ქალაქ ოზურგეთის მუნიციპალიტეტის საკრებულოს დეპუტატ თამარ ნადირიძესა და ადგილობრივ ხელისუფლებას შორის ურთიერთობა კვლავ დაძაბულია. თამარ ნადირიძე ქალაქ ოზურგეთის მერს ბეგლარ სიორიძესა და საკრებულოს თავმჯდომარეს გელა კობალაძეს ტენდერში გამარჯვებულ კომპანიებთან გარიგებაში სდებს ბრალს. კონკრეტულად კი საუბრობს შპს "პირამიდას" მიერ შესრულებულ სამუშაობზე. ნადირიძის თქმით, კომპანია არაკეთილსინდისიერად და უხარისხოდ ასრულებს სამუშაოებს. საკრებულოს დეპუტატის მიერ გაკეთებულ განცხადებას ხელისუფლების მიერ უმალვე მოჰყვა რეაგირება. დეპუტატი შპს "პირამიდას" წარმომადგენლებს ქალაქ ოზურგეთის მუნიციპალიტეტის საკრებულოს თავმდომარემ გელა კობალაძემ შეახვედრა.
"ქალაქ ოზურგეთის საკრებულოს თავმჯდომარის გელა კობალაძის ინიციატივით შევხვდი შპს "პირამიდას" წარმომადგენელს. არ შემიძლია არ აღვნიშნო, რომ შეხვედრას ჰქონდა საქმის გარჩევის ხასიათი და ამ პირის პრეტენზიები სრულიად ბუნდოვანი და გაურკვეველი იყო. ხან პრეტენზია ჰქონდა გუბერნატორისათვის მიქირავებულ ტრაქტორზე, ხანაც პირამიდას მიერ დაგებულ გზასთან დაკავშირებით ოზურგეთის თემების გამგეობასთან და პასუხს მთხოვდა იმაზე, თუ რატომ არ დავინტერესდი კონჭკათის გზის დაგებასთან დაკავშირებულ პრობლემებზე და რატომ ვიყავი დაინტერესებული მხოლოდ ქალაქში მიმდინარე მშენებლობებით. აქვე მითხრა, რომ მას და მის ძმას სერიოზული პრობლემები ჰქონდა ამ საქმესთან დაკავშირებით. მოკლედ რომ ვთქვათ, ბატონი კობალაძის მიწვევით აღმოვჩნდი ქუჩურ გარჩევაზე, რომელსაც ეს უკანასკნელი თვალყურს ძალიან მშვიდად ადევნებდა.
ვინაიდან ოზურგეთის მერიას და საკრებულოს ისიც ვერა აქვს გარკვეული ვინ არის ტენდერში გამარჯვებული ფირმის წარმომადგენელი, მივმართავ სამართალდამცავ ორგანოებს, მათ მაინც გაარკვიონ ვინ აშენებს ან რას აშენებს და რაც მთავარია, ის მაინც გაირკვეს ვინ ურჩევს საქმეს საკრებულოს დეპუტატს საკრებულოს თავმჯდომარის კაბინეტში.
ასევე მინდა საქმის ვითარებიდან რამდენიმე შეკითხვა დავუსვა ქალაქ ოზურგეთის მერს ბეგლარ სიორიძეს:
– ლობირებს თუ არა სერგი ცინცაძეს და მის ფირმას ენერგეტიკის მინისტრთან დაახლოებული პირი გიორგი კიკნაძე (ამავე სამინისტროს საგარეო ურთიერთობების დეპარტამენტის თავმჯდომარე);
– იცნობს თუ არა იგი შპს "პირამიდას" წარმომადგენელს სერგი ცინცაძეს ან გიორგი შალამბერიძეს და რა ფორმით და რა დოკუმენტების საფუძველზე წარმოადგენენ ისინი შპს "პირამიდას";
რაც შეეხება სერგი ცინცაძის მიერ გახმოვანებულ კონჭკათის საქმეს და მასზე და მის ძმაზე განხორციელებულ უკანონობებზე, მინდა მივმართო სამართალდამცავებს, გაარკვიოს რა პრეტენზიები აქვს ამავე შპს ,"პირამიდას," წარმომადგენლებს ოზურგეთის გამგეობასთან, რადგანაც ეს პირი შეხვედრაზე დაჟინებით ითხოვდა ჩემგან ამ საქმეზე რეაგირებას და ოზურგეთის გამგეობის საქმიანობის შესწავლას.
ოზურგეთში უკვე მერამდენედ ტენდერში გაიმარჯვა ფირმამ, რომელსაც მართავენ საეჭვო რეპუტაციის ადამიანები. მიუხედავად ჩემი არაერთი გაფრთხილებისა, ადგილობრივი ხელისუფლება უარს ამბობს ხსენებული ფირმის საქმიანობის კონტროლზე და ასეთი უკონტროლობის ფონზე ეს ადამიანები კვლავ იმარჯვებენ რამდენიმე მილიონის ღირებულების ტენდერში. მივმართავ სამართალდამცავ ორგანოებს შეისწავლონ შპს "პირამიდასა" და ქალაქ ოზურგეთის მუნიციპალიტეტის თანამდებობის პირების ურთიერთობები, რომელიც ჩემი აზრით აშკარად შეიცავს სისხლის სამართლის დანაშაულის ნიშნებს"_ აღნიშნული განცახდება ქალაქ ოზურგეთის საკრებულოს დეპუტატმა თამარ ნადირიძემ გააკეთა, რასაც ქალაქ ოზურგეთის მერის პასუხი მოჰყვა:
''როგორც ჩანს, ქალბატონმა თამარმა ისევ ვერ გამოიმუშავა თავისი უფლებამოსილების განხორციელებისთვის საჭირო უნარ–ჩვევები და ისევ პოპულისტის ამპლუაში ამჯობინა დარჩენა. თემა, რომელიც ქალაქ ოზურგეთში ინფრასტრუქტურული პროექტების მიმდინარეობას ეხება, ისევ და ისევ პროვოკაციული და სპეციალურად აგორებული ვითომ სკანდალია.
რეალობა კი ის გახლავთ, რომ ქალაქ ოზურგეთში ნებისმიერი ინფრასტრუქტურული პროექტი აბსოლუტურად ყველა წესის დაცვით, კანონის ყველა რეგულაციის გათვალისწინებით მიმდინარეობს. მნიშვნელობა არა აქვს კონკრეტულ სამუშაოს რომელი ფირმა აწარმოებს. მთავარი ის გახლავთ, რომ ნებისმიერი სამუშაო შესრულების ხარისხის ყოველდღიური კონტროლითა და ყველა კანონიერი ჩარჩოს გათვალისწინებით მიმდინარეობს.
რაც შეეხება ამა თუ იმ ფირმას, პროექტსა და შეკითხვებს, რომელიც თამარ ნადირიძეს უჩნდება, ნებისმიერ დროს შეუძლია მობრძანდეს ქალაქის მერთან, რომელთან შეხვედრის პრობლემა არა თუ დეპუტატს, არამედ არცერთ მოქალაქეს არა აქვს და ყველა, მისთვის ბუნდოვანი საკითხი გაიაროს. მიუხედავად იმისა, რომ ამ ტიპის თანამშრომლობისთვის მას არასდროს მიუმართავს და ყოველთვის პრესის ფურცლებიდან ''განგაშის ზარების'' შემოკვრას ამჯობინებს, მაინც მზად ვარ, ნებისმიერი საკითხი განვუმარტო, თუ სიმართლის მოსმენა ნამდვილად აინტერესებს, მაგრამ ქალბატონი თამარი არ გახლავთ სიმართლის გარკვევით დაინტერესებული. მისი ინტერესის სფერო გახლავთ პოპულისტური განცხადებების კეთება, რომლის შესახებაც ოზურგეთში დღეს ბავშვმაც კი იცის.
ვიცი, ამ ჩემს პასუხს ისევ პასუხის პასუხი მოყვება, მაგრამ მაინც მინდა ერთი რჩევა მივცე ქალბატონ თამარს: ჩვენს ქალაქში არ ცხოვრობენ ადამიანები, რომლებიც თქვენს უმარტივეს პროვოკაციებზე წამოეგებიან და ამით სასურველ შედეგს მიაღწევთ.
ქალბატონო თამარ, დამშვიდდით. ქალაქის მერიას ყველაფერი კარგად აქვს გათვიცნობიერებული და, თქვენდა სამწუხაროდ, მომავალშიც ექნება. რაც შეეხება საკრებულოს, გირჩევთ, ნუ მიაყენებთ მას შეურაცხყოფას, რამეთუ ამ საკრებულოს წევრი თავად ბრძანდებით.
და ბოლოს, მინდა შეკითხვა დაგისვათ: ასეთი არაადეკვატური კითხვებით ვის აყენებთ შეურაცხყოფას? საზოგადოებას, მერს თუ საკუთარ თავს?!''– აცხადებს ბეგლარ სიორიძე.
დღეს აღნიშნულ განცხადებებთან დაკავშირებით პრესკონფერენცია გამართა ქალაქ ოზურგეთის მუნიციპალიტეტის საკრებულოს თავმჯდომარე გელა კობალაძემ. მან ჟურნალისტებს განუცხადა, რომ თამარ ნადირიძის მიერ გაკეთებული განცხადება, რომ მის ოთხაში მოხდა ქურდული გარჩევები, სინამდვილეს არ შეეფერება:
" განცხადება მინდა გავაკეთო, ქალბატონ თამარ ნადირიძის მიერ გაჟღერებულ ინფორმაციასთან დაკავშირებით, სადაც ის საუბრობს, რომ მოხდა საქმის გარჩევა, მასსა და შპს "პირამიდას" წარმომადგენლებს შორის ჩემს სამუშაო ოთახში.
გუშინ დილით ჩემთან მოვიდა შპს "პირამიდას" წარმომადგენელი, რომელმაც გამოთქვა პრეტერენზია, საკრებულოს დეპუტატის მიერ მის მიმართ გავრცელებულ განცხადებასთან დაკავშირებით. როგორც ნადირიძე ამბობს, ტენდერში გამარჯვებული კომპანია არ ასრულებს თავის მოვალეობას ხარისხიანად და პირნათლად, ის მიიჩნევს. რომ ამ კომპანიაში ქალაქ ოზურგეთის მერიაც და საკრებულოც არის ჩართული.
მე დავურეკე ქალბატონ თამარს და ვუთხარი, რომ ჩემთან იმყოფებოდა შპს "პირამიდას" წარმომადგენელი და ვთხოვე მათთან შესახვედრად მოსულიყო. პირველ საათზე შევიკრიბეთ ჩემს სამუშაო ოთახში, სადაც ვისაუბრეთ აღნიშნულთან დაკავშირებით. მე არ ვიცი, რატომ და საიდან ჩათვალა ქალბატონმა თამარმა, რომ ეს იყო საქმის გარჩევა.
ჩვენ სისტემატურად ვამოწმებთ ტენდერში გამარჯვებული კომპანიების მიერ შესრულებული სამუშაოების ხარისხსა და კონტროლს, ამ კომპანიას მთელი საქართველოს მასშტაბით აქვს მოგებული ტენდერები. მას მერი სისტემატურად უწევს კონტროლს და უთვლის თითოეული არმატურის ღერებსა და ბეტონის საფარის სისქეს. აღშფოთებული ვარ ნადირიძის განცხადების გამო, რომ თითქოს ქუჩური გარჩევა მოხდა ჩემთან ოთახში. ეს ინფორმაცია სიმართლეს არ შეეფერება. წარმოადგინოს ქალბატონმა თამარმა ამის დამამტკიცებელი ფაქტი."-აღნიშნავს საკრებულოს თავმჯდომარე.
კობალაძის თქმით, საკრებულოს დეპუტატი მიზანმიმართულად ეწევა ასეთ ცილისმწამებლურ კამპანიას.
"მაინტერსებს, რატომ ჩამრთო მე ამ საქმეში. მიმაჩნია, რომ მის ზურგს უკან დგანან გარკვეული ძალები, რომლებსაც ის შცდომაში შეჰყავთ."_ აღნიშნა კობალაძემ პრესკონფერენციაზე.
