ვანო ჩხარტიშვილის ადვოკატის იმედა დვალიძის განცხადებით, „ფოთის წისქვილქარხანა და ნავმისადგომები ორგანიზებულმა ჯგუფმა დანაშაულებრივი სქემით მიითვისა“
„21 იანვარს ჩვენ საჯაროდ მივმართეთ სასამართლო ხელისუფლებას და მოვითხოვეთ გადამჭრელი ზომების მიღება ფოთისწისქვილქარხნისა და ნავმისადგომების გარშემო მომდინარე დავის განმხილველ მოსამართლეზე განხორციელებული უპრეცედენტო ზეწოლის აღსაკვეთად.
სამწუხაროდ, ოპონენტების საპასუხო განცხადებაში კვლავაც იყო საზოგადოების დეზინფორმაციის მცდელობა. ყველა ასეთ ცდას არგუმენტებითა და ფაქტებით სასამართლოზე გავცემთ პასუხს, საზოგადოებას კი გვინდა კიდევ ერთხელ ავუხსნათ თუ რატომაა ეს საქმე მნიშვნელოვანი და პრეცედენტული საქართველოში სამართლიანობის აღდგენისათვის.
2010 წელს ბიზნესმენ ვანო ჩხარტიშვილისთვის წისქვილქარხნის წართმევასა და ნავმისადგომების იჯარის გაუქმებაში კერძო იურიდიულ და ფიზიკურ პირებთან (თიბისი ბანკი, კერძო პირები კოკი ოსიპოვი და სოსო დოლიძე) ერთად აქტიურად მონაწილეობდა პროკურტურა, შსს და ნოტარიუსად ქცეული სასამართლო.
ეს საქმე სამაგალითოა იმდენად , რამდენადაც ანალოგიური სქემით არაერთი ბიზნესი იქნა დარბეული. ახალმა ხელისუფლებამ აღკვეთა ბიზნესზე ძალადობა, მაგრამ დაზარალებულებისთვის სამართლიანობის აღდგენა კვლავაც პრობლემატურ საკითხად რჩება. გვესმის, რომ ეს არ არის ადვილი და ერთ დღეში გადასაწყვეტი საქმე, მაგრამ ვერსად გავექცევით იმ უდაო ფაქტს, რომ წართმეული ბიზნესების უდიდესი ნაწილი დღესაც წინა ხელისუფლების კარის ბიზნესმენების ხელშია და მათი მხრიდან ადგილი აქვს დანაშაულებრივად მითვისებული ქონების გათეთრებისა და დაკანონების ცდებს.
ჩვენი საქმე პრეცედენტულია იმდენად, რამდენადაც დაზარალებულებისათვის შედეგი იქნება ორიენტირი ბიზნეს სამყაროში დაძაბულობის მოხსნისა და სამართლიანობის დასამკვიდრებლად.
ჩვენ დავიწყეთ სამართლებრივი დავა, მაგრამ სერიოზულ პრობლემებს წავაწყდით. წინა ხელისუფლებასთან მჭიდროდ დაკავშირებული მოძალადე ბიზნეს-სტრუქტურები და კონკრეტული პირები, დარჩნენ რა ზემოქმედების სახელისუფლო ბერკეტების გარეშე, ცდილობენ დააშანტაჟონ ჯერ კიდევ სუსტი სასამართლო სისტემა და ფსიქოლოგიური ტერორისა და წნეხის ქვეშ მიაღებინონ მათთვის სასურველი გადაწყვეტილება.
წისქვილქარხნის თემას ჩვენს წინა განცხადებაში შევეხეთ, ამჯერად ნავმისადგომებზე გავამახვილებთ ყურადღებას, რადგანაც იგი თვალსაჩინო მაგალითია იმისა, თუ როგორ სინქრონულად და ძალადობრივად მოქმედებდა ოპონენტთა ჯგუფი ქონებისა თუ ბიზნესის უკანონოდ დაუფლებისთვის.
ფოთის წიქვილქარხნის ფლობა აზრს კარგავს ნავმისადგომების გარეშე. ამიტომაც, ვანო ჩხარტიშვილის კომპანიებს ორივე ფრონტიდან შეუტიეს. თი ბი სი ბანკი წიქვილქარხნის წინააღმდეგ ამუშავდა, ხოლო საზღვაო ნავსადგურში ჩხარტიშვილის კომპანიებისთვის ნავმისადგომების იჯარის უფლების გაუქმების საქმეში დაინტერესებულ სოსო დოლიძესთან ერთად მთელი სახელისუფლებო მანქანა ჩაერთო.
უფრო მეტიც,სააკაშვილის ხელისუფლების ჩარევით და მითითებით ფოთის წისქვილქარხნის თიბისი ბანკისადმი კრედიტის დასაფარი თანხა ჩხარტიშვილის პარტნიორს ბანკში გაუჩერეს, განუმარტეს, რომ ნავმისადგომით ვერც ის ისარგებლებდა და აიძულეს უარი ეთქვა ჩხარტიშვილის კომპანიების ქონების შეძენაზე.
იმავე წლის ივნისში ფოთის პორტმა ჩხარტიშვილის კომპანიებს სრულიად უსაფუძვლოდ შეუწყვიტა საიჯარო ხელშეკრულებები და ეს უფლება სოსო დოლიძის კომპანიას გადასცა.
მოწინააღმდეგე მხარემ მიზნის მისაღწევად გამოიყენა ყალბი საექსპერტო დასკვნა პორტში არსებული ამწეების თითქოსდა გაუმართავობასთან დაკავშირებით. არც ისაა გასაკვირი, რომ ჩვენ ფოთის საქალაქო სასამართლოში მაშინ საქმე წავაგეთ.
2014 წელს ფინანსთა სამინისტროს საგამოძიებო სამსახურმა ოფიციალურად დადასტურა, რომ საექსპერტო დასკვნა ყალბი იყო. დაქირავებულ„ექსპერტებს“ არ გადმოულახავთ საქართველოს საზღვარი, არ უნახავთ ეს ამწეები და ექსპერტიზა რეალურად არ განუხორციელებიათ.
ასეთია, ჩვენი ბიზნესის დატერორების გამოცხადებული ქრონიკა, რომელიც, სამწუხაროდ, დღეს სასამართლოს დაშანტაჟებით გრძელდება და არის მცდელობა, არაკანონიერი, გაყალბებული დოკუმენტებით წართმეული ქონება შეინარჩუნონ.
კიდევ ერთხელ მივმართავთ სასამართლო ხელისუფლებას მოსამართლეთა დასაცავად ზომების მიღებისაკენ, ხოლო ოპონენტებს მოვუწოდებთ სახის შენარჩუნებისა და სამართლებრივ სივრცეში დაბრუნებისკენ. ამასთან, ყველამ იცოდეს, რომ დისკრედიტაციის ნებისმიერ მცდელობაზე გვექნება შესაბამისი და საქმეს ბოლომდე, სამართლის აღდგენამდე მივიყვანთ” _ აღნიშნულია დვალიძის მიერ გავრცელებულ განცხადებაში.
ჩხარტიშვილის ადვოკატს განცხადებით უპასუხეს სს "ფოთის საზღვაო ნავსადგურის", "რას ალ ხაიმას" საინვესტიციო ორგანოს და შპს "ტრანსფორდის" წარმომადგენლებმა:
"სს "ფოთის საზღვაო ნავსადგურის", რას ალ ხაიმას საინვესტიციო ორგანოს და შპს "ტრანსფორდის" წარმომადგენლები დღემდე ყურადღებით აკვირდებიან თბილისის საქალაქო სასამართლოში ვანო ჩხარტიშვილის და მასთან აფილირებული კომპანიების მიერ ინიცირებულ უპრეცედენტო სამართლებრივ ავანტურას და ყოველნაირად ცდილობენ დავა არ გავიდეს იურიდიული ჩარჩოებიდან, რისთვისაც აქამდე მათ ხელთ არსებულ ყველა საპროცესო საშუალებას მიმართავდნენ.
თუმცა, ბოლო დღეებში საქმემ კიდევ უფრო საინტერესო მიმართულება შეიძინა, როდესაც ვანო ჩხარტიშვილის წარმომადგენელმა პრესის საშუალებით ზემოღნიშნულ კომპანიებს სასამართლოზე ზეწოლასა და შანტაჟში დასდო ბრალი.
არსებული ეჭვების გასაქარწყლებლად და საზოგადოების ინფორმირების მიზნით მიზანშეწონილად მიგვაჩნია საზოგადოებას განვუმარტოთ ის სამართლებრივად აბსურდული მდგომარეობა, რომელშიც მოსამართლე გიორგი სულაკაძემ თბილისისა და ფოთის საქალაქო სასამართლოები ჩააგდო.
ვანო ჩხარტიშვილი და მისი წარმომადგენლები, დაახლოებით ერთი წლის განმავლობაში ცდილობდნენ საქართელოს უზენაესი სასამართლოს გადაწყვეტილებით 2010 წელს დასრულებული საქმის განახლებას ფოთის საქალაქო სასამართლოში.
მიუხედავად იმისა, რომ საბოლოო ჯამში ფოთის საქალაქო სასამართლომ საქმის წარმოება განაახლა, ბ-ნი ჩხარტიშვილის წარმომადგენელმა მიიღო რბილად რომ ვთქვათ ალოგიკური გადაწყვეტილება: ფოთის საქალაქო სასამართლოდან გამოიხმო თავისი სარჩელი და ზუსტად იდენტური შინაარსის მოთხოვნა რატომღაც თბილისის საქალაქო სასამართლოში წარადგინა. რატომღაც ეს სარჩელი სწორედ გიორგი სულაკაძეს დაეწერა, და რატომღაც გიორგი სულაკაძემ წარმოებაში მიიღო ვანო ჩხარტიშვილის ერთი კომპანიის ისეთი სასარჩელო მოთხოვნა, რომელიც თვით სარჩელზე დართული დოკუმენტების მიხედვით მის მეორე კომპანიას ეკუთვნოდა.
მოგვიანებით, ეს მეორე კომპანია მოსამართლე გიორგი სულაკაძე ისე "ჩართო" საქმეში, რომ მისი სარჩელიც თვითონვე "მიიწერა" და ერთ საქმედ გააერთიანა.
გიორგი სულაკაძის უცნაური მონდომება და საქმის განხილვისადმი ინტერესი განსაკუთრებით ნათელი გახდა მას შემდეგ, რაც ფოთის საქალაქო სასამართლომ თბილისში და ფოთში პარალელურად მიმდინარე საქმეები ერთმანეთთან დაკავშირებულად მიიჩნია და ორი საქმის გაერთიანების გადაწყვეტილება მიიღო.
გიორგი სულაკაძე არ დაემორჩილა ფოთის სასამართლოს განჩინებას, რომელიც კანონის თანახმად ცალკე არ საჩივრდება.ბ-ნი სულაკაძე ისევ აგრძელებს საქმის განხილვას, მიუხედავად იმისა, რომ ფორმალურად მის წარმოებაში არსებულ საქმეს არც ნომერი აქვს და აღაც არსებობს, ვინაიდან ფოთის სასამართლოს განჩინებით ის უკვე ფოთის სასამართლოს წარმოებაში არსებულ საქმესთან გაერთიანდა.
ჩვენ შევეცადეთ გიორგი სულაკაძის მიერ საქმეზე დაშვებული საპროცესო დარღვევების თხუთმეტგვერდიანი ნუსხიდან ყველაზე თვალშისაცემ და უხეშ გადაცდომებზე გაგვემახვილებინა ყურადღება.
მოსამართლის მიერ სხვა სასამართლოს განჩინების/გადაწყვეტილების შესრულებაზე უარის თქმა არა უბრალო გადაცდომა, არამედ სისხლის სამართლის დანაშაულია, რის ახსნასაც სამწუხაროდ ბ-ნი სულაკაძისათვის ბოლო სამი თვეა უშედეგოდ ვცდილობთ.
ამ ყველაფრის ფონზე ბ-ნი ჩხარტიშვილის წარმომადგენლის განცხადებები და მოსამართლე გიორგი სულაკაძის "დაცვა შანატაჟისა და ზეწოლისაგან" უნდა განვიხილოთ მოსამართლისათვის "ალიბის"" შექმნის და მისი "გაბედულების" წახალისების ერთგვარ კამპანიად, რომელსაც ძალიან კონკრეტული მიზნები აქვს: გიორგი სულაკაძემ ბოლომდე უნდა მიიყვანოს დაწყებული საქმე და ქართული სამართლებრივი სისტემის დამანგრეველი გადაწყვეტილების მიღების საფასურად დააკმაყოფილოს ბ-ნი ჩხარტიშვილის კომპანიების აბსურდული მოთხოვნები.
სს "ფოთის საზღვაო ნავსადგური", რას ალ ხაიმას საინვესტიციო ორგანო და შპს "ტრანსფორდი" კვლავ გააგრძელებენ სამართლებრივი გზებით ბრძოლას მოსამართლე გიორგი სულაკაძის უკანონო ქმედებებისაგან თავის დასაცავად და ამისთვის გამოიყენებენ კანონით მათთვის მინიჭებულ ყველა უფლებასა და შესაძლებლობას, იმისგან დამოუკიდებლად, რამდენად კომფორტულად გრძნობს ბ-ნი სულაკაძე ან ბ-ნი ჩხარტიშვილი თავს ამ სამართლებრივ ბრძოლაში." _ აღნიშნულია კომპანიების მიერ გავრცელებულ განცხადებაში.
ვანო ჩხარტიშვილის ადვოკატის განცხადებას ამ დრომდე არ გამოხმაურებია სასამართლო ხელისუფლება.
