“თუ ჭკვიანად არ მოვიქცეოდი, ბინას ჩამოგვართმევდნენ, რომელიც გიორგის სიცოცხლის ფასად მივიღე”

2008 წლის ომში დაღუპული გმირის, კაპრალ გიორგი ტატუაშვილის დედამ საქართველოს ხელისუფლებას ე.წ “დამპალოს” სამხედრო ქალაქის დასახლებაში არსებული მისი კუთვნილი 40კვ საცხოვრებელი ფართი უკან დაუბრუნა. საუბარია ბინაზე, რომელიც სიკვდილის შემდეგ სახელმწიფომ ტატუაშვილის ოჯახს საჩუქრად გადასცა.

ორშაბათის ტრადიციულ ბრიფინგზე “ქართული ოცნება – დემოკრატიული საქართველოს” პარტიის ლიდერმა ბიძინა ივანიშვილმა მედიის წინაშე დარეჯან პატაშური წარადგინა. როგორც მან აღნიშნა, იგი განსხვავებული აზრის გამო ხელისუფლების მხრიდან დევნას განიცდის. გმირის დედა მარნეულში ცხოვრობს და “ქართული ოცნების” წევრია.

დარეჯან პატაშური: “მე ვარ გმირი გიორგი ტატუაშვილის დედა. როდესაც ჩემი შეხედულებები გამოვხატე, ამჟამინდელი ხელისუფლების წინააღმდეგ, მათ ზეწოლა განახორციელეს ჩემზე და ჩემს შვილებზე, მათ შორის 14 წლის ვაჟიშვილზე. ყრილობის წინა დღეებში მარნეულიდან ჩამოვედი “ქართული ოცნების” სათაო ოფისში. სახლში დაბრუნებულს, გმირი გიორგი ტატუაშვილის უმცროსი ძმა დამხვდა ცუდად. როგორც გაირკვა, თავდაცვის სამინისტროს ოთხმა წარმომადგენელმა _ ორმა სამხედრო ფორმიანმა მამაკაცმა და ორმა ქალბატონმა ჩემი ვაჟიშვილი ჩაისვეს მანქანაში. სამხედრო პოლიციის ერთ-ერთი წარმომადგენელი იყო ნატა ასლამაზიშვილი, რომელიც ჩემს ქალიშვილს მეგობრად მიაჩნდა და ყველაფერს უყვებოდა. მათ დამიბარეს და მითხრეს, რომ მე უნდა გავჩუმებულიყავი, არსად არ წავსულიყავი და თუ ჭკვიანად არ მოვიქცეოდი, ბინას ჩამოგვართმევდნენ, იმ ბინას, რომელიც გიორგის სიცოცხლის ფასად მივიღე.

უმცროს ვაჟიშვილს ვუთხარი: ჩვენ ბინას დავტოვებთ, რადგან გამოდის, რომ ბინა ჩემი შვილის დამსახურების გამო კი არ მივიღეთ, არამედ დუმილის სანაცვლოდ.

სამი კვირის წინ მივიღე გადაწყვეტილება, რომ ბინა დავაბრუნო. არაფრად მიღირს ეს ბინა”.

ბიძინა ივანიშვილი: “როდესაც ქალბატონი დარეჯანი არ დაემორჩილა ზეწოლებს და მუქარებს, დაიწყეს მის შვილებზე ზეწოლა.

ჩვენ დღეს გავგზავნეთ რეპორტიორები, გადაიღეს პოლიციის სამივე მანქანა, რომლებიც დარაჯობდნენ მათ ბინას, საიდანაც გამოსული ბავშვები უნდა აეყვანათ. არავითარი სიწმინდე არ გააჩნია სააკაშვილს. მე არ მინდა ხელისუფლება მოვიხსენიო და აბსოლუტურად შეგნებულად ვასახელებ ერთი კაცის გვარს _ ეს არის მხოლოდ ერთი კაცის იდეოლოგია.

ქალბატონმა, რომელიც გახლავთ დაღუპული გმირის დედა, განსხვავებული აზრი გამოხატა. მეტი არაფერი მომხდარა. გმირის დედას უფლება არ აქვს განსხვავებული აზრის გამოხატოს?!

მათ ვერ მოახერხეს, ქალბატონ დარეჯანს პოზიცია შეეცვალა და გადაეკიდნენ შვილებს.

მე მინდა საქართველოს მოსახლეობას ვუთხრა: დღეიდან ეს ქალბატონი და მისი შვილები იმსახურებენ ჩვენი ქვეყნის მხარდაჭერას. მან გმირი შვილი გაზარდა და სამშობლოს შესწირა. ჩვენ მათ ბოლომდე დავიცავთ. ასევე, მომავალში მოვახერხებთ, დავიცვათ თითოეული ქართველი ერთი კაცის ძალადობრივი იდეოლოგიისაგან. დღეს ქვეყანაში განსხვავებული აზრი იდევნება.

ჩვენ გვაქვს პროგრამა და რამდენიმე დღეში მოვახერხებთ რეალურად დავიცვათ თითოეული მოქალაქე იმ ძალადობრივი იდეოლოგიისგან, რომელიც მოდის ერთი კაცისგან. ეს ქალბატონი ყველასგან და მათ შორის თქვენგანაც, იმსახურებს მაქსიმალურ ძალისხმევას, რათა მოახერხოს და თავისი დარჩენილი ცხოვრება თავისუფალი აზრით გაატაროს.

კითხვაზე, თუ დახმარებიხართ ომში დაღუპული ჯარისკაცების მშობლებს და ოჯახებს, ბიძინა ივანიშვილმა განაცხადა: “ომში დაღუპულ გმირებს და მათ მშობლებს მე არ დავხმარებივარ, ქალბატონ დარეჯანს ამისთვის ბოდიში მოვუხადე.

მაშინ ჩემი პოზიცია რომ გამომეჩინა, ამაზე დიდი მადლი, ალბათ, არაფერი იქნებოდა. ვფიქრობდი, მაშინ მთელი მსოფლიო იდგა ფეხზე. საერთაშორისო თანამეგობრობა ცდილობდა დახმარებას. ცდილობდა ჩვენი სახელმწიფოც.

გმირის დედა სახელმწიფოსგან ათჯერ და ასჯერ მეტს იმსახურებს. მოგეხსენებათ, ვისთან გვაქვს საქმე _ მათ აჩუქეს, მაგრამ განსხვავებული აზრის გამო ართმევენ.”