“გურიის პოლიციაში საკადრო ცვლილებები იმერული კადრების გაშვებას, მომავალ საპარლამენტო არჩევნებს და ძროხების გახშირებულ ქურდობას უკავშირდება. განსაკუთრებით საგანგაშოა ის ფაქტი, რომ გურიაში ძროხების ქურდობა განახლდა, თუმცა, როგორც გასულ, ისე დამდეგ წელს, პოლიციამ ერთი ქურდიც ვერ დაიჭირა,” _ ამბობენ “გურია ნიუსის” რესპონდენტები.
ჩვენი წყაროს ინფორმაციით, გურიის სამხარეო მთავარ სამმართველოში საკადრო ცვლილებებია _ ურეკის განყოფილების უფროსად დეტექტივი ბიჭია ჩხაიძე დაინიშნა. ამავე განყოფილებაში ლანჩხუთის პოლიციის სამმართველოდან ლანჩხუთის უბნის რწმუნებული გია ტუღუში გადმოიყვანეს და ურეკში უბნის უფროს რწმუნებულად დანიშნეს.
აღსანიშნავია, რომ “გურია ნიუსი” ურეკში გახშირებულ ქურდობებზე არაერთხელ წერდა. როგორც საზოგადოებამ იცის, სოფელ ნატანებში საქონლის ქურდობა გახშირდა, სახლიდან საქონლის გამოყვანის ფაქტებიც კი იყო. ჩვენი წყაროს ინფორმაციით, ურეკში, ბოლო დღეების განმავლობაში, სხვადასხვა სახის 7 ქურდობაა გახსნილი, თუმცა, ამ დანაშაულებებიდან საქონლის ქურდობის არც ერთი ფაქტი არ გახსნილა. ასევე, აღსანიშნავია ისიც, რომ საქონლის ქურდობის რამდენიმე ფაქტზე პოლიციელებს საქმე არ აღუძრავთ, რის შესახებაც შს მინისტრიც კია ინფორმირებული.
რამდენიმე დღის წინ რაც ოზურგეთის რაიონული პოლიციის სამმართველოს კანცელარიის უფროსი მანანა სალუქვაძე მოხსნეს. ჩვენი წყაროს ინფორმაციით, მისი გათავისუფლება საეჭვო ფაქტს უკავშირდება, რომლის შესახებაც ჩვენთვის ცნობილია, თუმცა მისი გახმაურება ამ ეტაპზე ოფიციალურად არ მომხდარა. გაათავისუფლეს ხათუნა ჭანუყვაძეც _ იგი გურიის რეგიონის მთავარ სამმართველოში კადრების განყოფილების უფროსი იყო და ამჟამად უბნის რწმუნებულის კურსებზეა გაშვებული აკადემიაში.
ახლახან, ჩოხატაურის მუნიციპალიტეტშიც მოხდა ერთი ყაჩაღობის ფაქტი, რომელიც კვლავ გაუხსნელია.
საზოგადოებაში გურიის სამხარეო მთავარ სამმართველოში “იმერული კადრების” წასვლაზე საუბრობენ, მიზეზად კი მომავალ საპარლამენტო არჩევნებში მათ მიმართ უიმედობა თუ უნდობლობა სახელდება. აღსანიშნავია, რომ გურიის სამხარეო მთავარი სამმართველოს უფროსის დავით ცირეკიძის კადრი დავით შენგელია, რომელიც ყველას დაუნდობლად აჯარიმებდა, დაჯარიმებულებს ოზურგეთის მუნიციპალიტეტის საკრებულოს თავმჯდომარეც ზედ მიაყოლა . მან სხვა საჯარო მოხელეები და ოზურგეთის საზოგადოების არა ერთი ცნობილი სახეც დააჯარიმა. ამის გამო, საზოგადოებაში პოლიციის მხრიდან უხეშობაზეც საუბრობენ. ცოტაც და პოლიციას ხალხი “აუჯანყდებაო” _ამბობდნენ “გურია ნიუსთან” დაჯარიმებულები.
“გურია ნიუსი” დაუკავშირდა მანანა სალუქვაძეს, რომელმაც მისი გათავისუფლების ფაქტი დაადასტურა, თუმცა, მიზეზებზე საუბარი არ ისურვა; ხათუნა ჭანუყვაძემ, როგორც კი “გურია ნიუსი” ვუხსენეთ, არ მცალიაო, გვიპასუხა.
გურიის სამხარეო მთავარი სამმართველოს ურეკის განყოფილების ახლად დანიშნულმა უფროსმა ბიჭია ჩხაიძემ, დანიშვნის ფაქტი “გურია ნიუსთან” ოფიციალურად დაადასტურა.
_ კი, ბატონო, დავინიშნე, _ გვითხრა მან.
_ ურეკში ძალიან გახშირებულია სხვადასხვა სახის ქურდობა, მათ შორის, ყველაზე შემაშფოთებელია საქონლის ქურდობის ფაქტები, რომელთაგან არც ერთი არ არის გახსნილი. ხართ თუ არა საქმის კურსში?
_ ყველაფრის საქმის კურსში ვარ, რა თქმა უნდა, ოღონდ ამ თემაზე მიმართეთ პრესსამსახურს, რომლის ტელეფონის ნომერიც ჩემზე უკეთ იცით.
_ თქვენ ვერ გაგვცემთ პასუხს?
_მე ხომ დაგიდასტურეთ ის, რაც პირადად მეხებოდა, ანუ ჩემი დანიშვნის საკითხი, დანარჩენზე პრესსამსახურმა უნდა გიპასუხოთ, _ გვითხრა ჩხაიძემ.
“გურია ნიუსი” შინაგან საქმეთა სამინისტროს პრესსამსახურის უფროსს ზურაბ გვენეტაძეს დაუკავშირდა:
_ ბატონო ზურაბ, ოზურგეთში გურიის სამხარეო მთავარი სამმართველოს უფროსმა დავით ცირეკიძემ და მისმა გუნდმა, შესაძლოა, აქაურობა დატოვონ, ადასტურებთ ამ ინფორმაციას?
_ ვერ დავადასტურებ. პირველად მესმის, _ გვითხრა გვენეტაძემ.
