მისი ვერტმფრენი ლელოს დაწყებამდე ნახევარი საათით ადრე დაფრინდა სოფელში, თუმცა, 20-იოდ წუთი პირველი პირი არ გამოჩენილა.
ზუსტად 5 საათზე, შუხუთის ცენტრში ბურთი ავარდა და “ზემოურები” და “ქვემოურები” 16-კილოგრამიან მრგვალ საგანს საკინჭიესა თუ საკირიეს ღელეების გადასალახად ეკვეთნენ. ვეტერანი ლელობურთელები გაკვირვებული იყვნენ მონაწილეთა რაოდენობით, რაც ბოლო ორი წელია თვალშისაცემია. ამის მიზეზი ისაა, რომ შუხუთში შემორჩენილი თამაშობით ხელისუფლება იჩენს დაინტერესებას. თუ გასულ წელს ინფრასტრუქტურის მინისტრის რამაზ ნიკოლაიშვილისა და გარემოს დაცვის მინისტრ გოგა ხაჩიძის გარდა, ლელოთი შს და იუსტიციის პირველი პირები _ ვანო მერაბიშვილი და ზურაბ ადეიშვილი დაინტერესდნენ, ამჯერად თვით ქვეყნის პირველმა პირმა დააფასა ტრადიციული თამაშობა და მისასალმებელი სიტყვაც წარმოთქვა; თუმცა, დიდხანს არ ულაპარაკია და რატომღაც არც საპიარო-საპარადო ტექსტი უთქვამს.
პრეზიდენტი, ასევე იმყოფებოდა სტუმრად ვეტერან ლელობურთელ ქალბატონთან, 92 წლის თინა იმნაიშვილთან, რომელიც 40 წლის მანძილზე თამაშობდა, თურმე, ლელობურთს. მასთან სტუმრობისას სააკაშვილმა კიდევ ერთხელ გაიხსენა, რომ აქამდე გურიას ვერ მოხედეს ისე, როგორც საჭირო იყო და სამომავლო დაპირებები მისცა _ სპორტულ ობიექტისა და პროფსასწავლებლის სახით. ქალბატონმა თინამ პრეზიდენტი დაანამუსა _ ლანჩხუთელმა არაფერი გაგვიკეთა და აბა, შენ იცი, შენი დიდი იმედი გვაქვსო.
მართალია, შუხუთში დაცვის განსაკუთრებული ზომები იყო მიღებული, თუმცა, კიდევ ერთხელ დამტკიცდა, რომ მიხეილ სააკაშვილი ერთ-ერთი ძნელად დასაცავი პრეზიდენტია: იგი ჯერ კიდევ შემოსვლისას აღმოჩნდა ლელოს “გორგალოს” სიახლოვეს _ პრეზიდენტი სტუმართა ლოჟაში რამაზ ნიკოლაიშვილთან და გოგა ხაჩიძესთან ერთად მივიდა. იქვე იმყოფებოდნენ გურიის გუბერნატორი და ადგილობრივი ხელისუფლების პირველი პირები.
როგორც ვთქვით, პრეზიდენტი ლელოს შუაგულში კიდევ ერთხელ მისასალმებელი სიტყვისას აღმოჩნდა. მას თან მეუღლე და უმცროსი ვაჟიშვილი ნიკოლოზი ახლდნენ. მოგვიანებით პრეზიდენტმა უმცროს ვაჟთან ერთად ახლოდანაც ადევნა თვალყური სანახაობას. როგორც გვითხრეს, თავად პატარა სააკაშვილს მოუთხოვია ახლოს მისვლა. ამ დროს დაცვა “საგანგებო რეჟიმზე” გადაერთო და ეზოს ღობესთან ცოცხალი კორიდორი შექმნა. როგორც თქვეს, იმნაიშვილების ოჯახში პრეზიდენტი წინა ჭიშკრიდან არ ჩასულა, სავარაუდოდ, უსაფრთხოების ნორმების გამო. რაც ყველაზე საინტერესოა, “მიშა-მიშას” “დაგეგმილი” შეძახილები არ ყოფილა, სამაგიეროდ, დამხვდურებმა “გურია-გურია” დააგუგუნეს.
შუხუთში, ლელოს მიმდინარეობისას გადაღებული ფოტო პრეზიდენტ მიხეილ სააკაშვილის “ფეისბუქის” პირადი გვერდის ქუდად არის გამოტანილი _ ფოტოზე ქვეყნის პირველი პირი უმცროს შვილთან, ნიკოლოზთან არის გამოსახული, როცა ისინი ეზოდან ადევნებდნენ თვალს თამაშობას. ბევრს ბჭობდნენ იმის შესახებ, მიიღებდა თუ არა თამაშობაში მონაწილეობას თავად პრეზიდენტი. როგორც ამბობენ, ამაზე საუბარი ნამდვილად იყო, თუმცა, დაცვის სამსახურმა ასეთი რამ გამორიცხა. კიდევ ერთი მიზეზი ის ყოფილა, რომ სააკაშვილის თამაშში ჩართვა ლელოს ელფერს დაუკარგავდა, რადგან მას მოერიდებოდნენ. არავინ იცის, რეალურად განიხილებოდა ეს საკითხი თუ არა, მაგრამ ფაქტია, პრეზიდენტმა რამდენჯერმე გაიწია ეპიცენტრისაკენ და დაცვას გვარიანი ნერვიულობაც მოუხდა, ამის მიუხედავად, შეკრებილებიდან ბევრს ბოლომდე სჯეროდა, რომ ქარიზმატული პრეზიდენტი “გორგალოში” “შევარდებოდა”.
სიტყვით გამოსვლიდან დაახლოებით ერთ საათში პრეზიდენტმა შუხუთი დატოვა. ლელოს ბოლომდე ადევნებდა თვალს რამაზ ნიკოლაიშვილი:
_ რა ხდება, რაღაც უკმაყოფილო ჩანხართ, _ ღიმილით გვითხრა მინისტრმა და იქვე განაგრძო: _ ხომ კარგია, ლანჩხუთის სტადიონს რომ ვაკეთებთ?
_ კი, ძალიან კარგია, თუ მართლაც გაკეთდება სტადიონი.
_ აუცილებლად გავაკეთებთ, _ გვითხრა ნიკოლაიშვილმა. იგი ხელმძღვანელობს გურიის აღორძინების ფონდს, რომელმაც უნდა დააფინანსოს “ევგრაფი შევარდნაძის” რეკონსტრუქცია.
შუხუთი მალევე დატოვა სამთავრობო დაცვის კორტეჟმა, ერთ-ერთი ავტომობილი “გორგალოში” მოჰყვა და რამდენიმეწუთიანი ალყის შემდეგ დააღწია თავი შუხუთს. როგორც გავიგეთ, არც პრეზიდენტი და არც რამაზ ნიკოლაიშვილი სუფრაზე არ დარჩენილან. რაც შეეხება ლელოს, ის კვლავაც ზემოურებმა, ანუ შუხუთლებმა მოიგეს. როგორც ითქვა ამის მიზეზი, ჯერჯერობით, ქვემოურთა ნაკლებორგანიზებულობა გახლავთ.
