ანალოგიური მოთხოვნით, აღნიშნული ქუჩის მცხოვრებლებმა, პროტესტის ნიშნად, ქუჩა გასული წლის 22 ივლისსაც გადაკეტეს. “გზა, წყალი, გაზი _ ყველა არჩევნების წინ, ამ საკითხების მოგვარებას გვპირდებიან. თუმცა, დღემდე არაფერი გაკეთებულა. სად მიდის ბიუჯეტის ფულები, რას ხმარდება? მოვითხოვთ, მოგვიგვარონ პრობლემები!” _ აცხადებდნენ 18 აპრილს და გასულ წელსაც იქ შეკრებილები.
“რამდენჯერ დაგვპირდით და მაინც არაფერი გაგიკეთებიათ, წლებია, გვპირდებით”, _ ეუბნებოდა მოსახლეობა ოზურგეთის მუნიციპალიტეტის საკრებულოს თავმჯდომარეს ალეკო მამეშვილს და ამავე მუნიციპალიტეტის გამგებლის მოვალეობის შემსრულებელს ილია ვაშაყმაძეს.
“ფანჯარას ვერ ვაღებთ, ქუჩაში გამოსვლა გვიჭირს, ისედაც გაჭირვებულ ხალხს. მოგვაშორეთ კარიერზე მომუშავე “ბლექ-სი გრუპის” მანქანები”, _ ამბობდა აქციის ერთ-ერთი მონაწილე.
გამგებლის მოადგილე მიხეილ გოგოტიშვილი მათ მოთხოვნას სამართლიანს უწოდებს:
_ ბებია, რასაც ითხოვ, სამართლიანი და საფუძვლიანია, ჩვენც თქვენნაირი ოჯახის შვილები ვართ და ჩვენც გვაწუხებს ანალოგიური პრობლემები, _ უთხრა ერთ-ერთ ქალბატონს გოგოტიშვილმა.
აღშფოთებული ხალხის დამშვიდებას პოლიციელი დავით შენგელიაც ცდილობდა. იქვე მყოფი ორი ქალბატონი კადრში გამოჩენას სამსახურის დაკარგვის შიშით ერიდებოდა.
“დაიჭირეს გამგებელი და ახლა ვინც ზის მის ადგილას, მხოლოდ სკამს ათბობს”, _ ხმამაღლა საუბრობდა ერთ-ერთი ქალბატონი, რომელსაც მეზობლები მხარს უბამდნენ: “ვინ მიგვიშვებდა, თორემ უნდა მოგვეყვანა მიხეილ სააკაშვილი აქ!” “ვინ მიგვიშობს, ვინ მიგვიშობს!” “მიტოვებულია ეს ოზურგეთი!” “ოზურგეთს პატრონი არ ჰყავს!” “ყველა ათ მეტრზე გამსკდარია მილები…”
ალეკო მამეშვილი: _ კახა მალაზონიას ვეუბნებოდი, ზეგ მოსახლეობას შევხვდეთ და გვექნება იმის პრეზენტაცია, რაც აქ უნდა გაკეთდეს. ალბათ, გაიგეთ და რაღაცნაირად იჩქარეთ. არ შეიძლება ასე, ხალხო, როცა გარანტიას ვიძლევი, რომ გადაწყდა. რთული პროცესი იყო!
“წყალს მატლები და მწერები მოჰყვება, ქუჩაში ვერ გამოუშვებ ბავშვს, გადათხარეს ყველაფერი, ამის მიზეზი კი ის მანქანებია, რომლებსაც კარიერიდან მასალები გააქვთ. ქვაც აღარ დაგვიტოვეს ჭალაში”, _ 9 თვის წინანდელ ნათქვამს დღესაც იმეორებდნენ აქციაზე მყოფები.
მიუხედავად იმისა, რომ გურიის გუბერნატორის და გამგებლის სახელზე განცხადება არაერთხელ შეიტანეს, მეგრელაძის ქუჩის მცხოვრებლების ყოველდღიური ყოფა დღემდე არ გამოსწორებულა. აქციის მონაწილეებს დღესაც და 2011 წლის 22 ივნისსაც შეხვდნენ ადგილობრივი ხელისუფლების წარმომადგენლები, მათ შორის, მუნიციპალიტეტის საკრებულოს თავმჯდომარე და გამგებლის მოვალეობის შემსრულებელი და მაშინაც “გარანტია მისცეს”!
9 თვის წინ გამართულ აქციაზე, ოზურგეთის წყალმომარაგების სერვისცენტრის მენეჯერი იასონ ცინცაძე ამბობდა, რომ ქუჩის წყალგაყვანილობის მოწესრიგებისთვის ტენდერი გამოცხადებული იყო და სექტემბრიდან უკვე დაიწყებოდა არსებული პრობლემის მოგვარება, თუმცა, უკვე მეორე სექტემბერი მოდის.
ოზურგეთის ყოფილი გამგებელი აღნიშნავდა, რომ პრობლემების მოგვარება ძალიან მალე დაიწყებოდა: “ჩვენ ვიღებთ ვალდებულებას, რომ წყლის სისტემის მოწესრიგების შემდეგ, გზას დავაგებთ. ორშაბათს საინიციატივო ჯგუფს შევხვდებით და დეტალურად განვიხილავთ თითოეულ პრობლემას”, _ ამ განცხადებიდან რამდენიმე დღეში გიორგი ტაკიძე დააკავეს და მას შემდეგ 30-ზე მეტი ორშაბათიც გავიდა _ გარანტირებულად კი მხოლოდ “ბლექ სი გრუპი” ეზიდება კარიერიდან ინერტულ მასალას.
აღსანიშნავია, რომ აქციაზე შინაგან საქმეთა სამინისტროს გურიის სამხარეო სამმართველოს თანამშრომლები, ლამის, სრული შემადგენლობით იყვნენ წარმოდგენილნი.
