რელიგიური სიწმინდეების, რელიგიური ორგანიზაციის, ღმრთის მსახურის ან მორწმუნის შეურაცხყოფა 300-ლარიანი ჯარიმით, ხოლო რელიგიური შენობების და სხვა რელიგიური სიწმინდის წაბილწვა, მასზე ნებისმიერი წარწერის გაკეთება ან დაზიანება 500 ლარით დაჯარიმებას გამოიწვევს. განმეორების შემთხვევაში კი, თანხა გაორმაგდება.
ამის შესახებ საქართველოს "ადმინისტრაციულ სამართალდარღვევათა კოდექსს", შესაძლოა, ახალი მუხლი დაემატოს. როგორც ცნობილია, დეპუტატ სოსო ჯაჭვლიანის მიერ ინიცირებულ კანონპროექტს პარლამენტის ადამიანის უფლებათა დაცვის კომიტეტმა მხარი დაუჭირა.
ვიდრე კანონპროექტს პარლამენტი დაამტკიცებს, "გურია ნიუსი" დაინტერესდა, თუ რას ფიქრობს მოსახლეობა რელიგიური მრწამსის შეურაცხყოფისთვის ჯარიმების დაწესებასთან დაკავშირებით და თბილისის ქუჩებში მოქალაქეები გამოიკითხა.
ირაკლი ჭიჭინაძის თქმით, ჯარიმების დაწესება კარგია, რადგან ეს ადამიანებს სხვა რელიგიის მიმდევართა პატივისცემას აიძულებს.
"რა თქმა უნდა, ჯარიმები უნდა იყოს. თუ დემოკრატიულ სახელმწიფოში ცხოვრება გვინდა, მაშინ სხვის რელიგიურ შეხედულებებს პატივი უნდა ვცეთ და, ალბათ, ჯარიმების დაწესება ამის გაკეთებას გვაიძულებს ", _ ამბობს ჭიჭინაძე.
როგორც "გურია ნიუსს" იანა შარიქაძემ უთხრა, ნებისმიერი სახის შეურაცხყოფა უნდა ისჯებოდეს.
"ჩემი აზრით, ნებისმიერი სახის შეურაცხყოფა უნდა ისჯებოდეს, მით უმეტეს, თუ საქმე რელიგიურ თემას ეხება. დამნაშავეები უნდა დაისაჯონ,"_ აღნიშნა შარიქაძემ.
მოქალაქე გიორგი ბოლქვაძეს კი მიაჩნია, რომ ჯარიმები არ უნდა დააწესონ.
"ადმინისტრაციული ჯარიმების დაწესებამ, შესაძლოა, თავისუფალი სიტყვის გამოთქმის უფლება მოსპოს, სხვა შედეგი, არ მგონია, ჰქონდეს,"_ ამბობს ბოლქვაძე.
ბოლქვაძის მსგავსად ფიქრობს ტატო მიროტაძეც.
"ჯარიმების დაწესება არც თუ ისე კარგი აზრია, მაშინ როცა ქვეყანაში უმუშევრობაა. თუმცა, თუ შედეგს გამოიღებს უნდა დააწესონ,"_ თქვა მიროტაძემ.
თბილისის მკვიდრ გივი მამუჩაშვილს კი მიაჩნია, რომ კანონპროექტით გათვალისწინებული ჯარიმები საკმაოდ მაღალია.
"რა თქმა უნდა ადმინისტრაციული ჯარიმები უნდა იყოს, მაგრამ ჩემი აზრით, თანხები არის მაღალი და თუ შეამცირებენ კარგი იქნება,"_ ამბობს მამუჩაშვილი.
როგორც "გურია ნიუსთან" იზაბელა ალიევამ აღნიშნა, კანონის მიღება ხელს შეუწყობს, რომ სხვადასხვა რელიგიის მიმდევრებმა ერთმანეთს შეურაცხყოფა არ მიაყენონ.
"აუცილებლად უნდა იყოს; ჯარიმების დაწესება ხელს შეუწყობს, რომ სხვადასხვა რელიგიის მიმდევრებმა ერთმანეთს შეურაცხყოფა არ მიაყენონ ,"_ აღნიშნა ალიევამ.
