კოალიცია “ქართული ოცნების” ოზურგეთის ოფისის ხელმძღვანელად კონსტანტინე შარაშენიძის კანდიდატურა ორიოდე დღის წინ დაამტკიცეს. შარაშენიძე მაღალი საჯარო ინტერესის სუბიექტად იქცა და ჟურნალისტებიც ცდილობდნენ, რაც შეიძლება მეტი ინფორმაცია მოეძიებინათ მის შესახებ. სხვადასხვა წყაროებიდან მოწოდებულ ცნობებზე დაყრდნობით მომზადებული ინფორმაციები, ვერსიის და არა უტყუარი ინფორმაციის სახით, ვებზეც განთავსდა; პარალელურ რეჟიმში კი, ჟურნალისტები მოწოდებული ცნობების გადამოწმებას თავად შარაშენიძესთან შეუდგნენ. თუმცა, აღმოჩნდა, რომ იგი, ვებზე განთავსებული მასალის გამო, განაწყენებული იყო და არც მკვეთრი გამოთქმებისგან შეუკავებია თავი. ბატონ კონსტანტინეს შევახსენებთ, რომ პოლიტიკოსისთვის მეტი დათმენის ხარისხია საჭირო და ნებისმიერ ადამიანთან ურთიერთობისას, თუნდაც ცამდე მართალს, მეტი კორექტულობა მართებს. გთავაზობთ მასთან საუბრის ჩანაწერს:
_ ბატონო კონსტანტინე, როგორც ვიცით, თქვენ კოალიცია “ქართული ოცნების” ოზურგეთის ოფისს უხელმძღვანელებთ. შეხვდით თუ არა ბიძინა ივანიშვილს?
_ არ შევხვედრივარ, მაგრამ თუ საჭირო იქნება, შეხვედრაც მოხდება. როგორც იცით, სამშაბათს არის ოფისის გახსნა ოზურგეთში. თუ ჩამოვიდა, მაშინ კი შევხვდები და ვნახავ.
_ ვინ იყვნენ ის პიროვნებები, რომლებმაც მიიღეს გადაწყვეტილება, რომ თქვენ გამხდარიყავით “ქართული ოცნების” ოზურგეთის ოფისის ხელმძღვანელი?
_ არ ვიცი, არ ვიცი, კოალიციის პოლიტიკურმა საბჭომ გადაწყვიტა ეს საკითხი. უნდა გავიმარჯვოთ არჩევნებში, ეს არის ჩვენი გეგმა, სიმართლემ უნდა გაიმარჯვოს ამ ცხოვრებაში.
_ თქვენ ამ საბჭოს არ შეხვდით?
_ დიახ, შევხვდი, მაგრამ მათი სახელები არ ვიცი. გიორგი, საიტზე რა წერია? იქნებ, ავტორს დაუსვათ ეს შეკითხვა?
_ რას გულისხმობთ, რა უნდა ვკითხოთ სტატიის ავტორს?
_ გუშინდელ ფაქტებს ვინც წერს, დახედეთ და ნახავთ, რაც გითხარი, ის წაიკითხე, “გურია ნიუსის” ვებგვერდზე!
_ კონკრეტულად, რას გულისხმობთ? გუშინ ჩვენს ვებ-გვერდზე ორი სტატია გავრცელდა.
_ ნიკოლაიშვილის ნათესავი, მაღალჩინოსნები…
_ არ ადასტურებთ, რომ რამდენიმე მაღალჩინოსანთან მეგობრობა გაკავშირებთ?
_ ეს არის სრულიად მოუმზადებელი ადამიანის, არაპროფესიონალური ადამიანის შეფასება ჩემის აზრით. თუ ადამიანი ჟურნალისტია და ერთი ადამიანის შეკვეთას არ ასრულებს (ბატონ კონსტანტინეს არ დაუკონკრეტებია ეს “ერთი ადამიანი” ვინ იყო. ავტ.), როგორ შეიძლება ასეთი რამის დაწერა, რა წყაროზე არის საუბარი? რაღაცა ახლოსთან ხომ უნდა იყოს ეს სიმართლე? საიდან მოდის ამ ადამიანს ეს აზრი? საერთოდ, ნიკოლაიშვილი ნანახი მყავს?
_ არ გყავთ ნანახი? არც მაღალჩინოსნებთან მეგობრობთ? არც 2010 წლის ადგილობრივ არჩევნებზე იყარეთ კენჭი “ქრისტიან დემოკრატების” სახელით? ამ ყველაფერს უარყოფთ?
_ ჭორიკნები ხართ! _ გვითხრა შარაშენიძემ და ტელეფონი გაგვითიშა.
მკითხველს აქვე შევახსენებთ, რომ “ქართული ოცნების” ოზურგეთის ოფისის გახსნა 10 აპრილს იგეგმება.
