საფეხბურთო კლუბმა ლანჩხუთის "გურიამ" დღეს ურეკში კიდევ ერთი ამხანაგური ტესტ – მატჩი გამართა უმაღლესლიგელ ფოთის "კოლხეთთან" და ახალი მწვრთნელის ხელში პირველი გამარჯვებაც იგემა – 2:0.
გუნდის უშუალოდ "ლაივში" ხილვა პირველად მოგვეცა და გარკვეული დასკვნების გაკეთებაც შეიძლება. უპირველესად უნდა ითქვას, რომ ეს გუნდი აშკარად ჯობნის იმ გუნდს, რომელმაც საქართველოს ჩემპიონატის პირველი წრე ჩაატარა. მეორე, რუს თავკაც ვიქტორ დემიდოვს აქცენტი ათლეტურ, ფიზიკურად ძლიერ ფეხბურთელებზე აქვს აღებული. მესამე, ფეხბურთელებს შეთამაშება და ურთიერთგაგება ჯერ კიდევ ცოტა გააჩნიათ და ამ კომპონენტში "კოლხეთი" უფრო დალაგებულად თამაშობდა.
თავად შეხვედრა ცუდი საცქერი არ გამოდგა. იყო ხისტი ბრძოლა და სისწრაფისკენ ლტოლვა, მაგრამ ხან ზემონახსენები შეუთამაშებლობა და ხანაც სათამაშო კლასი, უფრო მეტს ითხოვდა. რამდენიმე ფეხბურთელის გამორჩევა მაინც შეიძლება. საიმედო იყო დაცვაში ჩადუნელი, ასევე ნოზაძე, ახალწვეულ გამყრელიძესაც ეტყობა კოჭებში რუსულ კლუბებში თამაშის გამოცდილება, იგივე ითქმის კვეკვესკირზეც. ძალიან ტექნიკური და მოაზროვნე ჩანს უკრაინელი მოროზენკო, რომელიც გამთამაშებლად ირჯებოდა. მართალია ამ ჯერზე უკრაინელ კარის დარაჯ პოლტავცევს ბევრი საქმე არ ქონია, მაგრამ აშკარაა, რომ ის კარგი მეკარეა. მონდომება არ აკლდა ალავერდაშვილსაც, რომელიც ურიგოდ არ გამოიყურებოდა.
პირველ ტაიმში 33 – ე წუთზე ანგარიში კვეკვესკირმა გახსნა, მალე მსაჯმა "კოლხეთს" კაცი გაუგდო და მთელი მეორე ტაიმი კაცნაკლული დატოვა.
შესვენების შემდგომ ეს ფაქტორი დიდად შესამჩნევი არ ყოფილა, მაგრამ "გურიამ" მაინც მოახერხა მეორედ გატანა. ეს გოლი "აფრიკული" გამოდგა. შესვლაზე შესულმა ბურკინა ფასოელმა პატერსონმა მარჯვენა ფლანგზე უნარიანად დაამუშავა ბურთი და საპენალტოს მიდამოებში მყოფ ჟუნიორს გადააწოდა. ამ კოტ დიუარელმა ზორბა ცენტფორვარდმა კი კარგად დამალა ბურთი, შემოტრიალდა და ცაციათი მეტოქის კარის შორეულ დაბალ კუთხეში მოათავსა.
საერთოდ ჟუნიორს ამის გარდა დიდი ვერაფერი არ შეუქმნია და თუ არ მოუმატა აშკარაა, რომ "გურიას" შეტევაში გაუჭირდება. რაც შეეხება პატერსონს, ის შეტევაში უფრო სარგებლიანი ჩანს, აი, დაცვაში კი რამდემჯერმე უხეშად შეცდა. რაც შეეხება 19 წლის უკრაინელ ახალწვეულ ვასილ შტანდერს, მას ტრამვის გამო არ უთამაშია.
ფაქტია, რომ მოგებით დემიდოვი კმაყოფილი დარჩა, თამაშის ხარისხით კი, მთლად ასე არ იქნება.
როგორც გავიგეთ, კიდევ სამ ლეგიონერს ელოდებიან გუნდში. ისინი დღე-დღეზე ჩამოვლენო გვითხრა კლუბის ხელმძღვანელობამ, თუმცა კიდევ ბევრი კითხვის ნიშანია კლუბის ირგვლივ და პასუხიც არ ჩანს. რატომღაც გასაიდუმლებულია იმ ხალხის ვინაობა, ვინც სპონსორობას აპირებს. არც ის ვიცით, რა დოზით მოხდება თანადაფინანსება, რა გეგმები შედის ამ ადამიანების ახლო თუ შორეულ პერსპექტივაში. იმედს ვიტოვებთ, სეზონის განახლებამდე სათქმელი ითქმება და ყველა კითხვასაც პასუხი გაეცემა.
დემიდოვმა გუნდი ასეთი შემადგენლობით ათამაშა: პოლტავცევი, გელაშვილი, ბენეტი, ნოზაძე, ჩადუნელი, ნუნიესი, მოროზენკო, კვეკვესკირი, გამყრელიძე, ალავერდაშვილი, ჟუნიორი.
შეცვლაზე შევიდნენ: პატერსონი, ზაზულია, კილაძე.
