 500 ლარს მიიღებენ, ასევე, დამატებით მიიღებენ 200 ლარს შეშის შესაძენად.
გარდა ამისა, იმ ოჯახებს, რომელთა წევრები საქართველოს თავისუფლებისა და ტერიტორიული მთლიანობისთვის ბრძოლაში მიღებული ჭრილობების შემდეგ 1993 წლის 30 სექტემბრის შემდეგ დაიღუპნენ, ყოველთვიურად 300 ლარი მიეცემათ, ხოლო 9 აპრილს დაზარალებულებს თვეში 150 ლარის ოდენობის დახმარება გაეწევათ.
მეორე მსოფლიო ომის ვეტერანების და ომში დაღუპულთა მარჩენალდაკარგულებს ერთჯერადად, სადღესასწაულოდ 300 ლარი გადაეცემათ და დამატებით, ზამთარში შეშის შესაძენად 200 ლარს მიიღებენ.
250 ლარით დაფინანსდება მარტოხელა მიცვალებულთა სარიტუალო მომსახურება. გაცემის წესში დაკონკრეტებულია, რომ თანხა გაიცემა იმ შემთხვევაში, თუ დაღუპულს არ ჰყავს პირდაპირი მემკვიდრე _ დედა, მამა, მეუღლე, ბებია, ბაბუა, შვილი, გერი ან შვილიშვილი.
წლის განმავლობაში 300 ლარი ერთჯერად მიეცემათ 100 წელს გადაცილებულ პირებს. ამისთვის კი საჭიროა ხანდაზმული პირის წერილობით განცხადება, მისი პირადობის მოწმობის ასლი, ცნობა სოციალური მომსახურების სააგენტოს ჩოხატაურის განყოფილებიდან ხანდაზმული პენსიონერის შესახებ და საბანკო ანგარიში.
მუნიციპალიტეტის აღრიცხვაზე მყოფ დევნილთა ოჯახებს საბანკო ანგარიშებზე 200 ლარი შეშის შესაძენად ჩაერიცხებათ, ხოლო დევნილის გარდაცვალების შემთხვევაში, გარდაცვლილის ოჯახი ერთჯერადად მიიღებს 250 ლარს.
როგორც დოკუმენტშია აღნიშნული, "სხვა გარდაუვალ აუცილებლობასთან დაკავშირებით, დევნილის ოჯახი მიიღებს ერთჯერად დახმარებას" ასი ლარის ოდენობით.
მუნიციპალიტეტი წელსაც დაეხმარება მძიმე საცხოვრებელ პირობებში, უბედური შემთხვევებისა და სტიქიური მოვლენების შემდეგად დაზარალებულ ოჯახებს. ამ ოჯახების მდგომარეობას გამგეობის სოციალურ საკითხთა და კულტურის სამსახური შეისწავლის; ხარისხის მიხედვით შეირჩევა ოჯახები და სათანადო დასკვნის საფუძველზე გაიცემა შესაბამისი დახმარება. დახმარება შეიძლება გაეწიოს სტიქიური მოვლენების შემდეგად დაზარალებულ ოჯახებს 5 000 ლარამდე ერთჯერადად. გამონაკლის შემთხვევაში კი შესაძლებელია არაუმეტეს, 15 000 ლარის ღირებულების ბინის შეძენა.
დოკუმენტში გამონაკლისი განმარტებული არ არის, თუმცა, როგორც საკრებულოს თავმჯდომარემ ზაალ მამალაძემ განმარტა, ამ გადაწყვეტილებას განსაკუთრებული შემთხვევების შესახებ, გამგებელი იღებს კომისიის დასკვნის საფუძველზე:
_ არის შემთხვევები, როცა სახლი მთლიანად ნადგურდება ხანძრით ან სხვა სტიქიური მოვლენით. ასეთ შემთხვევაში, დაზარალებულს, ბუნებრივია, 5 000 ლარი არ ეყოფა და შესაბამისად, ამ დროს შეიძლება გამონაკლისის დაშვება. თუმცა, ამ გამონაკლისს უშვებს გამგებელი სპეციალური კომისიის დასკვნის საფუძველზე, _ აღნიშნა ზაალ მამალაძემ ჩვენთან საუბრისას.
მძიმე ეკონომიკურ პირობებში მყოფი ოჯახებისთვის ერთჯერადი ფულადი დახმარება 200 ლარით განისაზღვრა; 18-წლამდე ასაკის დედ-მამით ობოლი ყველა ბავშვი თვეში 100 ლარს მიიღებს. მრავალშვილიანი ოჯახები, რომლებსაც ჰყავთ ოთხი ან მეტი 18 წლამდე ასაკის ბავშვი, რეგისტრირებულნი არიან სოციალურ დაუცველი ოჯახების მონაცემთა ერთიან ბაზაში და თუ მათი სარეიტინგო ქულა 30 001-ზე ნაკლებია (ღატაკი) ან 65 001-დან 130 000-მდეა, თითოეულ ბავშვზე თვეში 25 ლარს მიიღებენ.
დახმარებას ისევ გაეწევათ ფენილკეტონურიით დაავადებულ ბავშვებს.
წლევანდელი ბიუჯეტით, დახმარება გაეწევათ 18 წელს ზევით ასაკის პირებს, რომლებიც საჭიროებენ სტაციონალურ სამედიცინო მომსახურებას და მედიკამენტების შეძენას. დახმარების მიმღები პირის სარეიტინგო ქულა 65 001-დან 200 000-ის ჩათვლით უნდა იყოს.
_ დაფინანსდება ის ნაწილი, რომელსაც არ აფინანსებს სახელმწიფო პროგრამა არაუმეტეს 400 ლარისა, ხოლო მედიკამენტების შესაძენი თანხა 150 ლარს არ აღემატება, _ აღნიშნა ზაალ მამალაძემ.
ასევე, დაფინანსდება 18 წელს ზევით ასაკის მკვეთრად და მნიშვნელოვნად გამოხატული შშმ პირების სტაციონალური სამედიცინო მომსახურება და მათ მედიკამენტებსაც შეუძენენ.
ონკოდაავადებულთათვის სტაციონალური სამედიცინო მომსახურებაზე გაიცემა 400 ლარი, მედიკამენტების შესაძენად _ 200 ლარი, ხოლო ოპერაციის შემდეგ გამოკვლევაზე _ 200 ლარი.
ჩოხატაურის მუნიციპალიტეტის 2016 წლის ბიუჯეტიდან დახმარებას მიიღებენ თირკმლის უკმარისობით დაავადებული პირები, რომლებიც საჭიროებენ ხანგრძლივი პერიოდის განმავლობაში დიალეზის კურსის ჩატარებას _ ამ კატეგორიის ადამიანებს ყოველთვიურად. 140 ლარი მიეცემათ.
0-დან 18 წლამდე ასაკის შშმ პირები ყოველთვიურად 30 ლარს მიიღებენ, ხოლო მედიკამენტების შესაძენად, ერთჯერადად _ 100 ლარს.
წლევანდელი ბიუჯეტით ისევ დაფინანსდება გულის თანდაყოლილი პათოლოგიით დაავადებული 18 წლამდე პირთა გეგმიური მონიტორინგი, რომელიც თითოეულზე 500 ლარით არის განსაზღვრული.
არის სიახლე _ ჩოხატაურის მუნიციპალიტეტის ბიუჯეტი პირველად დააფინანსებს ეპილეფსიით დაავადებულ 18 წლამდე ასაკის პირების გეგმიურ მონიტორინგს წლის განმავლობაში, არაუმეტეს, 600 ლარის ოდენობით.
