რამდენიმე დღის წინ, ოზურგეთის მუნიციპალიტეტის სოფელ ბახვში ტრაგედია დატრიალდა. გადაჭარბებული სიჩქარით მოძრავი ავტომანქანა, რომელსაც 20 წლის ახალგაზრდა მართავდა, ბახვის ცენტრში ბორდიურს შეეჯახა და იქვე მდგომი ორი ქალბატონის სიცოცხლე იმსხვერპლა, ერთი კი მძიმედ დაშავდა. სოფელ ბახვში მცხოვრები 68 წლის ზეინაბ ცეცხლაძის ჯანმრთელობის მდგომარეობა ოჯახის წევრების თქმით, კვლავ მძიმეა. ის ამჟამად სახლში იმყოფება. დაშავებული ზეინაბის მეუღლე თამაზ ცეცხლაძე დახმარებისთვის "გურია ნიუსს" მიმართავს. ოჯახმა ვერ შეძლო ოზურგეთის სამედიცინო ცენტრში უმძიმესი ავადმყოფის მკურნალობის ხარჯების დაფარვა. როგორც თამაზ ცეცხლაძე "გურია ნიუსთან" საუბრობს, ოჯახს ყოველდღიურად 190 ლარი უნდა გადაეხადა , რისი საშუალებაც მათ არ გააჩნდათ. ამასთანავე, თამაზ ცეცხლაძის ოჯახი სტიქიით დაზარალებულია. მისივე თქმით, ადგილობრივ ხელისუფლებას არც ამ კუთხით გამოუჩენია ყურადღება. ცეცხლაძეების ოჯახი სახელმწიფოს მხრიდან დაუცველობაზე საუბრობს:
თამაზ ცეცხლაძე: "აღარ ვიცით ვის მივმართოთ, ვინ გაგვიწევს დახმარებას? ნუთუ სახელმწიფო ამის მეტად არ უნდა იცავდეს თავის მოქალაქეებს? როგორ უნდა შეძლოს პენსიონერმა გლეხმა ასეთი უმძიმესი ავადმყოფის მკურნალობა, როცა დღეში სჭირდება ჩემს მეუღლეს 180 ლარის წამლები? ამ დროს პალატაში ერთი დღე 190 ლარი ღირს. ვეკითხები და გამცენ პასუხი!"_ ამბობს დაზარალებული ზეინაბ ცეცხლაძის მეუღლე თამაზ ცეცხლაძე. მისივე თქმით მასაც და მის მეუღლესაც ორი წლის პენსია წინასწარ აქვთ გამოტანილი:
"თავში აქვს პრობლემა. თბილისში ვერ გადავიყვანეთ, საავადმყოფოდან პალატაში გამოწერეს, ვერ გავაჩერეთ და სახლში წამოვიყვანეთ. თავი სამ ადგილზე აქვს გატეხილი, მოტეხილი აქვს ნეკნები, მუხლი. დაზიანებული აქვს ფუძე. ძალიან ტკივა თავი. თავში სისხლი აქვს ჩამდგარი, უმძიმეს მდგომარეობაში იმყოფება, გადაბრუნებაც არ შეუძლია. გაუსაძლისს მდგომარეობაში ვიმყოფებით, თუ კი რამ გაგვაჩნდა, ყველაფერი გავყიდეთ. უსახსროდ ვართ, ფაქტიურად მომაკვდავი სახლში გვყავს და ვერ ვშველით. კიდევ კარგი, რომ დროზე მივხვდი, სავადმყოფოში ამდენი ფული რომ იყო გადასახადი, გადავიხადე 480 ლარი და წამოვიყვანე სახლში, ერთმა ექიმმა ჩუმად მითხრა, გაგყიდიანო და იქნებ სახლში მოახერხო მკურნალობაო, თორემ ოჯახი დაგრჩება გასაყიდიო."_ამბობს თამაზ ცეცხლაძე.
ცეცხლაძეების ოჯახს დეკემბერში სტიქია დაატყდა თავს.
" სახლში რა მდგომარეობა მაქვს ნახეთ, ჩემი საცოდავი მეუღლე ამას ნერვიულობდა. სტიქიის შემდეგ გამგებელიც იმყოფებოდა, დაათვალიერა ჩვენი სახლი, დაგვპირდა, რომ დახმარებას გაგვიწევდა. ადგილობრივ ხელისუფლებას მივმართე, რა თქმა უნდა, დასახმარებლად. აქ არ იცხოვრებაო, თვითონ მეუბნებოდნენ, ბინას გიქირავებთ და ზარალს აგინაზღაურებთო, მაგრამ ერთი თეთრი არ მოუციათ. ეს დეკემბერში მოხდა. 500 ლარამდე დახმარება შეიძლება გაგიწიოთო, როგორც უმძიმესი ავადმყოფის პატრონსო და არც ის ჩანს. არავისგან ერთი თეთრი არ მიმიღია.
რას გავს სახლის ჭერი, ნახეთ. არც ლეიბი და საბანი დამრჩა, ყველაფერი გავყიდეთ, არჩევნებზე ხომ მომადგებიან სახლში, გვერდში დამიდექითო, გვერდში დადგომა კი არა სიახლოვეს ვერ გამეკარებიან საერთოდ. ეს რა ცხოვრება მოვიდა, ამის მეტად სახელმწიფოს იმედი არ უნდა გქონდეს? როგორც თავად დამეხმარნენ ამ გაჭირვების დროს, ისე გადავუხდი სამაგიეროს არჩევნებზე."_ ამბობს ცეცლაძე.
ოზურგეთის მუნიციპალიტეტის გამგებლის წარმომადგენელი სოფელ ბახვში გოჩა შარაშენიძე განმარტავს, რომ თამაზ ცეცხლაძის ოჯახს დახმარება ნამდვილად სჭირდება, თუმცა მისთვის ოფიციალურად ოჯახს არ მიუმართავს:
"როცა ეს საშინელი ავარია მოხდა, მეც იქ ვიყავი, ადგილზე მაშინვე ამოვიდა გამგებელი მერაბ ჭანუყვაძე და მითხრა, ამ ოჯახებს დახმარება გავუწიოთო. გამგებელი საქმის კურსში იყო, თუმცა ცეცხლაძეებს ჩემთვის ოფიციალურად არ მოუმართავთ, არც განცახდება დაუწერიათ და ისე როგორ დავეხმაროთ? კი ბატონო უმძიმესს მდგომარეობაში იმყოფებიან."_ ამბობს შარაშენიძე.
რაც შეეხება სტიქიით დაზარალებულ ოჯახს, გაუწია თუ არა ხელისუფლებამ დახმარება, შარაშენიძე აღნიშნავს, რომ მათ სახელმწიფომ სახლის გადასახურავი და ხის მასალა გამოუყო.
"რას ამბობთ, როგორ არ დაეხმარნენ? ხის მასალაც მისცეს და სახურავიც. სახლის გადახურვის ფული გადახდილია თუ არა, ამას ვერ გეტყვით,"- გვითხრა ბახვის რწმუნებულმა.
