მარტივი გამოცანა მკითხველისთვის: გამოიცანით, ჩვენი კითხვები უფრო სულელურია თუ გუბერნატორის პასუხები?!

შეხვედრას მისი მოადგილეები, სამივე მუნიციპალიტეტის გამგებლები, საკრებულოს თავმჯდომარეები, ოზურგეთის მაჟორიტარი დეპუტატი საქართველოს პარლამენტში ესწრებოდნენ. გუბერნატორის 46-წუთიანი გამოსვლა თავისუფლად შეიძლება დავასათაუროთ ერთი ფრაზით: “მე ისეთი კარგი ვარ!” _ მან მხოლოდ იმ საქმეების შესახებ ისაუბრა, რომელიც, თურმე, რეგიონში წარმატებით გახორციელდა და 2011 წელსაც ასეთივე წარმატებით გაგრძელდება.
46 წუთის მანძილზე ჩამოთვლილი “ხალხისთვის სასიკეთო საქმეების” გამეორებით თავს აღარ შეგაწყენთ, რადგან საზოგადოებამ ყველაზე კარგად იცის, რომელი პრობლემის გადაჭრა შეძლო და როგორ მხარის პირველმა პირმა, რომლის მმართველობის დროს, გურიაში მიწის დატაცების უდიდესი კორუფციული ქსელი ჩამოყალიბდა; კრიმინოგენური სიტუაციის გაუარესებამ პიკს მიაღწია; ჟურნალისტების შეურაცხყოფის, ოფისების მინების ჩამსხვრევის ფაქტები დაფიქსირდა; მილიონობით ლარი წყალში გადაიყარა; საჯარო მოხელეების ახლობლების დასაქმების ხარჯზე სოციალური პროგრამების დაფინანსება მინიმუმამდე დავიდა; მოშლილია საჯარო სამსახურებში დისციპლინა და ანგარიშვალდებულება ხალხის წინაშე…
ამ ჩამონათვალის გაგრძელებას სათანადო მაგალითების თანხლებით, 46 წუთი ნამდვილად არ ეყოფოდა და რადგანაც ჩიტაიშვილს ხალხისთვის “ცოტა დრო” აქვს, მან ჟურნალისტებს შეკითხვებისთვის მხოლოდ ხუთი წუთი “გამოუყო”.
თუმცა, როგორც აღმოჩნდა, დარბაზში მყოფი ჟურნალისტებისგან კითხვები მხოლოდ “გურია ნიუსს” დაუგროვდა. ერთი ჩვენი კოლეგა პრობლემას იმაში ხედავს, რომ ოზურგეთში სათანადო ხარისხის და ჟღერადობის ინსტრუმენტები არ გვქონია, რომ კლასიკოსი შემსრულებლები ჩამოვიდნენ და საქველმოქმედო კონცერტები გამართონ. გუბერნატორი ამ პრობლემას სიღრმისეულად ჩასწვდა და აუცილებლობად მიიჩნია, მომავალ წელს გასახორციელებელ “გრანდიოზულ საქმეებს” ინსტრუმენტის შეძენაც შემატოს.
სამაგიეროდ, ჩვენი შეკითხვები გუბერნატორს “სულელურად” მოეჩვენა და ეს სიტყვა მხიარული დამსწრეების ფონზე (მათ შორის, სამწუხაროდ, ჟურნალისტების!) რამდენჯერმე წარმოთქვა. როგორც ჩანს, გუბერნატორს, რომელსაც რუსთველის ბრძნული აფორიზმი _ კოკისა და მისი შიგთავსის წარმოდინების შესახებ სკოლაშიც არ დაუსწავლია, თავის “საძმოში” ავერიეთ, რომლებიც ამგვარ შეფასებებს (უარესსაც!) “უფროსობისგან” მორჩილად და გაბადრული სახით ითმენენ!
ჩვენ კი მკითხველს მარტივ ამოცანას ვთავაზობთ: აი, კითხვები, რომლებიც ჩიტაიშვილს დავუსვით და აქვეა მის მიერ გაცემული პასუხები. ამოცანა გვეკითხება: აბა, გამოიცანით, რომელია მათ შორის მართლაც სულელური!
კითხვა: _ მიუხედავად იმისა, რომ ოზურგეთის წყალსადენზე შვიდ მილიონზე მეტი ლარი დაიხარჯა, წყალმომარაგების პრობლემა არ გადაჭრილა. ახლახან, შპს “საქართველოს გაერთიანებული წყალმომარაგების კომპანიის” ოზურგეთის სერვისცენტრის ხელმძღვანელმა იასონ ცინცაძემ, ოზურგეთის მუნიციპალიტეტის საკრებულოს სხდომაზე განაცხადა, რომ ქალაქ ოზურგეთის მცხოვრებლებმა ხარჯები უნდა გაიღონ და წყლის რეზერვუარები თავად უნდა დაამონტაჟონ… გვაინტერესებს, ექნება თუ არა ოზურგეთს წყალი?
ვალერი ჩიტაიშვილის პასუხი: _ ასეთი განცხადებები შეიძლება დღეს იასონ ცინცაძემ გააკეთოს, ხვალ შეიძლება ვიღაც დავითმა, მე აბსოლუტურად გეთანხმებით, რეზერვუარებზე არ არის საუბარი, კეთილი უნდა ინებოს ამ ადამიანმა და 20 ქუჩა, რომელიც გასაკეთებელია, იმაზე იზრუნოს, მოსახლეობას უნდა მოემსახუროს. ჯერ ერთი, შვიდი მილიონი არ არის დახარჯული ქალაქში, რამდენი მილიონიც უნდა იყოს დახარჯული, ეს არ არის სრულყოფილი სამუშაოები, რომელიც აბსოლუტურად წყლის მომარაგებას გულისხმობს, არის ბევრი ქუჩები, სადაც საერთოდ არ არის შიდა ქსელი შეცვლილი, ზუსტად ამაზე არის საუბარი, მანამდე არ იქნება წნევა მაგისტრალში, სანამ არ იქნება ყველა დაზიანებული მონაკვეთი აღდგენილი.
კომენტარი: _ თუ შვიდი მილიონი, არა, მაშ რამდენი ბატონო ვალერი? ხუთი? რათა ხუთი? თამაშს რომ ძალიან არ შევყვეთ, ამ თანხების დასაზუსტებლად, ჩვენ ჟურნალისტურ გამოძიებას მოვამზადებთ. თუმცა, ჩიტაიშვილისგან განსხვავებით, კარგად გვახსოვს ერთი ფაქტი: წყალსადენის ხარჯმა რომ 5 მილიონს გადააჭარბა, ქუთაისში გამართულ მთავრობის ერთ-ერთ სხდომაზე, საქართველოს პრეზიდენტმა პირდაპირ ეთერში მიალანძღა მაშინ ოზურგეთის გამგებელი ჩიტაიშვილი, სწორედ აღნიშნული მილიონების არამიზნობრივად ხარჯვის გამო! თუმცა, ასე სახალხოდ “გალანძღული” კაცი გუბერნატორად მაინც დანიშნა!
კითხვა: _ ბატონო ვალერიან, წელს ყველაზე ხმაურიანი აღმოჩნდა კურორტ ბახმაროს მიწების დატაცების საკითხი. “გურია ნიუსი” წერდა, რომ 80 ადამიანმა სახელმწიფოს “თავისი ნებით” საჩუქრად გადასცა მიწის ნაკვეთი. გავრცელდა ხმა, რომ ერთ-ერთი პირველი თქვენ იყავით და მიწის ნაკვეთი სახელმწიფოს “აჩუქეთ.” რამდენად შეესაბამება გავრცელებული ინფორმაცია სიმართლეს?
ვალერი ჩიტაიშვილის პასუხი: _ მე ბევრი სისულელეები მინახია, რომელიც დაწერილა თქვენს გაზეთში(?!). არამარტო თქვენს გაზეთში, სხვა გაზეთებში, ესეც დიდი სისულელეა, რომელიც ვიღაცას მოუვიდა თავში, არანაირი ნაკვეთი არ მქონია და შესაბამისად, არც ჩამიბარებია, ადამიანებმა ვინც ჩააბარა, მათი კეთილი ნება იყო და ჩააბარეს, შეიძლება ბევრმა ჩააბაროს კიდევ. ეს გაქვს ცუდი და არასწორი ინფორმაცია, კიდევ ერთხელ ვამბობ სისულელე ინფორმაცია.
_ გმადლობთ!
_ არაფრის. კიდევ გაქვთ შეკითხვები? _ სხვა ჟურნალისტებს კითხვების დასმისკენ მოუწოდა “კორექტულმა”, “ბრძენმა”  და ჩვენი “სისულელეებით” შეწუხებულმა გუბერნატორმა. და რადგანაც, სხვა ჟურნალისტებს კითხვები არ ჰქონდათ, “ძლივს ნაშოვნი ძვირფასი  დროით” ისევ ჩვენ ვისარგებლეთ:
კითხვა: _ ბატონო ვალერიან, ბოლო პერიოდში გურიაში მძიმე კრიმინოგენური მდგომარეობაა, ქუჩაში გამვლელებს თავს ესხმიან, ხალხს მოსაკლავად ოჯახებში უვარდებიან, გახშირდა ქურდობისა და ძარცვის ფაქტები…
_ დიახ, აბსოლუტურად გეთანხმებით, პირადად კონტროლზე მაქვს აყვანილი ბოლო დროს საზარელი მკვლელობა, რაღაც სისულელე (?!) დაიწერა თქვენს გაზეთში, რომ უშიშროების ეზოში იყო ჩემი მანქანა გაჩერებული, ზუსტად იმიტომ იყო, პირველი, როგორც კი ჩამოვედი პოლონეთიდან, კრიმინოგენური სიტუაცია მოვიკითხე. ზუსტად იმ დღეს, სამართალდამცავებთან ერთად გავდიოდი რიგ საკითხებს(?!), რომელიც ბოლო დროს მომხდარ ფაქტებს ეხებოდა. ვუსამძიმრებ ხურციძეების ოჯახს, მახსოვს, შარშან გამგეობამ დაეხმარა მათ ოჯახს, როდესაც ბავშვი შეეძინა, რომელიც ახლახან ძლივს გადაურჩა სიკვდილს. ყველა სამართალდამცავები მუშაობს ისე, როგორც არის საჭირო.
კომენტარი: _ აქ მთლად დავიბენით და ვერ გავიგეთ, რის თქმას ცდილობს ჩვენი გუბერნატორი: მოსწონს თუ არ მოსწონს სამართალდამცავების მუშაობა; იდგა თუ არ იდგა კუდ-ის ეზოში (იდგა, იდგა!) მისი მანქანა; იცის თუ არა, რომ კრიმინოგენური ვითარება შინაგან საქმეთა ორგანოების სფეროა და არა კონსტიტუციური უსაფრთხოების დეპარტამენტის; რა შუაში დახმარების წამოყვედრება გაუბედურებული ოჯახისთვის; რა მნიშვნელობა აქვს პირად კონტროლზე აიყვანა თუ არა (ასე ამბობდნენ პარტიული მუშაკები სამოცდაათი წელი!) მან მკვლელობის საქმე…
მთავარი ერთია _ მხარეში უაღრესად მძიმე კრიმინოგენური ვითარებაა, დაბალია სოციალური ფონი, უმუშევრობაა, ნეპოტიზმია, კლანური მმართველობაა,  კორუფციული სქემებია _ ეს ის თემებია, რომლებზეც ჩვენ კვლავაც ხმამაღლა ვისაუბრებთ და რომლებიც ჩიტაიშვილისთვის, ალბათ, კვლავ “სისულელე”  იქნება, მაგრამ ეს არაა მნიშვნელოვანი _ მნიშვნელოვანი ჩვენი მკითხველია, რომლისგანაც ველოდებით ამ სტატიაში შემოთავაზებული გამოცანების სწორ პასუხებს!
და ბოლოს _ ახალ წელს ნამდვილად არ გვინდოდა გუბერნატორთან ამგვარი ურთიერთობით შევხვედროდით, მაგრამ ღმერთია მოწამე _ თქვენ დაიწყეთ, ბატონო ვალერიან!!!