ნინო ბურძგლა ლანჩხუთის მუნიციპალიტეტის ჯურუყვეთის ადმინისტრაციული ერთეულის სოფელ ბაღლეფში ცხოვრობს. მას ერთადერთი, დისტროფიით დაავადებული ცხრა წლის შვილისთვის ესაჭიროება ელექტროეტლი, რისი შეძენის საშუალებაც ოჯახს არ გააჩნია.
ნინო ბურძგლას თქმით, გოგონას მდგომარეობა განსაკუთრებით ოთხი თვის წინ გაუარესდა: "ბოლო თვეებია წელს ქვემოთ საერთოდ მოწყდა, ვეღარ დადის, დამოუკიდებლად საწოლში გადატრიალებაც აღარ შეუძლია, მხოლოდ ხელებს ამოძრავებს, ისიც გაჭირვებით".
როგორც ჩვენი რესპონდენტი ამბობს, მეუღლესთან ოფიციალურად განქორწინებულია და შვილთან ერთად მშობლების სახლში ცხოვრობს: "ეს ერთადერთი შვილი _ ცხრა წლის გოგონა მყავს, რომელიც დისტროფიითა დაავადებული. მისთვის საჭირო მედიკამენტის გამოწერა ხან _ გერმანიიდან, ხანაც თურქეთიდან გვიწევს. გარდა ამისა, სპეციალური ვარჯიშებიც ესაჭირეობა, თუმცა, მის გაკეთებას ჩვენ ვერ ვახერხებთ _ საშუალება არ გავქვს. სოციალურ დახმარებას ვერ ვიღებ, რადგან მშობლების სახლში ვცხოვრობ და ამის გამო ვარჯიშების დაფინანსებაზეც უარი გვითხრეს.
ბავშვისთვის ელექტროეტლის შეძენის თხოვნით, დაახლოებით, სამი თვის წინ მივმართე ლანჩხუთის გამგეობის სოციალურ სამსახურს, თუმცა, გამგეობიდან დაგვირეკეს, რომ ამ ეტაპზე ეტლს ვერ შეგვიძენდნენ, რადგან საამისო თანხა არ გააჩნიათ. არადა, უეტლოდ ძალიან გვიჭირს _ რადგან ჰორმონებს ვასმევთ, ბავშვმა წონაში საგრძნობლად მოიმატა, და მის ხელში აყვანას ვეღარ ვახერხებ, რომ კარგ ამინდებში გარეთ გავიყვანო სუფთა ჰაერზე და სულ სახლში არ იყოს ჩაკეტილი. მითუმეტეს, ახლა, როცა მზიანი ამინდებია, ბავშვი კი გარეთ გაყვანას ითხოვს.
ამ მძიმე მდგომარეობიდან გამომდინარე, მინდა ადგილობრივ ხელმძღვანელობას ვთხოვო, როგორმე დაგვეხმაროს, მე და ჩემს მცირეწლოვან შვილს ყურადღება მოგვაქციოს. ჩვენთვის მართლაც აუცილებლობას წარმოადგენს ეტლის ქონა", _ ამბობს გოგონას დედა.
ჯურუყვეთის მაჟორიტარის ალექსანდრე მახათაძის თქმით, ნინო ბურძგლას ოჯახის პრობლემა მისთვის საკმაოდ კარგადაა ცნობილი და ეცდება, შესაძლებლობის ფარგლებში, დახმარება აღმოუჩინოს; "მართლაც საკმაოდ მძიმე მდგომარეობაა, გასულ წელს ამ ოჯახს ერთჯერადად 500 ლარით დავეხმარეთ, რომ ბავშვისთვის საჭირო გამოკვლევები ჩაეტარებინათ და ახლაც ყველანაირად ეცდება ადგილობრივი ხელისუფლება გოგონას დახმარება კვლავ გაუწიოს და ეტლი შეუძინოს", _ გვითხრა მახათაძემ.
"გურია ნიუსი" კომენტარისთვის გამგეობის სოციალური სამსახურის უფროსს თამარ ფირცხალაიშვილს დაუკავშირდა: "როგორც ირკვევა, ნინო ბურძგლა განცხადებით ჩვენთან გასული წლის ბოლოსთვის შემოვიდა. ვინაიდან წლის ბოლო იყო და შესაბამისი თანხა არ გაგვაჩნდა, მას მხოლოდ ამ მოტივით ეთქვა უარი დახმარებაზე. შესაბამისი დახმარების მიღების მიზნით, ქალბატონმა ნინომ მიმდინარე წელს ხელახალი განცხადებით უნდა მოგვმართოს", _ გვითხრა ფირცხალაიშვილმა.
