საქართველოს ეროვნული საფეხბურთო ჩემპიონატის უმაღლესი ლიგის მსაჯები მეორე წრისთვის თურქეთში მოემზადებიან. 39 ქართველი არბიტრი ფეხბურთის ფედერაციის დაფინანსებით, 2-9 თებერვალს ანტალიის რეგიონში კვალიფიკაციის ამაღლების მიზნით ერთკვირიან პროფესიულ შეკრებას გაივლის. ქართველი მსაჯები საერთაშორისო ამხანაგურ მატჩებს მოემსახურებიან. ფეხბურთის ფედერაციის ხელმძღვანელებმა გამგზავრებამდე მსაჯებთან საინფორმაციო ფორმატის შეხვედრა გამართეს. სფფ-ს გენერალურმა მდივანმა, დავით მუჯირმა და ვიცე პრეზიდენტებმა, კახა ჭუმბურიძემ და ნიკოლოზ ჯღარკავამ მსაჯთა განყოფილების მიმართულებით დაგეგმილ სიახლეებზე ისაუბრეს. ახალი საფეხბურთო სეზონიდან მსაჯთა განყოფილებაში სტრუქტურული ცვლილებები იგეგმება, რაც გულისხმობს ახალი სამუშაო რგოლის შექმნას მსაჯთა რეკრუტირებისა და განვითარების მიმართულებით. სფფ-ს ხელმძღვანელობა საინფორმაციო ფორმატის შეხვედრას მომავალ კვირას ეროვნული საფეხბურთო ჩემპიონატის პირველი ლიგის მომსახურე მსაჯებთანაც გეგმავს.
Developed By Web Features 2026 © All rights reserved